കഷ്ട്ടപ്പാടുകളിൽ നിന്ന് ഉയർന്നു പറന്ന ​ജസ്റ്റിൻ ഫെ‍ർണാണ്ടസിന്റെ വിജയകഥ

തികച്ചും സാധാരണ കുടുംബത്തിൽ ജനിച്ച് ദാരിദ്രവും കഷ്ട്ടപ്പാടുകളും അറിഞ്ഞ് തന്നെ വളർന്ന യുവാവാണ് 27കാരനായ ജസ്റ്റിൻ ഫെ‍ർണാണ്ടസ്. ജീവിതത്തിന്റെ ഒരു ഘട്ടത്തിൽ പഠനം പോലും ഉപേക്ഷിക്കേണ്ടി വരുമെന്ന് കരുതിയെങ്കിലും വർഷം 19 ലക്ഷം രൂപ ശമ്പളം ലഭിക്കുന്ന ജോലിയാണ് ഇപ്പോൾ ജസ്റ്റിനെ തേടിയെത്തിയിരിക്കുന്നത്.

പഠനവഴികൾ ഇങ്ങനെ

ഒരിയ്ക്കൽ പഠനം വഴിമുട്ടിയപ്പോൾ അച്ഛന്റെ സഹോദരിയാണ് പഠനം തുടരാൻ സഹായിച്ചത്. പന്ത്രണ്ടാം ക്ലാസുവരെ ഇവരുടെ സഹായത്തോടെ പഠിച്ചു. തു‍ടർന്ന് തിരുവനന്തപുരം സിഇടി കോളേജിൽ നിന്നും ബിടെക് ചെയ്‌തു. ശേഷം ഇന്ത്യൻ ഇൻസ്റ്റിറ്റ്യൂട്ട് ഓഫ് മാനേജ്‌മെന്റിൽ പഠിക്കാൻ അവസരം ലഭിച്ചു. ഇവിടെ നിന്നാണ് ജോലിയിലേയ്ക്കുള്ള വഴി തെളിഞ്ഞത്

സ്കോള‍ർഷിപ്പുകൾ നിരവധി

ഗവൺമെന്റ് കോളേജ് തിരുവന്തപുരത്തു നിന്നും ബിടെക് ബിരുദം നേടിയതിനു ശേഷം കോഴിക്കോട് ഐഐഎമ്മില്‍ നിന്നും എംബിഎ യായിരുന്നു ലക്ഷ്യം. ആദ്യ ശ്രമം പരാജയപ്പെടുകയും പ്രായം തടസ്സം നില്‍ക്കുകയും ചെയ്തതോടെ നാഗ്പൂര്‍ ഐഐടി യില്‍ ചേരുകയായിരുന്നു. പഠനകാലങ്ങളില്‍ ലഭിച്ച സ്‌ക്കോളര്‍ഷിപ്പുകളായിരുന്നു ജസ്റ്റിന്റെ പഠനത്തെ മുന്നോട്ട് നയിച്ചത്.

ജോലി

ഹൈദരാബാദ് കേന്ദ്രീകരിച്ചുള്ള വാല്യൂ ലാബ് എന്ന കമ്പനിയിൽ അസോസിയേറ്റ് ഡയറക്ടറായാണ് ജസ്റ്റിന് ജോലി ലഭിച്ചിരിക്കുന്നത്. 19 ലക്ഷം രൂപയാണ് കമ്പനി വാ‍ർഷിക ശമ്പളം വാ​ഗ്ദാനം ചെയ്തിരിക്കുന്നത്.

കൊല്ലം സ്വദേശി

കൊല്ലം സ്വദേശിയാണ് ജസ്റ്റിൻ. അച്ഛൻ ഒരു തയ്യൽക്കാരനാണ്. മുത്തച്ഛനും ഒരു തയ്യൽക്കാരനായിരുന്നു അതുകൊണ്ടു തന്നെ തന്റെ അച്ഛനും ആ ജോലി തന്നെ പിന്തുടർന്നു. മക്കളുടെ പഠന ചെലവും കുടുംബ ചെലവുകളുമൊക്കെയായി രണ്ടറ്റം കൂട്ടിമുട്ടിക്കാൻ തന്റെ അച്ഛൻ ഒരുപാട് കഷ്ടപ്പെട്ടിരുന്നുവെന്ന് ജസ്റ്റിൻ പറയുന്നു.

ഫേസ്ബുക്ക് പോസ്റ്റ്

ജസ്റ്റിന് ലഭിച്ച ശമ്പളത്തെക്കുറിച്ച് പല മാധ്യമങ്ങളും തെറ്റായ റിപ്പോ‍ർട്ട് നൽകിയിരുന്നു. മാസം 19 ലക്ഷം രൂപ ശമ്പളം എന്നാണ് പലരും റിപ്പോ‍ർട്ട് ചെയ്തത്. എന്നാൽ ഇത് തെറ്റാണെന്നും വാ‍ർഷിക ശമ്പളമാണ് 19 ലക്ഷമെന്നും ജസ്റ്റിൻ തന്റെ ഫേസ്ബുക്ക് പേജിൽ കുറിച്ചിരുന്നു.

malayalam.goodreturns.in