ഫിക്സഡ് ഡിപ്പോസിറ്റിൽ നിന്ന് നേട്ടമുണ്ടാക്കേണ്ടത് ഇങ്ങനെ; നിങ്ങൾക്കറിയാത്ത ചില നിക്ഷേപ രഹസ്യങ്ങൾ

ഈ വർഷം ഫിക്സഡ് ഡിപ്പോസിറ്റുകളുടെ പലിശ നിരക്ക് റിസർവ് ബാങ്ക് ഓഫ് ഇന്ത്യ കുറച്ചിരുന്നു. ഏപ്രിലിൽ വീണ്ടും പലിശ കുറയാനുള്ള സാധ്യതകളുമുണ്ട്. എന്നിരുന്നാലും ഫിക്സഡ് ഡിപ്പോസിറ്റുകളിൽ നിന്ന് നേട്ടമുണ്ടാക്കാം, നിക്ഷേപം നടത്തും മുമ്പ് ചില കാര്യങ്ങൾ ശ്രദ്ധിക്കണമെന്ന് മാത്രം. എഫ്ഡികളിൽ നിന്ന് മികച്ച വരുമാനം നേടുന്നതിനുള്ള ചില ടിപ്സ് ഇതാ..

എഫ്ഡി ഓൺലൈനായി തുറക്കുക

ചില കമ്പനികൾ ഫിക്സഡ് ഡിപ്പോസിറ്റുകൾ ഓൺലൈൻ ആയി തുറക്കുകയാണെങ്കിൽ കൂടുതൽ പലിശ നൽകും. കാരണം ഓൺലൈൻ ആയി എഫ്ഡി ഓപ്പൺ ചെയ്യുന്നത് വഴി കമ്പനികൾക്ക് പേപ്പർ വർക്കുകളും കമ്മീഷനുകളും ലാഭിക്കാനാകും.

മഹീന്ദ്ര ഫിനാൻസ്

എഫ്ഡി ഓൺലൈൻ ആയി തുറക്കുന്നത് വഴി ലാഭം കിട്ടുന്നതിന് ഉദാഹരണമാണ് മഹീന്ദ്ര ഫിനാൻസ്. മഹീന്ദ്ര ഫിനാൻസിൽ ഓൺലൈനായി നിങ്ങൾക്ക് അക്കൗണ്ട് തുറക്കുകയാണെങ്കിൽ, നിങ്ങൾക്ക് ലഭിക്കുന്ന പലിശ നിരക്ക് 9 ശതമാനമാണ്. നേരിട്ട് സ്ഥാപനത്തിലെത്തിയാണ് നിക്ഷേപം നടത്തുന്നതെങ്കിൽ പലിശ 8.75 ശതമാനമായി കുറയും.

സ്മോൾ ഫിനാൻസ് ബാങ്ക്

വലിയ ബാങ്കുകളിൽ നിക്ഷേപം നടത്തുന്നതിനേക്കാൾ എന്തുകൊണ്ടും ലാഭകരമാണ് സ്മോൾ ഫിനാൻസ് ബാങ്കുകളിൽ ഫിക്സഡ് ഡിപ്പോസിറ്റ് നിക്ഷേപം നടത്തുന്നത്. ഉദാഹരണത്തിന്, ജനാ സ്മോൾ ഫിനാൻസ് ബാങ്ക് ഫിക്സഡ് ഡിപ്പോസിറ്റുകൾക്ക് നൽകുന്ന പലിശ നിരക്ക് ഒമ്പത് ശതമാനം വരെയാണ്. എസ്ബിഐ പോലുള്ള ബാങ്കുകൾ ഫിക്സഡ് ഡിപ്പോസിറ്റുകൾക്ക് പരമാവധി 7.5 ശതമാനം പലിശ നൽകുമ്പോൾ സ്മോൾ ഫിനാൻസ് ബാങ്കുകൾക്ക് 8.5 മുതൽ 9.25 ശതമാനം വരെ പലിശ നിരക്കാണ് വാ​ഗ്ദാനം ചെയ്യുന്നത്.

സ്മോൾ ഫിനാൻസ് ബാങ്കുകൾ വിശ്വാസ യോ​ഗ്യമാണോ?

രാജ്യത്തെ പ്രമുഖ സ്മോൾ ഫിനാൻസ് ബാങ്കുകൾ എല്ലാം തന്നെ റിസർവ് ബാങ്കിന്റെ നിയന്ത്രണത്തിലാണ്. അതുകൊണ്ടു തന്നെ ഇവിടെ പണം നിക്ഷേപിക്കുന്നത് സുരക്ഷിതമായി പരിഗണിക്കാം. എന്നിരുന്നാലും, ചെറിയ തുക നിക്ഷേപിക്കുന്നതാണ് ബുദ്ധിപരമായ തീരുമാനം.

ഫോം 15ജി/ ഫോം 15എച്ച്

നിങ്ങളുടെ ബാങ്ക് ഫിക്സഡ് ഡിപ്പോസിറ്റുകളിൽ നിന്ന് ഒരു സാമ്പത്തിക വർഷത്തിൽ 10,000 രൂപയിലധികം വരുമാനമുണ്ടെങ്കിൽ ആ വരുമാനത്തിൽ നിന്ന് നികുതി ഈടാക്കും. എന്നാൽ ഇതിൽ താഴെയാണ് വരുമാനമെങ്കിൽ ഫോം 15 ജി / ഫോം 15 എച്ച് എന്നിവ ബാങ്കിൽ സമർപ്പിക്കുന്നതിലൂടെ നികുതിയിൽ നിന്ന് രക്ഷപ്പെടാം.ഫോം 15 എച്ച് അറുപതു വയസ്സിന് മുകളിലുള്ളവർക്കും ഫോം 15G മൊത്തം വരുമാനം പരമാവധി തുകയിൽ കവിയാത്തവർക്കുമുള്ളതാണ്.

കാലാവധിക്ക് മുമ്പ് പിൻവലിക്കരുത്

കാലാവധിയ്ക്ക് മുമ്പ് എഫ്ഡിയിൽ നിന്ന് പണം പിൻവലിക്കരുത്. കാരണം ഇങ്ങനെ പണം പിൻവലിച്ചാൽ ബാങ്കുകൾ നിങ്ങളിൽ നിന്ന് പിഴ ഈടാക്കും. സാധാരണ​ഗതിയിൽ നിക്ഷേപത്തിന്റെ ഒരു ശതമാനമാണ് പിഴ ഈടാക്കുക.

എമർജൻസി ഫണ്ട്

എമർജൻസി ഫണ്ട് എന്ന നിലയിൽ ചെറിയ തുകകൾ എഫ്ഡിയായി നിക്ഷേപിക്കാവുന്നതാണ്. അതായത് നിങ്ങൾക്ക് 10 ലക്ഷം രൂപയുടെ എഫ്ഡിക്ക് ഒപ്പം ഒരു ലക്ഷം രൂപയുടെ മറ്റൊരു എഫ്ഡിയും ഉണ്ടെന്ന് കരുതുക. ചെറിയ തുകയുടെ ആവശ്യങ്ങൾക്ക് ഒരു ലക്ഷം രൂപയുടെ എഫ്ഡി പിൻവലിക്കാവുന്നതാണ്. ഇങ്ങനെ ചെയ്യുന്നത് വഴി ഒരു ലക്ഷം രൂപയുടെ ആവശ്യത്തിന് 10 ലക്ഷം രൂപയുടെ എഫ്ഡി പിൻവലിക്കേണ്ട ആവശ്യം വരുന്നില്ല.

malayalam.goodreturns.in