ഫിക്സ‍ഡ് ഡിപ്പോസിറ്റിന് പലിശ കൂട്ടി; ഏറ്റവും കൂടുതൽ പലിശ ലഭിക്കുന്നത് ഈ ബാങ്കുകളിൽ

ഇന്ത്യയിൽ ഏറ്റവും കൂടുതൽ ആളുകൾ പണം നിക്ഷേപിക്കുന്നത് ഫിക്സഡ് ഡിപ്പോസിറ്റിലാണ്. സുരക്ഷിതത്വവും മറ്റ് നിക്ഷേപങ്ങളെ അപേക്ഷിച്ച് ലഭിക്കുന്ന മികച്ച പലിശ നിരക്കുമാണ് ഇതിന് കാരണം. മുൻനിര പൊതുമേഖലാ ബാങ്കുകളും സ്വകാര്യ ബാങ്കുകളും അടക്കം അടുത്തിടെ ഫിക്സഡ് ഡിപ്പോസിറ്റ് (എഫ്ഡി) പലിശ നിരക്കുകളിൽ മാറ്റം വരുത്തിയിരുന്നു. ഇതനുസരിച്ചുള്ള വിവിധ ബാങ്കുകളുടെ എഫ്ഡി പലിശ നിരക്കുകൾ പരിശോധിക്കാം.

ആക്സിസ് ബാങ്ക്

ഫെബ്രുവരി 27 മുതലാണ് ആക്സിസ് ബാങ്ക് എഫ്ഡി പലിശ നിരക്കുകളിൽ മാറ്റം വരുത്തിയത്. രണ്ട് വർഷം മുതൽ 30 മാസം വരെയുള്ള എഫ്ഡി നിക്ഷേപത്തിന് 7.50 ശതമാനം പലിശ നിരക്കാണ് ബാങ്ക് വാഗ്ദാനം ചെയ്യുന്നത്. സീനിയർ സിറ്റിസൺസിന് ഈ കാലാവധിയിലുള്ള നിക്ഷേപത്തിന് 8.15 ശതമാനം വരെ പലിശ ലഭിക്കും.

ഐസിഐസിഐ ബാങ്ക്

ഐസിഐസിഐ ബാങ്ക് മാർച്ച് 7 മുതലാണ് പലിശ നിരക്ക് പരിഷ്കരിച്ചത്. രണ്ട് വർഷം മുതൽ 3 വർഷം വരെയുള്ള നിക്ഷേപത്തിന് 7.50 ശതമാനവും സീനിയർ സിറ്റിസൺസിന് 8 ശതമാനവും പലിശയാണ് ബാങ്ക് നൽകുന്നത്.

എച്ച്ഡിഎഫ്സി ബാങ്ക്

എച്ച്ഡിഎഫ്സി ബാങ്കിന്റെ പുതുക്കിയ എഫ്ഡി പലിശ നിരക്കും മാർച്ച് 7 മുതലാണ് പ്രാബല്യത്തിൽ വന്നത്. രണ്ട് മുതൽ 3 വർഷം വരെ കാലാവധിയുള്ള നിക്ഷേപത്തിന് 7.40 ശതമാനവും സീനിയർ സിറ്റിസൺസിന് 7.90 ശതമാനവുമാണ് പലിശ.

കൊട്ടക് മഹീന്ദ്ര

കൊട്ടക് മഹീന്ദ്ര ബാങ്ക് മാർച്ച് 5ന് പ്രഖ്യാപിച്ച പുതിയ നിരക്ക് അനുസരിച്ച് 7.30 ശതമാനം പലിശ സാധാരണ നിക്ഷേപത്തിനും സീനിയർ സിറ്റിസൺ നിക്ഷേപത്തിന് 7.80 ശതമാനം പലിശ നിരക്കുമാണ് ലഭിക്കുക. 365 ദിവസം മുതൽ 699 ദിവസം വരെയുള്ള നിക്ഷേപങ്ങൾക്കാണ് ഈ നിരക്ക് ബാധകമാകുന്നത്.

യെസ് ബാങ്ക്

ഒരു വർഷം മുതൽ 10 വർഷം വരെയുള്ള നിക്ഷേപങ്ങൾക്ക് 7.25 ശതമാനം പലിശയാണ് യെസ് ബാങ്ക് നൽകുന്നത്. സീനിയർ സിറ്റിസൺസിന് ഇതേ കാലാവധിയിലുള്ള നിക്ഷേപത്തിന് 7.75 ശതമാനം വരെയാണ് പലിശ ലഭിക്കുക. മാർച്ച് 2 മുതലാണ് ഈ നിരക്ക് പ്രാബല്യത്തിൽ വന്നത്.

എസ്ബിഐ

നിലവിൽ എഫ്ഡിയ്ക്ക് ഏറ്റവും കുറവ് പലിശ ലഭിക്കുന്നത് സ്റ്റേറ്റ് ബാങ്ക് ഓഫ് ഇന്ത്യയിൽ നിന്നാണ്. 6.85 ശതമാനം മാത്രമാണ് 5 വർഷം മുതൽ 10 വർഷം വരെ കാലാവധിയുള്ള നിക്ഷേപത്തിന് ലഭിക്കുന്ന പലിശ. എന്നാൽ സീനിയർ സിറ്റിസൺസിന് 7.35 ശതമാനം പലിശ ലഭിക്കും. ഫെബ്രുവരി 22 മുതലാണ് എസ്ബിഐ പലിശ നിരക്കുകൾ പരിഷ്കരിച്ചത്.

malayalam.goodreturns.in