സ്ത്രീകൾക്ക് സ്വയം തൊഴിലിനായി ശരണ്യ സ്വയം തൊഴില്‍ പദ്ധതി

എംപ്ലോയ്മെന്‍റ് എക്സ്ചേഞ്ചില്‍ പേര്‍ രജിസ്റ്റര്‍ ചെയ്തിട്ടുള്ള തൊഴില്‍ രഹിതരായ വിധവകള്‍,വിവാഹ മോചനം നേടിയ സ്രീകള്‍,ഭര്‍ത്താവ് ഉപേക്ഷിക്കുകയോ/ഭര്‍ത്താവിനെ കാണാതാവുകയോ ചെയ്യുന്നവര്‍,30 വയസ്സ് കഴിഞ്ഞ അവിവാഹിതകള്‍,പട്ടിക വര്‍ഗത്തിലെ അവിവാഹിതരായ അമ്മമാര്‍,ഭിന്നശേഷിക്കാരായ വനിതകള്‍,ശയ്യാവലംബരും നിത്യരോഗികളുമായ(അക്യൂട്ട് കിഡ്നി പ്രോബ്ലം,കാന്‍സര്‍,മാനസിക രോഗം,ഹീമോഫീലിയ തുടങ്ങിയവ)ഭര്‍ത്താക്കന്മാരുള്ള വനിതകള്‍ എന്നീ അശരണരായ വനിതകള്‍ക്ക് മാത്രമായിട്ട് എംപ്ലോയ്മെന്‍റ് വകുപ്പ് നേരിട്ട് നടത്തുന്ന സ്വയം തൊഴില്‍ പദ്ധതിയാണിത് .

അര്‍ഹത

എംപ്ലോയ്മെന്‍റ് എക്സ്ചേഞ്ചില്‍ രജിസ്ട്രേഷന്‍ നിലവിലുണ്ടായിരിക്കണം.
അപേക്ഷക വിദ്യാര്‍ഥി ആയിരിക്കുവാന്‍ പാടില്ല.

പ്രായപരിധി 18നും 55 നും മദ്ധ്യേ ആയിരിക്കണം.(അവിവാഹിതരായ സ്ത്രീകള്‍ക്ക് 30വയസ്സ് കഴിഞ്ഞിരിക്കണം)

കുടുംബ വാര്‍ഷിക വരുമാനം 2 ലക്ഷത്തില്‍ കവിയാന്‍ പാടില്ല.

ഫണ്ട്‌

പരമാവധി 50000/-രൂപ വരെ പലിശ രഹിത വായ്പ്പഅനുവദിക്കുന്നതാണ്.പ്രൊജക്റ്റ്‌ പരിശോധിച് ഒഴിച്ചുകൂടാനാവാത്ത സാഹചര്യത്തില്‍ 1ലക്ഷം രൂപ വരെ അനുവദിക്കുന്നു.

50000/-രൂപക്ക് മുകളിലുള്ള തുകയ്ക്ക് 3% FLAT RATE -ല്‍ പലിശ ഈടാക്കുന്നതാണ്.

വായ്പ തുകയുടെ 50%പരമാവധി 25000/-രൂപ,സബ്സിഡിയായി അനുവദിക്കുന്നതാണ്.സംരംഭം നല്ല രീതിയില്‍ നടത്തിക്കൊണ്ടുപോകുകയും ആദ്യ വായ്പ്പയുടെ 50% മെങ്കിലും തിരിച്ചടച്ചവര്‍ക്കും സംരംഭം വിപുലീകരിക്കുന്നതിനു ആദ്യ വായ്പ്പ തുകയുടെ 80% കവിയാത്ത തുക തുടര്‍വായ്പ്പയായി (ഒരിക്കല്‍ മാത്രം)കുറഞ്ഞ പലിശ നിരക്കില്‍ അനുവദിക്കുന്നതാണ്.

 

മുന്‍ഗണന

ബിരുദധാരികളായ വനിതകള്‍ക്ക്.

പ്രൊഫഷണല്‍/സാങ്കേതിക യോഗ്യതയുള്ളവര്‍/സംസ്ഥാന വ്യാവസായിക പരിശീലന വകുപ്പ് പരമ്പരാഗത തൊഴിലാളികള്‍ക്ക് നല്‍കുന്ന പ്രവര്‍ത്തി കാര്യക്ഷമത സര്ട്ടിഫിക്കട്ടുള്ളവര്‍.

ITI/ITC കളില്‍ നിന്ന് വിവിധ ട്രേഡുകളില്‍ പരിശീലന സര്‍ട്ടിഫിക്കറ്റുകള്‍,കരസ്ഥമാക്കിയിട്ടുള്ളവര്‍.

 

പൊതുവിവരങ്ങള്‍

ഈ പദ്ധതിയിന്‍ കീഴില്‍ ധനസഹായം ലഭിക്കുന്നവര്‍ക്ക് തുടര്‍ന്ന് തൊഴില്‍ രഹിത വേതനം ലഭിക്കുന്നതല്ല.

വായ്പ്പ ലഭിക്കുന്നവര്‍ ആരഭിച്ച സംരംഭവും വായ്പ്പ തിരിച്ചടവും നല്ല രീതിയില്‍ നടത്തികൊണ്ടു പോകാമെന്ന ഉറപ്പില്‍ അവരെ എംപ്ലോയ്മെന്‍റ് എക്സ്ചേഞ് വഴിയുള്ള താത്കാലികവും സ്ഥിരവുമായ ഒഴിവുകള്‍ക്ക് പരിഗണിക്കുന്നതാണ്.