വിരമിക്കൽ കാലം സുരക്ഷിതമാക്കാം: സ്ഥിരവരുമാനം ഉറപ്പാക്കാൻ 7 നിക്ഷേപ പദ്ധതികൾ

വിരമിച്ചതിനുശേഷമുള്ള ജീവിതം സാമ്പത്തികമായി സുരക്ഷിതമായിരിക്കുക എന്നത് ഏതൊരാളുടെയും സ്വപ്നമാണ്. ജോലിയിൽ നിന്ന് വിരമിക്കുമ്പോൾ വരുമാനം നിലയ്ക്കുന്നതോടെ ദൈനംദിന ആവശ്യങ്ങൾക്കും ആരോഗ്യപരമായ ചിലവുകൾക്കും മറ്റൊരാളെ ആശ്രയിക്കേണ്ടി വരരുത്. ഇതിനായി മുൻകൂട്ടി കൃത്യമായ പ്ലാനിംഗ് ആവശ്യമാണ്. വിരമിക്കൽ കാലത്ത് മാസാമാസം കൃത്യമായ വരുമാനം നൽകുന്ന ഏഴ് പ്രധാന നിക്ഷേപ പദ്ധതികളെ പരിചയപ്പെടാം.

1. അടൽ പെൻഷൻ യോജന

സ്ഥിരമായി ആദായനികുതി അടയ്ക്കാത്തവരോ അസംഘടിത മേഖലയിൽ ജോലി ചെയ്യുന്നവരോ ആയ ആളുകൾക്ക്, അടൽ പെൻഷൻ യോജന ഏറ്റവും വിശ്വസനീയമായ പെൻഷൻ ഓപ്ഷനുകളിൽ ഒന്നാണ്. 18 നും 40 നും ഇടയിൽ പ്രായമുള്ള വ്യക്തികൾക്ക് 60 വയസ്സ് വരെ ചെറിയ പ്രതിമാസ സംഭാവനകൾ നൽകാൻ ഈ പദ്ധതി അനുവദിക്കുന്നു. പകരമായി, വരിക്കാർക്ക് അവരുടെ സംഭാവന നിലവാരത്തെ ആശ്രയിച്ച് 1,000 രൂപ മുതൽ 5,000 രൂപ വരെ ഉറപ്പുള്ള പ്രതിമാസ പെൻഷൻ ലഭിക്കും. 

2. നാഷണൽ പെൻഷൻ സിസ്റ്റം

ജോലി ചെയ്യുന്ന കാലയളവിൽ തന്നെ നിക്ഷേപം തുടങ്ങാൻ സാധിക്കുന്ന പദ്ധതിയാണിത്. വിരമിക്കുമ്പോൾ നിക്ഷേപത്തിന്റെ ഒരു ഭാഗം ഒറ്റത്തവണയായി പിൻവലിക്കാനും ബാക്കി തുകയിൽ നിന്ന് മാസാമാസം പെൻഷൻ ലഭിക്കാനും ഇത് സഹായിക്കുന്നു. കുറഞ്ഞ ചിലവിൽ കൂടുതൽ നേട്ടം നൽകുന്ന ഒരു പെൻഷൻ പ്ലാനാണിത്.

3. സിസ്റ്റമാറ്റിക് പിൻവലിക്കൽ പ്ലാൻ

സിസ്റ്റമാറ്റിക് പിൻവലിക്കൽ പദ്ധതി അഥവാ എസ്ഡബ്ല്യുപി, വിരമിച്ചവർക്ക് അവരുടെ മ്യൂച്വൽ ഫണ്ട് നിക്ഷേപങ്ങളിൽ നിന്ന് കൃത്യമായ ഇടവേളകളിൽ ഒരു നിശ്ചിത തുക പിൻവലിക്കാൻ അനുവദിക്കുന്നു. പെൻഷനുകളിൽ നിന്ന് വ്യത്യസ്തമായി, എസ്ഡബ്ല്യുപി വരുമാനം മ്യൂച്വൽ ഫണ്ട് യൂണിറ്റുകൾ റിഡീം ചെയ്യുന്നതിലൂടെയാണ് ലഭിക്കുന്നത്, അതായത് വരുമാനം വിപണി പ്രകടനത്തെ ആശ്രയിച്ചിരിക്കുന്നു. 

4. ഇപിഎഫ്ഒയും ഇപിഎസും

സ്വകാര്യ മേഖലയിലെ ശമ്പളക്കാരായ ജീവനക്കാർക്കായി എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ, എംപ്ലോയീസ് പെൻഷൻ സ്കീമിലൂടെ ഒരു പെൻഷൻ സൗകര്യം ഒരുക്കുന്നുണ്ട്. ഈ ആനുകൂല്യത്തിന് അർഹത നേടുന്നതിന് ഒരു ജീവനക്കാരൻ കുറഞ്ഞത് 10 വർഷമെങ്കിലും വിഹിതം അടച്ചിരിക്കണം. പെൻഷൻ തുക കണക്കാക്കുന്നത് ജീവനക്കാരന്റെ ശമ്പളത്തെയും സേവന കാലയളവിനെയും അടിസ്ഥാനമാക്കിയാണ്. തുക വളരെ വലുതല്ലെങ്കിൽ പോലും, വിരമിക്കലിനുശേഷം ഇതൊരു സ്ഥിരവരുമാനം ഉറപ്പാക്കുന്നു. മറ്റ് നിക്ഷേപ പദ്ധതികൾക്കൊപ്പം ഇപിഎഫ്ഒയും ഇപിഎസും ചേരുമ്പോൾ സ്വകാര്യ മേഖലയിലെ തൊഴിലാളികൾക്ക് അതൊരു സുപ്രധാന സുരക്ഷാ വലയമായി മാറുന്നു.

5. ഇമ്മീഡിയറ്റ് ആന്വിറ്റി പ്ലാനുകൾ

ലൈഫ് ഇൻഷുറൻസ് കമ്പനികൾ വാഗ്ദാനം ചെയ്യുന്ന ഇമ്മീഡിയറ്റ് ആന്യുവിറ്റി പ്ലാനുകൾ, നിങ്ങളുടെ പക്കലുള്ള ഒരു നിശ്ചിത തുകയെ ആജീവനാന്തം ഉറപ്പായ വരുമാനമാക്കി മാറ്റുന്നു. നിക്ഷേപം നടത്തിക്കഴിഞ്ഞാൽ ഉടൻ തന്നെ ആന്യുവിറ്റി ആരംഭിക്കുന്നു. നിങ്ങൾക്ക് പ്രതിമാസമോ, മൂന്ന് മാസത്തിലൊരിക്കലോ അല്ലെങ്കിൽ വർഷത്തിലൊരിക്കലോ വരുമാനം സ്വീകരിക്കാവുന്നതാണ്. ഇതിൽ നിന്നുള്ള ലാഭം താരതമ്യേന കുറവായി തോന്നാമെങ്കിലും, ഇതിന്റെ ഏറ്റവും വലിയ ഗുണം 'ലോഞ്ചെവിറ്റി പ്രൊട്ടക്ഷൻ' ആണ്. അതായത്, ഒരു വ്യക്തി എത്ര കാലം ജീവിച്ചിരുന്നാലും ഈ വരുമാനം മുടങ്ങാതെ ലഭിച്ചുകൊണ്ടിരിക്കും. വിരമിക്കൽ കാലത്തെ ഏക വരുമാന മാർഗ്ഗമായി കാണുന്നതിന് പകരം, മറ്റ് നിക്ഷേപങ്ങൾക്കൊപ്പമുള്ള ഒരു അനുബന്ധ വരുമാന സ്രോതസ്സായി ഇത്തരം പ്ലാനുകളെ ഉപയോഗിക്കുന്നതാണ് ഏറ്റവും ഉചിതം.

6. പോസ്റ്റ് ഓഫീസ് പ്രതിമാസ വരുമാന പദ്ധതി

സുരക്ഷിതമായ നിക്ഷേപവും മാസാമാസം കൃത്യമായ വരുമാനവും ആഗ്രഹിക്കുന്നവർക്ക് തിരഞ്ഞെടുക്കാവുന്ന മികച്ച പദ്ധതിയാണിത്. ഇതിൽ നിക്ഷേപിക്കുന്ന തുകയ്ക്ക് ഓരോ മാസവും പലിശ ലഭിക്കും. ഒറ്റയ്ക്കോ ജോയിന്റ് അക്കൗണ്ടായോ ഈ പദ്ധതിയിൽ ചേരാവുന്നതാണ്. വിപണിയിലെ ചാഞ്ചാട്ടങ്ങൾ ഇതിനെ ബാധിക്കില്ല എന്നതാണ് പ്രധാന ആകർഷണം.

7. സീനിയർ സിറ്റിസൺ സേവിംഗ്സ് സ്കീം

മുതിർന്ന പൗരന്മാർക്കായി സർക്കാർ ആവിഷ്കരിച്ച ഏറ്റവും സുരക്ഷിതമായ പദ്ധതിയാണിത്. 60 വയസ്സിന് മുകളിലുള്ളവർക്ക് ഇതിൽ ചേരാം. ബാങ്ക് എഫ്‌ഡികളേക്കാൾ ഉയർന്ന പലിശ നിരക്ക് ഇത് വാഗ്ദാനം ചെയ്യുന്നു. ത്രൈമാസടിസ്ഥാനത്തിലാണ് ഇതിൽ പലിശ ലഭിക്കുക. ആദായനികുതി നിയമത്തിലെ 80C പ്രകാരം നികുതി ഇളവിനും അർഹതയുണ്ട്.

വിരമിക്കൽ കാലത്തെ പ്ലാനിംഗ് നേരത്തെ തുടങ്ങുന്നത് ഭാവിയിലെ സാമ്പത്തിക ഭാരം കുറയ്ക്കും. നിങ്ങളുടെ സാമ്പത്തിക ലക്ഷ്യങ്ങൾക്കും റിസ്ക് എടുക്കാനുള്ള ശേഷിക്കും അനുസരിച്ചുള്ള പദ്ധതികൾ തിരഞ്ഞെടുക്കുക. മികച്ച തീരുമാനങ്ങൾക്കായി ഒരു സാമ്പത്തിക ഉപദേഷ്ടാവിന്റെ സഹായം തേടുന്നതും ഉചിതമായിരിക്കും.