കാശിന് അത്യാവശ്യമുണ്ടോ? ഇക്കാര്യങ്ങൾക്ക് ആണെങ്കിൽ പിഎഫ് തുക പിൻവലിക്കാം

ഇപിഎഫ് അല്ലെങ്കിൽ എംപ്ലോയീസ് പ്രൊവിഡന്റ് ഫണ്ട്, ശമ്പളക്കാരായ വ്യക്തികളെ ലക്ഷ്യമിട്ടുള്ള ഗവൺമെന്റിന്റെ പെൻഷൻ പദ്ധതിയാണ്. കാലാവധി പൂർത്തിയാകുന്നതിന് മുമ്പ് പിഎഫിൽ നിന്ന് പണം പിൻവലിക്കുന്നത് അത്ര എളുപ്പമുള്ള കാര്യമല്ല. എന്നാൽ ചില പ്രത്യേക സാഹചര്യങ്ങളിൽ പിഎഫിലുള്ള മുഴുവൻ തുകയും പിൻവലിക്കാനുള്ള അവസരവും ഇപിഎഫ്ഒ നൽകും. അവ എന്തൊക്കെയാണെന്ന് നോക്കാം.

വിവാഹം

ചില വ്യവസ്ഥകൾ പ്രകാരം സ്വന്തം വിവാഹം, മകൻ അല്ലെങ്കിൽ മകളുടെ വിവാഹം, സഹോദരൻ അല്ലെങ്കിൽ സഹോദരിയുടെ വിവാഹ ആവശ്യങ്ങൾക്ക് ഇപിഎഫ് അക്കൗണ്ടിൽ നിന്നും പണം പിൻവലിക്കാം. ജീവനക്കാരുടെ വിഹിതത്തിൽ നിന്ന് അമ്പത് ശതമാനം വരെ തുകയാണ് ഇത്തരത്തിൽ പിൻവലിക്കാൻ സാധിക്കുക. ഏഴു വർഷത്തെ സേവനം പൂർത്തിയാക്കിയ ഇപിഎഫ് വരിക്കാരന് മാത്രമേ ഈ അവസരം ലഭിക്കുകയുള്ളൂ. അർഹരായവർക്ക് മൂന്ന് തവണ പണം പിൻവലിക്കുകയും ചെയ്യാം.

വിദ്യാഭ്യാസം

ഇപിഎഫ്ഒയുടെ വെബ്സൈറ്റിൽ നൽകിയിരിക്കുന്ന വിവരം അനുസരിച്ച് മക്കളുടെ പോസ്റ്റ് മെട്രിക്കുലേഷൻ വിദ്യാഭ്യാസത്തിന് വേണ്ടിയും വരിക്കാർക്ക് പരമാവധി മൂന്ന് തവണ പണം പിൻവലിക്കാം. ഏഴു വർഷത്തെ സേവനം പൂർത്തിയാക്കിയ ഇപിഎഫ് വരിക്കാരന് 50 ശതമാനം തുകയാണ് പിൻവലിക്കാനാകുക.

വീട് വാങ്ങാൻ

അഞ്ചു വർഷത്തെ സേവനം പൂർത്തിയാക്കിയ ഇപിഎഫ് അംഗങ്ങൾക്ക് ചില വ്യവസ്ഥകൾ പ്രകാരം വീടോ ഫ്ലാറ്റോ വാങ്ങുന്നതിനോ പിഎഫിൽ നിന്ന് പണം പിൻവലിക്കാം. 24 മാസത്തെ അടിസ്ഥാന വേതനവും ഡിയർനെസ് അലവൻസും, ജീവനക്കാരും തൊഴിലുടമയുടേയും ഷെയറുകളുമാണ് ഇത്തരത്തിൽ പിൻവലിക്കാനാകുന്നത്.

ഭവന വായ്പ തിരിച്ചടയ്ക്കാൻ

10 വർഷത്തെ സേവനം പൂർത്തിയാക്കിയ പ്രൊവിഡന്റ് ഫണ്ട് വരിക്കാർക്ക് ഭവന വായ്പ തിരിച്ചടയ്ക്കാൻ പിഎഫിൽ നിന്ന് പണം പിൻവലിക്കാവുന്നതാണ്. ഇത്തരം കേസുകളിൽ കുറഞ്ഞത് 36 മാസത്തെ അടിസ്ഥാന വേതനവും ഡിയർനെസ് അലവൻസും, ജീവനക്കാരുടെയും തൊഴിലുടമയുടെയും ഷെയറുമാണ് പിൻവലിക്കാനാകുന്നത്.

പലിശ നിരക്ക്

2019 മാർച്ചിൽ അവസാനിക്കുന്ന ഈ സാമ്പത്തിക വർഷത്തിൽ, ഇപിഎഫ് നിക്ഷേപത്തിന് 8.65 ശതമാനം പലിശയാണ് ലഭിക്കുന്നത്. കഴിഞ്ഞ വർഷം 8.55 ശതമാനമായിരുന്നു പലിശ നിരക്ക്.

malayalam.goodreturns.in