ഉയർന്ന മൂച്വൽ ഫണ്ട് റിട്ടേണുകൾക്കായി നിങ്ങൾ ശ്രദ്ധിക്കേണ്ട അഞ്ച് കാര്യങ്ങൾ

ദീർഘകാല സാമ്പത്തിക ലക്ഷ്യങ്ങൾ കൈവരിക്കുന്നതിനും കാര്യക്ഷമമായ രീതിയിൽ സമ്പത്ത് കെട്ടിപ്പടുക്കുന്നതിനുമുള്ള ഫലപ്രദമായ ഒരു മാർഗമാണ് മൂച്വൽ ഫണ്ട് നിക്ഷേപം. ഈ ഫണ്ടുകൾ കൂടുതൽ വരുമാനം നൽകുമെന്ന് മാത്രമല്ല, സുരക്ഷിതമായ നിക്ഷേപ രീതിയും പ്രദാനം ചെയ്യുന്നു. എങ്കിലും, നിരവധി നിക്ഷേപകർ അവരുടെ മൂച്വൽ ഫണ്ട് നിക്ഷേപങ്ങളിൽ പലപ്പോഴും മോശം അനുഭവങ്ങൾ നേരിടുന്നു. ഇത് മൂച്വൽ ഫണ്ടുകളുടെ പ്രവർത്തനരീതികൾ കൊണ്ടല്ല, മറിച്ച് നിക്ഷേപകരുടെ ഭാഗത്ത് നിന്നുള്ള വീഴ്ചകൾ കൊണ്ടാണ്.

മൂച്വൽ ഫണ്ടുകളിൽ അനുഭവിക്കുന്ന വീഴ്ചകളെ ഇല്ലാതാക്കാൻ ശ്രദ്ധിക്കേണ്ട അഞ്ച് കാര്യങ്ങൾ ഏതൊക്കെയാണ്?

1) ഹ്രസ്വകാല നേട്ടങ്ങൾക്കായി തിരയുന്നത്

ചുരുങ്ങിയ കാലത്തേക്കുള്ള ലാഭം പ്രതീക്ഷിച്ച് മൂച്വൽ ഫണ്ടുകളിൽ നിക്ഷേപിക്കുന്നതിൽ നിന്ന് മാറിനിൽക്കലാണ് ഏറ്റവും നല്ലത്. കുറഞ്ഞത് ഏഴ് വർഷമെങ്കിലും നീണ്ടുനിൽക്കുന്ന ദീർഘകാല നിക്ഷേപങ്ങൾ തിരഞ്ഞെടുക്കുന്നത്, നിങ്ങളുടെ സാമ്പത്തിക ലക്ഷ്യങ്ങൾക്ക് ഏറ്റവും നിർണായകമായതാണ്.

2) സാമ്പത്തിക ലക്ഷ്യങ്ങൾക്ക് ആവശ്യമായ നിക്ഷേപം

നിങ്ങളുടെ മൂച്വൽ ഫണ്ട് നിക്ഷേപങ്ങൾ, നിങ്ങളുടെ ഭാവി സാമ്പത്തിക ലക്ഷ്യങ്ങൾക്ക് അനുയോജ്യമായതാണെന്ന് ഉറപ്പാക്കേണ്ടത് അത്യാവശ്യമാണ്. ഉദാഹരണത്തിന്, അടുത്ത 20 വർഷത്തിനുള്ളിൽ ഒരു കോടി രൂപ റിട്ടേൺ ഉണ്ടാക്കുക എന്നതാണ് നിങ്ങളുടെ ലക്ഷ്യമെങ്കിൽ, ഓരോ മാസവും 1,000 രൂപ നിക്ഷേപിക്കുകയോ ഒരു ലക്ഷം രൂപ ഒറ്റത്തവണയായി നിക്ഷേപിക്കുകയോ ചെയ്യുന്നത് മതിയാകുമെന്ന് തോന്നിയേക്കാം. എങ്കിലും, മതിയായ നിക്ഷേപം ഇല്ലാതിരുന്നാൽ ഈ ലക്ഷ്യം കൈവരിക്കുന്നതിൽ പരാജയപ്പെടാൻ കാരണമാകും. ഒരു കോടി രൂപ റിട്ടേൺ ലഭിക്കാൻ, പ്രതിമാസം 7,550 രൂപ നിക്ഷേപിക്കുകയോ അല്ലെങ്കിൽ 6.1 ലക്ഷം രൂപ ഒറ്റത്തവണയായി നിക്ഷേപിക്കുകയോ വേണം. അതിനാൽ, നിങ്ങളുടെ സാമ്പത്തിക ലക്ഷ്യത്തിന് അനുയോജ്യമായ തുക കണക്കാക്കുകയും അത് നിക്ഷേപിക്കുകയും ചെയ്യേണ്ടത് അത്യാവശ്യമാണ്.

3) എസ്.ഐ.പികൾ നിർത്തലാക്കുന്നതും ഇടയ്ക്കിടെ പണം പിൻവലിക്കുന്നതും

സിസ്റ്റമാറ്റിക് ഇൻവെസ്റ്റ്മെന്റ് പ്ലാനുകൾ (എസ്.ഐ.പി) നിർത്തുന്നത് നിങ്ങളുടെ നിക്ഷേപത്തിന്റെ ക്രമം തെറ്റിക്കുകയും നിങ്ങളുടെ സമ്പാദ്യത്തിന്റെ വളർച്ചയെ തടസപ്പെടുത്തുകയും ചെയ്യുന്നു. നിക്ഷേപതുക കണക്കാക്കുന്നതിൽ എസ്.ഐ.പികൾ പ്രധാന പങ്ക് വഹിക്കുന്നുണ്ട്. ഇത് സമ്പാദ്യത്തിന്റെ വളർച്ചയെ പ്രോത്സാഹിപ്പിക്കുന്നതിന് ആവശ്യമാണ്‌. മാത്രമല്ല, ഇടയ്ക്കിടെയുള്ള പണം പിൻവലിക്കലുകൾ സമ്പാദ്യത്തിന്റെ വളർച്ചയെ തടസപ്പെടുത്തുകയും അതുവഴി നിങ്ങളുടെ സാമ്പത്തിക ലക്ഷ്യത്തെ അത് കാര്യമായി ബാധിക്കുകയും ചെയ്യും.

4) വിപണിയിലെ ഇടിവിനോട് പ്രതികരിക്കുന്നത്

ദീർഘകാല സാമ്പത്തിക ലക്ഷ്യങ്ങൾ വിജയകരമായി കൈവരിക്കുന്നതിന്, നിശ്ചയിക്കപ്പെട്ട സമയക്രമത്തിൽ നിക്ഷേപം നടത്തുന്നതിൽ ശ്രദ്ധിക്കേണ്ടത് അത്യാവശ്യമാണ്. പൊതുവെ വിപണിയിലെ തകർച്ച, സമ്പത്ത് ശേഖരണത്തിന് തടസം സൃഷ്ടിക്കുന്നു. ഇത്തരം അവസരങ്ങളിൽ നിക്ഷേപങ്ങളെ താത്കാലികമായി നിർത്തിവെക്കുന്നത് തുടർച്ചയായ നിക്ഷേപങ്ങളെ തടസപ്പെടുത്തുകയും ദീർഘകാല നിക്ഷേപ രീതിയെ ഇല്ലാതാക്കുകയും ചെയ്യുന്നു. അതിനാൽ നിങ്ങളുടെ സാമ്പത്തിക ലക്ഷ്യങ്ങളെ അത് ബാധിക്കുന്നതാണ്.

5) ഉയർന്ന പെർഫോമിംഗ് ഇൻവെസ്റ്റ്മെന്റ് ഫണ്ടുകൾ പിന്തുടരുന്നത്

നിങ്ങളുടെ നിക്ഷേപങ്ങളിൽ നിന്ന് നിലവിൽ മുന്നിട്ടുനിൽക്കുന്ന നിക്ഷേപങ്ങളിലേക്ക് മാറുന്നത് ഒരു ഉചിതമായ തീരുമാനമല്ല. നിക്ഷേപ പദ്ധതികളിൽ നിന്ന് മാറുന്നതിന് പകരം, ഒരു പദ്ധതിയുടെ നേട്ടമറിയാൻ കുറഞ്ഞത് രണ്ടോ മൂന്നോ വർഷം കാത്തിരിക്കുന്നതാണ് ഏറ്റവും നല്ലത്. നിക്ഷേപ പദ്ധതികളെ ഇടയ്ക്കിടെ മാറ്റുന്നത് സാമ്പത്തികമായ നേട്ടങ്ങൾ നഷ്ടപ്പെടുത്താൻ കാരണമാകും.

ഈ വീഴ്ചകളെയും പോരായ്മകളെയും ഒഴിവാക്കുന്നതിലൂടെ, നിക്ഷേപകർക്ക് അവരുടെ മൂച്വൽ ഫണ്ട് നിക്ഷേപങ്ങളുടെ ഫലപ്രാപ്തി ഗണ്യമായി മെച്ചപ്പെടുത്താനും അതുവഴി അവരുടെ സാമ്പത്തിക ലക്ഷ്യങ്ങളിലേക്ക് എത്തിച്ചേരാനും സാധിക്കും.