ഐസിഐസിഐ ബാങ്കിലാണോ നിങ്ങളുടെ നിക്ഷേപം? പുതിയ പലിശ നിരക്കുകൾ ഇങ്ങനെ

സ്വകാര്യ മേഖലാ ബാങ്കായ ഐസിഐസിഐ ബാങ്ക് സ്ഥിര നിക്ഷേപ പലിശ നിരക്കുകൾ പുതുക്കി. റിസർവ് ബാങ്ക് ഈ വർഷം നാലാം തവണയും പലിശ നിരക്ക് കുറച്ചതിന് പിന്നാലെയാണ് ഐസിഐസിഐ ബാങ്കും എഫ്ഡി പലിശ നിരക്കിൽ കുറവ് വരുത്തിയിരിക്കുന്നത്. 7 ദിവസം മുതൽ 10 വർഷം വരെ കാലാവധികളിലുള്ള നിക്ഷേപങ്ങളുടെ പലിശ നിരക്കാണ് ബാങ്ക് കുറച്ചിരിക്കുന്നത്. മുതിർന്ന പൗരന്മാർക്ക് സാധാരണ ലഭിക്കുന്നതിനേക്കാൾ 50 ബേസിസ് പോയിന്റ് ഉയർന്ന പലിശ നിരക്കും ലഭിക്കും.

കുറഞ്ഞ കാലാവധി

പുതുക്കിയ നിരക്ക് അനുസരിച്ച് 7 ദിവസത്തിനും 14 ദിവസത്തിനുമിടയിലുള്ള ഹ്രസ്വകാല നിക്ഷേപത്തിന് ബാങ്ക് 4% പലിശനിരക്ക് വാഗ്ദാനം ചെയ്യുന്നു. കാലാവധി കൂടുന്നതിനനുസരിച്ച് എഫ്ഡികളുടെ പലിശ നിരക്കും വർദ്ധിക്കുന്നു. 15 ദിവസം മുതൽ 29 ദിവസം വരെ കാലാവധിയിലുള്ള എഫ്ഡികൾക്ക് ബാങ്ക് 4.25% പലിശയാണ് വാഗ്ദാനം ചെയ്യുന്നത്. 30 ദിവസം മുതൽ 45 ദിവസം വരെയുള്ള നിക്ഷേപത്തിന് 5.25% പലിശയും ലഭിക്കും.

ഒരു വർഷത്തിന് താഴെയുള്ള നിക്ഷേപം

ഒരു വർഷത്തിന് താഴെയുള്ള മറ്റ് കാലാവധികളിലെ നിക്ഷേപങ്ങളും പലിശ നിരക്കുകളും താഴെ പറയുന്നു.

• 46 ദിവസം മുതൽ 60 ദിവസം വരെ - 5.75%
• 61 ദിവസം മുതൽ 90 ദിവസം വരെ - 5.75%
• 91 ദിവസം മുതൽ 120 ദിവസം വരെ - 5.75%
• 185 ദിവസം മുതൽ 289 ദിവസം വരെ - 6.25%
• 290 ദിവസം മുതൽ 1 വർഷം വരെ - 6.50%

ഒരു വർഷത്തിന് മുകളിലുള്ള നിക്ഷേപം

ഒരു വർഷത്തിന് മുകളിലുള്ള നിക്ഷേപത്തിന് ലഭിക്കുന്ന പലിശ നിരക്കുകൾ താഴെ പറയുന്ന രീതിയിലാണ്.

• ഒരു വർഷം മുതൽ 389 ദിവസം വരെ - 6.70%
• 390 ദിവസം മുതൽ 18 മാസം വരെ - 6.80%
• 18 മാസം മുതൽ 2 വർഷം വരെ - 7.10%
• 2 വർഷവും ഒരു ദിവസവും മുതൽ 3 വർഷം വരെ - 7.10%
• 3 വർഷവും ഒരു ദിവസവും മുതൽ 5 വർഷം വരെ - 7.00%
• 5 വർഷവും ഒരു ദിവസവും മുതൽ 10 വർഷം വരെ - 7.00%

ആർബിഐ റിപ്പോ നിരക്ക്

തുടർച്ചയായ നാലാം തവണയാണ് ഇത്തവണ ആർബിഐ റിപ്പോ നിരക്ക് കുറച്ചത്. 35 ബേസിസ് പോയിന്റ് ഇത്തവണ കുറച്ചതോടെ പലിശ നിരക്ക് 5.75 ശതമാനത്തിൽ നിന്ന് 5.4 ശതമാനമായി കുറഞ്ഞു. റിവേഴ്സ് റിപ്പോ 5.15 ശതമാനമായും കുറച്ചിരുന്നു. 8 മാസത്തെ ഇടവേളയ്ക്കുശേഷം ഫെബ്രുവരിയിലാണ് ഈ വർഷം ആദ്യം റിപ്പോ നിരക്ക് കാല്‍ ശതമാനം കുറച്ചത്. അതിനു ശേഷം ഏപ്രിലിൽ നടന്ന വായ്പാനയ പ്രഖ്യാപനത്തിലും പലിശ നിരക്ക് 25 ബേസിസ് പോയിന്റ് കുറച്ചു. പിന്നീട് ജൂണിൽ മൂന്നാം തവണയും പലിശ നിരക്ക് 25 ബേസിസ് പോയിന്റ് തന്നെ കുറയ്ക്കുകയായിരുന്നു.

malayalam.goodreturns.in