ക്രെഡിറ്റ് സ്കോർ മാത്രം പോരാ! മികച്ച സ്കോർ ഉണ്ടെങ്കിലും ക്രെഡിറ്റ് കാർഡ് അപേക്ഷ ഇക്കാരണങ്ങളാൽ തള്ളാം

അത്യാവശ്യ ഘട്ടങ്ങളിൽ പ്രയോജനപ്പെടുത്താൻ സാധിക്കുന്നതും അതിരുകളില്ലാതെ എല്ലാവരിലേക്കും എത്തികഴിഞ്ഞതുമായ സാമ്പത്തിക ഉപകരണമാണ് ഇന്ന് ക്രെഡിറ്റ് കാർഡുകൾ. ബാങ്കുകൾ ധാരാളമായി ഉപഭോക്താക്കളിലേക്ക് ക്രെഡിറ്റ് കാർഡ് സേവനങ്ങൾ എത്തിക്കാൻ ശ്രമിക്കുന്നു. എന്നിരുന്നാലും, നിങ്ങൾക്ക് ഒരു ക്രെഡിറ്റ് കാർഡ് സ്വന്തമാക്കാൻ നിരവധി യോഗ്യത മാനദണ്ഡങ്ങൾ മറികടക്കേണ്ടതുണ്ട്. ഇതിൽ ഏറ്റവും പ്രധാനം നിങ്ങളുടെ ക്രെഡിറ്റ് സ്കോറാണ്. എന്നാൽ അത് മാത്രം മതിയോ? പോരായെന്നാണ് ഉത്തരം. മികച്ച ക്രെഡിറ്റ് സ്കോർ ഉണ്ടെങ്കിലും നിങ്ങളുടെ ക്രെഡിറ്റ് കാർഡ് അപേക്ഷ തള്ളാൻ ഇക്കാരണങ്ങളും പരിഗണിക്കപ്പെട്ടേക്കാം. 

ബാങ്കിന്റെ പ്രവർത്തന പരിധി - ചില ബാങ്കുകൾ അവരുടെ ക്രെഡിറ്റ് കാർഡ് പ്രവർത്തന പരിധി ചില നഗരങ്ങളിലേക്ക് മാത്രമായി ചുരുക്കിയിരിക്കുന്നു.  ഈ പ്രദേശങ്ങൾക്ക് പുറത്ത് നിന്നുള്ള അപേക്ഷകൾ തള്ളപ്പെടുന്നു. ഉദ്ദാഹരണത്തിന്, അമേരിക്കൻ എക്സ്പ്രസ് ക്രെഡിറ്റ് കാർഡുകൾ ഡൽഹി, മുംബൈ, ബാംഗ്ലൂർ തുടങ്ങി ചില സിറ്റികളിൽ മാത്രമാണ് ലഭ്യമാവുക. 

തൊഴിൽ മാനദണ്ഡം - ക്രെഡിറ്റ് കാർഡിന് യോഗ്യത നേടുന്നതിന്, നിങ്ങൾ തൊഴിൽ മാനദണ്ഡങ്ങൾ പാലിക്കണം. മിക്ക ബാങ്കുകളും ശമ്പളമുള്ളവർക്കും സ്വയംതൊഴിൽ ചെയ്യുന്നവർക്കും ക്രെഡിറ്റ് കാർഡുകൾ നൽകുന്നു. ഇതിൽ തന്നെ ചില സ്ഥാപനങ്ങൾ ശമ്പളമുള്ള വ്യക്തികൾക്ക് മാത്രമായിരിക്കും ക്രെഡിറ്റ് കാർഡ് നൽകുന്നത്. 

ഒരാൾക്ക് ഒരു ക്രെഡിറ്റ് കാർഡ് - ചില ബാങ്കുകൾക്ക് ഒരു വ്യക്തിക്ക് ഒരു ക്രെഡിറ്റ് കാർഡ് നൽകുന്ന നയമുണ്ട്. അവർക്ക് ഒരു വ്യക്തിക്ക് ഒരു കോർ ക്രെഡിറ്റ് കാർഡും ഒരു കോ-ബ്രാൻഡഡ് ക്രെഡിറ്റ് കാർഡും നൽകാം. ഇത്തരം സാഹചര്യങ്ങളിലും നിങ്ങളുടെ അപേക്ഷ തള്ളാം. 

വരുമാന യോഗ്യതാ മാനദണ്ഡങ്ങൾ - കാർഡ് യോഗ്യതാ മാനദണ്ഡത്തിൽ പറഞ്ഞിരിക്കുന്നതുപോലെ മിക്ക ക്രെഡിറ്റ് കാർഡുകൾക്കും ഒരു പ്രത്യേക മിനിമം വരുമാനം ആവശ്യമാണ്. നിങ്ങളുടെ വരുമാനം ഒരു പ്രത്യേക കാർഡിനുള്ള ഏറ്റവും കുറഞ്ഞ വരുമാന യോഗ്യതാ മാനദണ്ഡത്തേക്കാൾ കുറവാണെങ്കിൽ നിങ്ങൾ ആ കാർഡിന് അപേക്ഷിക്കുകയാണെങ്കിൽ, നിങ്ങളുടെ അപേക്ഷ നിരസിക്കപ്പെടും.

പ്രായ മാനദണ്ഡം - മിക്ക ബാങ്കുകളും ക്രെഡിറ്റ് കാർഡ് യോഗ്യതയ്ക്കുള്ള ഏറ്റവും കുറഞ്ഞതും കൂടിയതുമായ പ്രായപരിധി വ്യക്തമാക്കുന്നു. നിങ്ങളുടെ പ്രായം കുറഞ്ഞ പ്രായപരിധിയേക്കാൾ താഴെയോ പരമാവധി പ്രായപരിധിയേക്കാൾ കൂടുതലോ ആണെങ്കിൽ, നിങ്ങളുടെ അപേക്ഷ നിരസിക്കപ്പെടും. 

താമസം - ഇന്ത്യയിൽ വിതരണത്തിലുള്ള കൂടുതൽ ക്രെഡിറ്റ് കാർഡുകളിലെയും പ്രധാന മാനദണ്ഡങ്ങളിലൊന്ന് ഉപഭോക്താവ് ഇന്ത്യയിൽ താമസിക്കുന്നവരായിരിക്കണം എന്നതാണ്. നിങ്ങൾ ഒരു പ്രവാസിയാണെങ്കിൽ അത്തരം ബാങ്കുകളിൽ അപേക്ഷിക്കുമ്പോൾ നിങ്ങളുടെ അപേക്ഷ നിരസിക്കപ്പെട്ടേക്കാം.