ജോലി ആണോ നിങ്ങളുടെ പ്രശ്നം? പണി കിട്ടാൻ എളുപ്പം ഈ മേഖലകളിൽ

ജോലി തിരയുന്ന ചെറുപ്പക്കാർക്ക് ഇതാ ഒരു സന്തോഷ വാർത്ത. ഈ വർഷം ഏറ്റവും കൂടുതൽ തൊഴിൽ സാധ്യതകളുള്ളത് ഈ മേഖലയിലുള്ളവർക്കാണ്. 2019ലെ ഇന്ത്യ സ്കിൽ റിപ്പോർട്ട് അനുസരിച്ചുള്ള വിവരങ്ങളാണ് താഴെ പറയുന്നത്.

ജോലി കിട്ടാൻ എളുപ്പം ഈ സ്ഥലങ്ങളിൽ

ജോലി അന്വേഷിക്കുന്ന ചെറുപ്പക്കാർ ധാരാളമുള്ള സംസ്ഥാനമാണ് നമ്മുടേത്. എന്നാൽ ഏറ്റവും കൂടുതൽ തൊഴിൽ സാധ്യതയുള്ള സംസ്ഥാനങ്ങളുടെ ലിസ്റ്റിൽ കേരളം അത്ര മുന്നിnല്ല. അതുകൊണ്ട് തന്നെ ജോലി തേടുന്നവർ അന്യ സംസ്ഥാനങ്ങൾ കൂടി പരിഗണിക്കേണ്ടതാണ്. ഇന്ത്യയിൽ ഏറ്റവും കൂടുതൽ ജോലി സാധ്യതയുള്ള മൂന്ന് സ്ഥലങ്ങൾ ഡൽഹി, കർണാടക, മഹാരാഷ്ട്ര എന്നിവിടങ്ങളാണ്.

നിങ്ങളുടെ യോ​ഗ്യത ഇവയാണോ?

നിങ്ങളുടെ വിദ്യാഭ്യാസ യോഗ്യത താഴെ പറയുന്നവയാണോ? എങ്കിൽ ജോലി ലഭിക്കാനുള്ള സാധ്യതകൾ ഏറെയാണ്. ബി.ഇ/ബി.ടെക് ബിരുദക്കാർക്ക് 57.1% ജോലി സാധ്യതയാണ് സ‍ർവ്വേ റിപ്പോർട്ടിൽ പറയുന്നത്. ബിഎസ്.സിക്കാർക്ക് 47.4 ശതമാനവവും എംസിഎക്കാർക്ക് 43.2 ശതമാനവുമാണ് ജോലി സാധ്യത. എം.ബി.എ ബിരുദക്കാർക്ക് 36.4 ശതമാനവും ബി.ഫാർമ പഠിച്ചവർക്ക് 36.3 ശതമാനവും ജോലി ലഭിക്കും. ബി.കോം ബിരുദക്കാർക്ക് 30.1 ശതമാനം ‍തൊഴിൽ സാധ്യതയും റിപ്പോർട്ടിൽ പറയുന്നുണ്ട്.

ഈ വ‍‍ർഷത്തെ നേട്ടങ്ങൾ

2018നെ അപേക്ഷിച്ച് ഈ വർഷമാണ് ജോലി കിട്ടാൻ സാധ്യതകളേറെയുള്ളത്. 2018ൽ 10 ശതമാനം പേരെയാണ് കമ്പനികൾ പുതുതായി തിരഞ്ഞെടുത്തിരുന്നതെങ്കിൽ ഈ വ‍ർഷം അത് 15 ശതനമാനമായി ഉയർന്നു. അതുപോലെ കഴിഞ്ഞ വർഷം ബാങ്കിം​ഗ്, ഫിനാൻസ്, ഇൻഷുറൻസ്, റീട്ടെയിൽ മേഖലകളിലാണ് ഏറ്റവും കൂടുതൽ തൊഴിലവസരങ്ങൾ ഉണ്ടായിരുന്നത്. എന്നാൽ ഇപ്പോൾ ഈ മേഖലകൾ കൂടാതെ സോഫ്റ്റ്‍വെയർ, ഹാർഡ്‍വെയർ‌, നിർമ്മാണ മേഖലകളിലും തൊഴിൽ സാധ്യതകളുണ്ട്.

സ്ത്രീകൾക്കും നേട്ടം

2018ൽ 46.8 ശതമാനം പുരുഷന്മാർക്കും 38.1 ശതമാനം സ്ത്രീകൾക്കുമാണ് ജോലി ലഭിച്ചിരുന്നത്. എന്നാൽ വർഷം ജോലി സാധ്യത പുരുഷന്മാർക്ക് 47.4 ശതമാനമായും സ്ത്രീകൾ 45.6 ശതമാനമായും ഉയർന്നിട്ടുണ്ട്. സ്ത്രീകളെ സംബന്ധിച്ച് ഇത് ഒരു മികച്ച നേട്ടം തന്നെയാണ്.

malayalam.goodreturns.in