മാസം 210 രൂപ എടുക്കാനുണ്ടോ? എങ്കിൽ നിങ്ങൾക്കും നേടാം വർഷം 60000 രൂപ പെൻഷൻ

ദേശീയ പെൻഷൻ പദ്ധതി മുതൽ അടൽ പെൻഷൻ യോജന വരെ, പ്രായമായവർക്കും അർഹതയുള്ളവർക്കും സർക്കാർ നിരവധി പെൻഷൻ പദ്ധതികൾ ആരംഭിച്ചിട്ടുണ്ട്. എൻ‌പി‌എസിനൊപ്പം തന്നെ, ഇന്ത്യക്കാർക്കിടയിൽ ഏറ്റവും പ്രചാരമുള്ള പെൻഷൻ നിക്ഷേപ ഉപകരണങ്ങളിലൊന്നാണ് അടൽ പെൻഷൻ യോജന. അസംഘടിത മേഖലയിൽ ജോലി ചെയ്യുന്ന ആളുകൾക്ക് അതായത് ഡെലിവറി ബോയ്സ്, വീട്ടുജോലിക്കാർ, മുതലായവർക്ക് സാമ്പത്തിക സുരക്ഷ ഉറപ്പാക്കുന്ന പെൻഷൻ പദ്ധതിയാണിത്.

പെൻഷൻ തുക

സംഭാവനയെയും കാലയളവിനെയും ആശ്രയിച്ച് ഉപഭോക്താക്കൾക്ക് 1,000 മുതൽ 5,000 രൂപ വരെ മാസം പെൻഷൻ നൽകുന്നതിനാണ് ഈ സാമൂഹിക സുരക്ഷാ പദ്ധതി ആരംഭിച്ചത്. ഈ സ്കീം അനുസരിച്ച് വെറും 42 രൂപയുടെ നിക്ഷേപം നടത്തുന്ന വരിക്കാരന് പ്രതിമാസ പെൻഷൻ 1,000 രൂപയും പ്രതിമാസം 210 രൂപ നിക്ഷേപം നടത്തുന്നവർക്ക് വർഷം 60,000 രൂപ വരെ പെൻഷൻ നേടാനും കഴിയും.

സുരക്ഷിതം

പെൻഷൻ ഫണ്ട് റെഗുലേറ്ററി ആൻഡ് ഡവലപ്മെൻറ് അതോറിറ്റി (പി‌എഫ്‌ആർ‌ഡി‌എ) നിയന്ത്രിക്കുന്നതിനാൽ ഈ സ്കീം വളരെ സുരക്ഷിതമാണ്. പദ്ധതിയ്ക്ക് കീഴിൽ, ഒരു വ്യക്തിക്ക് അവരുടെ വിരമിക്കൽ പ്രായത്തിന് ശേഷം സ്ഥിരമായി പ്രതിമാസ പെൻഷൻ ഉറപ്പുനൽകുന്നു. 18 വയസ് മുതൽ 40 വയസ്സ് വരെയുള്ള ഏതൊരു ഇന്ത്യൻ പൗരനും ഈ പദ്ധതിയിൽ അം​ഗങ്ങളാകാം. പ്രതിമാസം, ത്രൈമാസ, അർദ്ധ വാർഷികം എന്നിങ്ങനെ മൂന്ന് രീതികളിലൂടെ ഒരാൾക്ക് അവരുടെ അടൽ പെൻഷൻ പദ്ധതിയിൽ സംഭാവന നൽകാം.

കാലാവധിയും നിക്ഷേപവും

പ്രതിമാസം 1,000 മുതൽ 5,000 രൂപ വരെ നിശ്ചിത പ്രതിമാസ പെൻഷൻ ലഭിക്കുന്നതിന്, വരിക്കാരൻ 18 വയസിൽ പദ്ധതിയിൽ ചേരണം. വരിക്കാരൻ 40-ാം വയസിലാണ് പദ്ധതിയിൽ ചേരുന്നതെങ്കിൽ സംഭാവന പ്രതിമാസം 291 മുതൽ 1,454 രൂപ വരെ ഉയരും. കാലാവധിയ്ക്കും നിക്ഷേപ തുകയ്ക്കും അനുസരിച്ച് പെൻഷൻ തുക വ്യത്യാസപ്പെടാം.

പ്രായം പ്രധാന ഘടകം

പ്രതിമാസം 5,000 രൂപ പെൻഷൻ തുകയ്ക്കായി നിങ്ങൾ 35 വയസ്സിൽ ചേരുകയാണെങ്കിൽ, 25 വർഷത്തേക്ക് ഓരോ 6 മാസത്തിലും 5,323 രൂപ നിക്ഷേപിക്കണം. ഈ സാഹചര്യത്തിൽ, നിങ്ങളുടെ മൊത്തം നിക്ഷേപം 2.66 ലക്ഷം രൂപയും നിങ്ങൾക്ക് പ്രതിമാസം 5,000 രൂപ പെൻഷനും ലഭിക്കും. എന്നാൽ നിങ്ങൾ 18ാ-മത്തെ വയസ്സിൽ പദ്ധതിയിൽ ചേരുകയാണെങ്കിൽ, നിങ്ങളുടെ മൊത്തം നിക്ഷേപം 1.04 ലക്ഷം രൂപ മാത്രമായിരിക്കും. ഇതിനർത്ഥം നിങ്ങൾ വൈകി ചേരുകയാണെങ്കിൽ ഏകദേശം 1.60 ലക്ഷം രൂപ കൂടി പെൻഷൻ തുകയ്ക്കായി നിക്ഷേപിക്കേണ്ടി വരും.

20 വർഷം

ഒരു വ്യക്തി 40-ാമത്തെ വയസ്സിലാണ് അടൽ പെൻഷൻ പദ്ധതിയിൽ ചേരുന്നതെങ്കിൽ പെൻഷൻ ലഭിക്കുന്നതിന് അവർ കുറഞ്ഞത് 20 വർഷത്തേക്ക് പ്രീമിയം അടയ്‌ക്കേണ്ടതുണ്ട്.

malayalam.goodreturns.in