പേഴ്സണൽ ലോൺ എടുക്കും മുമ്പ് ശ്രദ്ധിക്കുക! ഈ 5 വ്യവസ്ഥകൾ അറിയാതെ പോയാൽ പണി കിട്ടും

വ്യക്തി​ഗത വായ്പകൾ എടുക്കാൻ പ്ലാനുണ്ടോ? എങ്കിൽ വെറുതേ എടുത്തിട്ട് കാര്യമില്ല. വ്യക്തി​ഗത വായ്പക്ക് അപേക്ഷിക്കുന്നതിനു മുന്നേ മറ്റു ചില കാര്യങ്ങളെ കുറിച്ച് അറിഞ്ഞിരിക്കേണ്ടതുണ്ട്. വായ്പ എടുക്കുമ്പോൾ അത് നിങ്ങൾക്ക് താങ്ങാനാവുന്ന വിലയാണോ എന്നതും, അതിൻ്റെ തിരിച്ചടവ് കാലാവധിയുമെല്ലാം ഏറെ പ്രധാനപ്പെട്ടതാണ്. വായ്പ എടുക്കുന്നത് കടം സൃഷ്ടിക്കാൻ വേണ്ടിയല്ല എന്നത് എപ്പോഴും ഓർക്കുന്നത് നല്ലതാണ്. വ്യക്തി​ഗത വായ്പയിലേക്ക് എടുത്തു ചാടുന്നതിനു മുന്നേ ശ്രദ്ധിക്കേണ്ട ചില കാര്യങ്ങൾ അറിഞ്ഞിരിക്കാം.

1. വായ്പാ വിവരങ്ങളും അനുബന്ധ നിബന്ധനകളും മനസ്സിലാക്കുക

വ്യക്തി​ഗത വായ്പക്ക് അപേക്ഷിക്കുന്നതിനു മുന്നേ വായ്പാ തുകയെ കുറിച്ച് മനസിലാക്കുക. അമിതമായി വായ്പ എടുക്കുന്നത് ഒഴിവാക്കാൻ നിങ്ങളുടെ ആവശ്യകതകൾ തിരിച്ചറിയുന്നതും നല്ലതാണ്.

വായ്പക്ക് ഈടാക്കുന്ന പലിശ നിരക്കുകളും മറ്റു ചാർജുകളും അറിഞ്ഞിരിക്കാം. കാരണം അമിതമായ പലിശ നിരക്ക് ഈടാക്കുന്നുണ്ടോ, അതോ മറ്റു ഫീസുകളോ അമിതമായി പ്രോസസ്സിംഗ് ചാർജുകളോ ഈടാക്കുന്നുണ്ടോ എന്ന് തിരിച്ചറിയുന്നത് നല്ലതാണ്. ഇല്ലെങ്കിൽ നിങ്ങളുടെ കൈയിൽ നിന്നും അധികം പണം നഷ്ടമായേക്കും.

തിരിച്ചടവ് കാലാവധിയെ കുറിച്ചും മറ്റും അറിയണം. ഇഎംഐ തുകകൾ, മൊത്തം തിരിച്ചടവ് കാലാവധി, മുൻകൂർ തിരിച്ചടവ് പിഴകൾ, സാമ്പത്തിക ബുദ്ധിമുട്ടുകൾ ഉണ്ടായാൽ തിരിച്ചടവ് കാലാവധി നീട്ടാനുള്ള സാധ്യത, അവസാന തീയതികൾ എന്നിവ ശ്രദ്ധാപൂർവ്വം അവലോകനം ചെയ്യുക. ഈ കാര്യങ്ങളെല്ലാം കൃത്യമായി മനസിലാക്കിയ ശേഷം മാത്രം ഒരു വ്യക്തി​ഗത വായ്പ തിരഞ്ഞെടുക്കുക.

2. ബാധകമായ നിരക്കുകൾ പരിശോധിക്കുക

മൊത്തം ലോൺ തുകയുടെ ഏകദേശം 1-3% വരെ പ്രോസസ്സിം​ഗ് ഫീസ് ഈടാക്കിയേക്കാം. നിങ്ങൾ അപേക്ഷിക്കുന്ന വ്യക്തിഗത വായ്പയുടെ മൊത്തം പ്രോസസ്സിംഗ് ഫീസുകളെക്കുറിച്ച് വിശദമായി പരിശോധിക്കുക.

ഇഎംഐ തുക അടയ്ക്കാൻ കഴിയാതെ വരുമ്പോഴോ വൈകിയാലോ അമിതമായ ചാർജ് ഈടാക്കും. ഈ ചാർജുകൾ സാധാരണയായി 500 രൂപ മുതൽ 1,000 രൂപ വരെയാണ്. തുടർന്നും തിരിച്ചടവ് വൈകിയാൽ ഈ ചാർജുകളും വർദ്ധിക്കും.

3. വ്യക്തിഗത വായ്പാ കാലാവധിയും ആകെ ചെലവും

ദീർഘമായ വായ്പ തിരിച്ചടവ് കാലാവധി തീർച്ചയായും EMI വലുപ്പം കുറയ്ക്കും. എന്നിരുന്നാലും, അവ കടം വാങ്ങുന്നയാൾ നൽകുന്ന മൊത്തം പലിശ വർദ്ധിപ്പിക്കുന്നു. അതുകൊണ്ടാണ് തിരിച്ചടവ് കാലയളവ് തിരഞ്ഞെടുക്കുമ്പോൾ നിങ്ങൾ വളരെ ശ്രദ്ധിക്കേണ്ടത്. ഗുണദോഷങ്ങൾ മനസ്സിലാക്കുക, ഒരു നിക്ഷേപ ഉപദേഷ്ടാവുമായി ചർച്ച ചെയ്യുക, അതുവഴി നിങ്ങളുടെ നിലവിലെ സാമ്പത്തിക ആരോഗ്യവും ദീർഘകാല ലക്ഷ്യങ്ങളും കണക്കിലെടുത്ത് ഏറ്റവും മികച്ച തീരുമാനം എടുക്കാൻ കഴിയും.

4. നിയമപരമായ കാര്യങ്ങൾ അറിഞ്ഞിരിക്കണം

ഒരു വായ്പയ്ക്ക് അപേക്ഷിക്കുമ്പോൾ, 'ഡിഫോൾട്ട്' എന്നാൽ എന്താണെന്ന് വ്യക്തത വരുത്തണം. വായ്പാ തിരിച്ചടവിൽ വീഴ്ച വരുത്തിയാൽ, അത് പരിഹരിക്കുന്നതിന് വായ്പാദാതാവ് സ്വീകരിക്കുന്ന നടപടികളും, നിങ്ങൾ പാലിക്കേണ്ട കാര്യങ്ങളെ കുറിച്ചും മുൻകൂട്ടി മനസ്സിലാക്കുക. ഇത് ഭാവിയിലെ പ്രതിസന്ധികളെ നേരിടാൻ നിങ്ങളെ സഹായിക്കും.

മാത്രമല്ല വായ്പയുമായി ബന്ധപ്പെട്ട നിയമപരമായ ഫീസുകൾ, നികുതികൾ, സ്റ്റാമ്പ് ഡ്യൂട്ടി, ഡോക്യുമെന്റേഷൻ ചാർജുകൾ എന്നിവയെല്ലാം നിങ്ങൾ പരിശോധിച്ചിരിക്കണം. ഈ അധിക ചിലവുകൾ നിങ്ങളുടെ വായ്പാ ചെലവ് വർദ്ധിപ്പിക്കാൻ സാധ്യതയുണ്ട്.

5. വായ്പ എടുക്കുമ്പോൾ നിങ്ങളുടെ അവകാശങ്ങൾ തിരിച്ചറിയണം

നിങ്ങൾ തിരിച്ചടവ് തുക ഉത്തരവാദിത്തത്തോടെ പൂർത്തിയാക്കുന്നുണ്ടെങ്കിൽ വായ്പ എടുക്കുന്നവരുടെ അവകാശങ്ങൾ സംരക്ഷിക്കാൻ ഇന്ത്യൻ ഭരണഘടനയിലും ബാങ്കിംഗ് നിയമങ്ങളിലും വ്യക്തമായ വ്യവസ്ഥകളുണ്ട്. വായ്പാ സ്ഥാപനങ്ങളിൽ നിന്ന് ബുദ്ധിമുട്ടുകൾ നേരിടേണ്ടി വരുമ്പോൾ ഈ അവകാശങ്ങളെക്കുറിച്ച് അറിഞ്ഞിരിക്കുന്നത് നല്ലതാണ്.

വായ്പ സംബന്ധമായ സങ്കീർണ്ണതകൾ, ഫണ്ട് ദുരുപയോഗം, അല്ലെങ്കിൽ ബാങ്കിന്റെ ഭാഗത്ത് നിന്നുള്ള മറ്റ് പ്രശ്നങ്ങൾ എന്നിവ നേരിടേണ്ടി വരുന്നവർക്ക് വായ്പ നൽകിയ സ്ഥാപനത്തിന്റെ പരാതി പരിഹാര സംവിധാനത്തെ സമീപിക്കാം. അല്ലെങ്കിൽ ആർബിഐ നൽകുന്ന ബാങ്കിംഗ് ഓംബുഡ്‌സ്മാനെ സമീപിക്കാം. ഈ ഫോറങ്ങളിലൂടെ നിങ്ങളുടെ പരാതികൾ ഉന്നയിക്കുകയും സമയബന്ധിതമായ പരിഹാരം നേടുകയും ചെയ്യാം.

വ്യക്തി​ഗത വായ്പക്ക് അപേക്ഷിക്കുന്നതിനു മുന്നേ ഈ 5 കാര്യങ്ങളെ കുറിച്ച് വ്യക്തമായി അറിഞ്ഞിരിക്കണം.

അറിയിപ്പ്: ഇവിടെ പ്രകടിപ്പിച്ചിട്ടുള്ള അഭിപ്രായങ്ങളും നിർദ്ദേശങ്ങളും വ്യക്തിഗത വിശകലന വിദഗ്ദ്ധരുടെയോ സ്ഥാപനങ്ങളുടെയോ മാത്രം കാഴ്ചപ്പാടുകളാണ്. ഇത് Goodreturns.in-ന്റെയോ Greenium Information Technologies Private Limited-ന്റെയോ നിലപാടുകളെ പ്രതിഫലിക്കുന്നില്ല. ഈ ഉള്ളടക്കത്തിന്റെ കൃത്യത, പൂർണ്ണത, അല്ലെങ്കിൽ വിശ്വാസ്യത എന്നിവയ്ക്ക് ഞങ്ങൾ യാതൊരു ഉറപ്പും നൽകുന്നില്ല, മാത്രമല്ല അതിന് ഉത്തരവാദിത്തം ഏറ്റെടുക്കുന്നുമില്ല.

ഞങ്ങൾ ഏതെങ്കിലും തരത്തിലുള്ള നിക്ഷേപ ഉപദേശങ്ങൾ നൽകുകയോ, ഓഹരികൾ വാങ്ങാനോ വിൽക്കാനോ ശുപാർശ ചെയ്യുകയോ ചെയ്യുന്നില്ല. ഈ വിവരങ്ങൾ വിജ്ഞാനപ്രദമായ ആവശ്യങ്ങൾക്ക് മാത്രമുള്ളതാണ്. അതിനാൽ, ഏതെങ്കിലും നിക്ഷേപ തീരുമാനങ്ങൾ എടുക്കുന്നതിന് മുൻപ്, ലൈസൻസുള്ള ഒരു സാമ്പത്തിക ഉപദേഷ്ടകനുമായി കൂടിയാലോചിക്കുന്നത് നിർബന്ധമാണ്.