1.5 ലക്ഷം വരെ ആദായ നികുതി ഇളവ് ലഭിക്കുന്ന 5 കിടിലൻ പോസ്റ്റ് ഓഫീസ് പദ്ധതികൾ; നിക്ഷേപിക്കുന്നില്ലേ..?

പോസ്റ്റ് ഓഫീസ് നിക്ഷേപങ്ങൾ ഏറെ ജനപ്രിയമാണ്. നിരവധി ചെറുകിട സമ്പാദ്യ പദ്ധതികളാണ് പോസ്റ്റ് ഓഫീസ് വാ​ഗ്ദാനം ചെയ്യുന്നത്. സാധാരണക്കാർക്ക് ചെറിയ നിക്ഷേപത്തിലൂടെ വലിയ തുക സമ്പാദിക്കാൻ ഇത്തരം പദ്ധതികളിലൂടെ സാധിക്കും എന്നതാണ് പ്രത്യേകത. പോസ്റ്റ് ഓഫീസ് സ്കീമുകളായതിനാൽ എല്ലാം സുരക്ഷിത നിക്ഷേപങ്ങളാണ്, മാത്രമല്ല ഇവക്കെല്ലാം സർക്കാർ പിന്തുണയുണ്ട്.

സ്ഥിര നിക്ഷേപങ്ങൾ, ആർ.ഡി തുടങ്ങി ഒട്ടനവധി സ്കീമുകളുണ്ട്. മാത്രമല്ല സ്ത്രീകൾക്ക് മാത്രം, പെൺകുട്ടികൾക്ക് മാത്രം, മുതിർന്ന പൗരൻമാർക്ക് മാത്രമായും നിക്ഷേപ പദ്ധതികൾ വാ​ഗ്ദാനം ചെയ്യുന്നു. ഈ പദ്ധതികളിൽ പലതും 1961 ലെ ആദായനികുതി നിയമത്തിലെ സെക്ഷൻ 80C പ്രകാരം ആദായനികുതി ആനുകൂല്യങ്ങൾ നൽകുന്നു.

ഇത് നിക്ഷേപകർക്ക് ഒരു സാമ്പത്തിക വർഷത്തിൽ 1.5 ലക്ഷം രൂപ വരെ കിഴിവുകൾ ക്ലെയിം ചെയ്യാൻ സാധിക്കും. ആദായനികുതി നിയമത്തിലെ സെക്ഷൻ 80C പ്രകാരം ഇനിപ്പറയുന്ന പോസ്റ്റ് ഓഫീസ് സേവിംഗ്സ് സ്കീമുകൾ വിവിധ ആനുകൂല്യങ്ങൾ നൽകുന്നു.;

1. പബ്ലിക് പ്രൊവിഡന്റ് ഫണ്ട് (പി.പി.എഫ്)

ഇന്ത്യയിലെ ഏറ്റവും ജനപ്രിയമായ ദീർഘകാല നിക്ഷേപ ഓപ്ഷനുകളിൽ ഒന്നാണ് പി.പി.എഫ് അഥവാ പബ്ലിക്ക് പ്രൊവിഡൻ്റ് ഫണ്ട്. പ്രധാനമായും 15 വർഷത്തെ കാലാവധിയിലാണ് ഈ സ്കീം പ്രവർത്തിക്കുന്നത്. 15 വർഷത്തിനു ശേഷം നിക്ഷേപകർക്ക് ആവശ്യമെങ്കിൽ 5 വർഷത്തെ ബ്ലോക്കുകളായി കാലാവധി നീട്ടാവുന്നതാണ്. ഇവിടെ ആദായ നികുതി നിയമത്തിലെ 80 സി പ്രകാരം നികുതി രഹിത റിട്ടേണുകൾ വാഗ്ദാനം ചെയ്യുന്നു.

ഈ സ്കീം പ്രകാരം വർഷത്തിൽ നിക്ഷേപിക്കാവുന്ന ഏറ്റവും കുറഞ്ഞ നിക്ഷേപം 500 രൂപയും പരമാവധി നിക്ഷേം 1.5 ലക്ഷം രൂപയുമാണ്. നിലവിലെ പിപിഎഫിന്റെ പലിശ നിരക്ക് 7.1% ആണ്. അതായത് 15 വർഷത്തോളം കൃത്യമായി നിക്ഷേപിച്ചാൽ ലക്ഷങ്ങൾ സമ്പാ​ദിക്കാൻ സാധിക്കും. നിക്ഷേപത്തിനിടയിൽ ആവശ്യം വന്നാൽ കാലാവധിക്കു മുന്നേ പണം പിൻവലിക്കാനും സാധിക്കും. നിക്ഷേപം ആരംഭിച്ച് 5 വർഷത്തിനുശേഷം തുകയുടെ 50% പിൻവലിക്കാൻ സാധിക്കും.

2. നാഷണൽ സേവിംഗ്സ് സർട്ടിഫിക്കറ്റ് (എൻ‌.എസ്‌.സി)

ഉറപ്പായ വരുമാനവും നികുതി ലാഭവും വാഗ്ദാനം ചെയ്യുന്ന ഒരു സ്ഥിര വരുമാന നിക്ഷേപ പദ്ധതിയാണ് NSC. ഒരു സാമ്പത്തിക വർഷത്തിൽ 1.5 ലക്ഷം രൂപ വരെയുള്ള നിക്ഷേപങ്ങൾക്ക് ഇവിടെ കിഴിവ് ക്ലെയിം ചെയ്യാം. ഈ സ്കീമിൽ നിക്ഷേപിക്കാവുന്ന ഏറ്റവും കുറഞ്ഞ പരിധി 1,000 രൂപയാണ്. എന്നാൽ പരമാവധി തുകക്ക് പരിധിയില്ല. എന്നിരുന്നാലും 80C പ്രകാരം 1.5 ലക്ഷം രൂപ വരെ കിഴിവ് ലഭിക്കും. എൻ‌.എസ്‌.സി സ്കീമിൻ്റെ കാലാവധി അഞ്ച് വർഷമാണ്. നിലവിലെ കണക്ക് പ്രകാരം വാർഷിക പലിശ നിരക്ക് 7.7% എന്ന നിരക്കിലാണ്. ഏതൊരു ഇന്ത്യൻ പൗരനും ഈ സ്കീമിൽ നിക്ഷേപിക്കാം.

3. സുകന്യ സമൃദ്ധി യോജന (SSY)

പെൺകുട്ടികൾക്കായുള്ള സർക്കാർ പിന്തുണയുള്ള പദ്ധതിയാണ് സുകന്യ സമൃദ്ധി യോജന (SSY). പെൺകുട്ടികളുടെ ഭാവി സുരക്ഷിതമാക്കാൻ ഏറ്റവും മികച്ച സ്കീമാണിത്. അതായത് വിവാഹത്തിനും വിദ്യാഭ്യാസത്തിനും ഈ നിക്ഷേപത്തിൽ നിന്ന് സമ്പാദിക്കാം.

10 വയസ്സിനു താഴെയുള്ള പെൺകുട്ടികൾക്ക് മാത്രമേ ഈ പദ്ധതിയിൽ നിക്ഷേപിക്കാൻ അനുവാദമുള്ളൂ. കുട്ടിക്ക് പ്രായപൂർത്തിയാവാത്തതിനാൽ കുട്ടിയുടെ മാതാപിതാക്കളായിരിക്കും അക്കൗണ്ട് കൈകാര്യം ചെയ്യുന്നത്. പെൺകുട്ടിക്ക് 18 വയസ്സിനു ശേഷം അക്കൗണ്ട് സ്വന്തമാക്കാൻ സാധിക്കും. ഈ ചെറുകിട സമ്പാദ്യ പദ്ധതിയുടെ കാലാവധി 15 വർഷമാണ്.

ഇവിടെ നിക്ഷേപിക്കുന്ന തുകയ്ക്ക് നികുതി ഇളവ് ലഭിക്കും. നിക്ഷേപിക്കാവുന്ന ഏറ്റവും കുറഞ്ഞ നിക്ഷേപം 250 രൂപയും പരമാവധി നിക്ഷേപിക്കാവുന്ന തുക 1.5 ലക്ഷം രൂപയുമാണ്. 1.5 ലക്ഷം രൂപ വരെയുള്ള നിക്ഷേപങ്ങൾക്ക് സെക്ഷൻ 80C പ്രകാരം കിഴിവ് ലഭിക്കും.

ലഭിക്കുന്ന പലിശ നികുതി രഹിതമാണ്, കൂടാതെ കാലാവധി പൂർത്തിയാകുന്ന വരുമാനവും നികുതി രഹിതമാണ്. സുകന്യ സമൃദ്ധി യോജന ഒരു EEE (എക്സംപ്റ്റ്, എക്സംപ്റ്റ്, എക്സംപ്റ്റ്) വിഭാഗ നിക്ഷേപമാണ്, അതായത് നിക്ഷേപങ്ങൾ, പലിശ, കാലാവധി പൂർത്തിയാകുന്ന തുക എന്നിവയെല്ലാം നികുതി രഹിതമാണ്. ഈ സ്കീമിൻ്റെ നിലവിലെ പലിശ നിരക്ക് 8.2 ശതമാനമാണ്.

4. സീനിയർ സിറ്റിസൺസ് സേവിംഗ്സ് സ്കീം (SCSS)

60 വയസ്സ് പൂർത്തിയായ മുതിർന്ന പൗരൻമാർക്ക് വേണ്ടി മാത്രം രൂപകൽപ്പന ചെയ്ത നിക്ഷേപ പദ്ധതിയാണ് സീനിയർ സിറ്റിസൺസ് സേവിംഗ്സ് സ്കീം. ജോലിയിൽ നിന്ന് വിരമിച്ച് ജീവിതം ആസ്വദിക്കാൻ സാമ്പത്തിക സുരക്ഷ അനിവാര്യമാണ്. അതിനാണ് സീനിയർ സിറ്റിസൺസ് സേവിംഗ്സ് സ്കീം. ഉയർന്ന വരുമാനവും നികുതി ആനുകൂല്യങ്ങളും വാഗ്ദാനം ചെയ്യുന്ന ഈ സ്കീമിൽ നിക്ഷേപകർക്ക് ഏറ്റവും കുറഞ്ഞത് 1,000 രൂപ മുതൽ നിക്ഷേപം ആരംഭിക്കാം.

പരമാവധി നിക്ഷേപ പരിധി 30 ലക്ഷം രൂപയുമാണ്. 1.5 ലക്ഷം രൂപ വരെയുള്ള നിക്ഷേപത്തിന് സെക്ഷൻ 80C പ്രകാരം കിഴിവ് ലഭിക്കും. എന്നാൽ ഇതിലൂടെ നിങ്ങൾക്ക് ലഭിക്കുന്ന പലിശയ്ക്ക് നികുതി ബാധകമാണ്.നിലവിലെ കണക്ക് പ്രകാരം സീനിയർ സിറ്റിസൺസ് സേവിംഗ്സ് സ്കീമിന്റെ പലിശ നിരക്ക് പ്രതിവർഷം 8.2% ആണ്.

5. പോസ്റ്റ് ഓഫീസ് ടൈം ഡെപ്പോസിറ്റ് (POTD)

പോസ്റ്റ് ഓഫീസ് നൽകുന്ന ഒരു പ്രത്യേക സ്കീമാണിത്. ഇതിന് ഒരു സ്ഥിര നിക്ഷേപ പദ്ധതിയുടെ എല്ലാ സവിശേഷതകളും ഉണ്ട്. 5 വർഷത്തെ കാലാവധിയിലാണ് ഈ പദ്ധതിയിൽ നിക്ഷേപിക്കുന്നത്. അതായത് 1, 2, 3, 5 വര്‍ഷത്തേക്കായാണ് പോസ്റ്റ് ഓഫീസ് ടൈം ഡെപ്പോസിറ്റ് സ്വീകരിക്കുന്നത്. ഈ സ്കീമിൽ ഏറ്റവും കുറഞ്ഞ നിക്ഷേപം 1,000 രൂപയാണ്, എന്നാൽ പരമാവധി നിക്ഷേപത്തിന് പരിധിയില്ല. അതായത് 5 വർഷം കൊണ്ട് കോടികൾ സമ്പാദിക്കാം.

ഒരു സാമ്പത്തിക വർഷത്തിൽ 1.5 ലക്ഷം രൂപ വരെയുള്ള നിക്ഷേപങ്ങൾക്ക് 80C പ്രകാരം 5 വർഷത്തെ ഈ സ്കീമിൽ കിഴിവ് ലഭിക്കും. എന്നാൽ ലഭിക്കുന്ന പലിശ നികുതി വിധേയമാണ്. എന്നാൽ 5 വർഷത്തിൽ താഴെ കാലാവധിയുള്ള പോസ്റ്റ് ഓഫീസ് ടൈം ഡെപ്പോസിറ്റുകൾക്ക് സെക്ഷൻ 80C പ്രകാരം നികുതി ആനുകൂല്യമില്ല.

ഇവിടെ പലിശ നിരക്കിലും ചില പ്രത്യേകതയുണ്ട്;

• ഒരു വർഷത്തെ നിക്ഷേപം - 6.9% പലിശ
• രണ്ട് വർഷത്തെ നിക്ഷേപം - 7.0% പലിശ
• മൂന്ന് വർഷത്തെ നിക്ഷേപം - 7.1% പലിശ
• അഞ്ച് വർഷത്തെ നിക്ഷേപം - 7.5% പലിശ

മുകളിലുള്ള 5 നിക്ഷേപങ്ങളും ആദായ നികുതി ആനുകൂല്യങ്ങൾ വാ​ഗ്ദാനം ചെയ്യുന്നു. ഇതിൽ നിങ്ങൾക്ക് അനുയോജ്യമായ നിക്ഷേപ പദ്ധതി തിരഞ്ഞെടുത്ത് നിക്ഷേപം ആരംഭിക്കാവുന്നതാണ്. സുരക്ഷിതമായി അപകടരഹിതമായി നിക്ഷേപിക്കാം.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.