റിട്ടയർമെന്റിന് ശേഷവും മാസം 60,000 രൂപ വരുമാനം വേണോ? 50-ാം വയസിലും നിക്ഷേപം തുടങ്ങാം

വിരമിക്കലിന് ശേഷവും പ്രതിമാസ വരുമാനം തുടർന്നിരുന്നെങ്കിൽ എന്ന് ആഗ്രഹിക്കുന്നവരാണ് നമ്മളിൽ പലരും. ആരെയും ആശ്രയിക്കാതെയും ബുദ്ധിമുട്ടിക്കാതെയും ബാക്കിയുള്ള കാലവും സന്തോഷത്തോടെയും സമാധാനത്തോടെയും കഴിയുന്നതിനുവേണ്ടിയാണത്. എന്നാൽ ആഗ്രഹമല്ലാതെ റിട്ടയർമെന്റ് ആസൂത്രണത്തെ പറ്റി പലരും കാര്യമായി ചിന്തിക്കുന്നില്ലായെന്നതാണ് വസ്തുത. ഇന്ത്യയിൽ 80 ശതമാനം ആളുകളും വിരമിക്കലിന് ശേഷം മക്കളെയോ പാരമ്പര്യ സ്വത്തിനെയോ ആശ്രയിച്ചാണ് ജീവിതം മുന്നോട്ടു കൊണ്ടുപോകുന്നതെന്ന് കണക്കുകൾ വ്യക്തമാക്കുന്നു. വലിയൊരു സംഖ്യ ആളുകളാകട്ടെ റിട്ടയർമെന്റിനോടു അടുക്കുമ്പോൾ മാത്രമാണ് ഇതിനെക്കുറിച്ച് കാര്യമായി ചിന്തിച്ചു തുടങ്ങുന്നതും നിക്ഷേപിച്ച് തുടങ്ങുന്നതും. അത്തരത്തിൽ 40 വയസിന് ശേഷം വിരമിക്കൽ പദ്ധതിയിലേക്ക് നിക്ഷേപം നടത്തുന്നവർക്ക് പ്രതിമാസം 60,000 രൂപ വരുമാനം ലഭിക്കാൻ എങ്ങനെ നിക്ഷേപിക്കണമെന്നാണ് ഈ ലേഖനത്തിൽ വിശദീകരിക്കുന്നത്.

പേഴ്സണൽ ലോൺ: നിങ്ങളുടെ വരുമാനം അനുസരിച്ച് എത്ര രൂപ വരെ കിട്ടും? കൂടുതൽ കിട്ടാൻ...

എന്താണ് റിട്ടയർമെന്റ് പ്ലാനിംഗ് കാൽക്കുലേറ്റർ?

സുഖപ്രദവും സൗകര്യപ്രദവുമായ റിട്ടയർമെറ് ജീവിതത്തിന് ആവശ്യമായ ഫണ്ട് കണക്കാക്കാൻ സഹായിക്കുന്ന ഒരു വിലപ്പെട്ട സാമ്പത്തിക ഉപകരണമാണ് റിട്ടയർമെന്റ് പ്ലാനിംഗ് കാൽക്കുലേറ്റർ. ആവശ്യമായ റിട്ടയർമെന്റ് സമ്പാദ്യം കെട്ടിപ്പടുക്കുന്നതിനും സാമ്പത്തിക സ്ഥിരത ഉറപ്പുവരുത്തുന്നതിനും നിങ്ങൾ ആഗ്രഹിക്കുന്ന ജീവിതശൈലി നിലനിർത്താനുള്ള കഴിവ് ഉറപ്പാക്കുന്നതിനും നിക്ഷേപങ്ങൾ തന്ത്രം മെനയുന്നതിൽ ഇത് സഹായിക്കുന്നു. നിലവിലുള്ള വരുമാനം, പ്രതീക്ഷിക്കുന്ന ചെലവുകൾ, പണപ്പെരുപ്പം, അവശേഷിക്കുന്ന സമ്പാദ്യം തുടങ്ങിയ ഘടകങ്ങൾ പരിഗണിക്കുന്നതിലൂടെ, കാൽക്കുലേറ്റർ നിങ്ങൾ എത്രത്തോളം ലാഭിക്കണമെന്നതിന്റെയും നിക്ഷേപിക്കണമെന്നതിന്റെയും യാഥാസ്ഥിതിക വിലയിരുത്തൽ ഇവിടെ ലഭിക്കുന്നു.

40-ാം വയസിൽ നിക്ഷേപം ആരംഭിക്കുമ്പോൾ

നിങ്ങളുടെ 40 വയസിലാണ് നിങ്ങൾ റിട്ടയർമെന്റ് സമ്പാദ്യത്തിലേക്ക് നിക്ഷേപം ആരംഭിക്കുന്നതെന്ന് കരുതുക. വിരമിക്കൽ പ്രായം 60 വയസും പ്രതീക്ഷിക്കുന്ന ആയുർദൈർഘ്യം 80 വയസുമായി കണക്കാക്കിയാൽ നിങ്ങളുടെ നിലവിലെ ജീവിത നിലവാരം നിലനിർത്തുന്നതിന് കൃത്യമായ സാമ്പത്തിക ആസൂത്രണം ആവശ്യമാണ്. 6 ശതമാനം പണപ്പെരുപ്പ നിരക്കും നിലവിലെ പ്രതിമാസ ചെലവ് 50,000 രൂപയും കണക്കിലെടുക്കുമ്പോൾ, റിട്ടയർമെന്റിന് ശേഷം 20 ശതമാനം കുറയുമെന്ന് പ്രതീക്ഷിക്കുന്നു. ഇതനുസരിച്ച് നിങ്ങൾക്ക് 3,07,88,501 രൂപ റിട്ടയർമെന്റ് കോർപ്പസ് ആവശ്യമാണ്. ഈ ലക്ഷ്യം കൈവരിക്കുന്നതിന്, 40 വയസ്സ് മുതൽ പ്രതിമാസം 31,123 രൂപ നിക്ഷേപം ആരംഭിക്കേണ്ടതുണ്ട്. ഈ കണക്കുകൂട്ടൽ റിട്ടയർമെറിന് മുമ്പുള്ള 12 ശതമാനവും വിരമിക്കലിന് ശേഷവും 6 ശതമാനവും പ്രതീക്ഷിക്കുന്ന റിട്ടേൺ നിരക്കിനെ അടിസ്ഥാനമാക്കിയുള്ളതാണ്.

കരിയർ വളർച്ചയും സാമ്പത്തിക വിജയും ഉറപ്പ്; 2025-ൽ പഠിച്ചിരിക്കേണ്ട മികച്ച 5 വരുമാന നൈപുണ്യങ്ങൾ

ഇതേ കണക്കുകൂട്ടലിൽ 45-ാം വയസിലാണ് നിങ്ങൾ നിക്ഷേപം ആരംഭിക്കുന്നതെങ്കിൽ നിങ്ങളുടെ നിലവിലെ ജീവിത നിലവാരം നിലനിർത്തുന്നതിന് 2,30,06,959 രൂപ റിട്ടയർമെറ് കോർപ്പസ് ആവശ്യമാണ്. ഈ ലക്ഷ്യത്തിലെത്താൻ, നിങ്ങൾ 45 വയസ്സ് മുതൽ പ്രതിമാസം 46,053 രൂപ നിക്ഷേപിക്കാൻ തുടങ്ങണം. നിങ്ങൾ 50 വയസ്സ് വരെ സേവിംഗ്സ് വൈകുകയാണെങ്കിൽ, അതേ ജീവിതശൈലി നിലനിർത്താൻ നിങ്ങൾക്ക് 1,71,92,138 രൂപ റിട്ടയർമെന്റ് കോർപ്പസ് ആവശ്യമാണ്. എന്നിരുന്നാലും, ഈ ലക്ഷ്യം നേടുന്നതിന്, അതേ സാമ്പത്തിക അനുമാനങ്ങളിൽ 50 വയസ്സ് മുതൽ നിങ്ങൾ പ്രതിമാസം 74,736 രൂപ നിക്ഷേപിക്കണം. ഇതിൽ നിന്നും മനസിലാക്കേണ്ട പ്രധാന കാര്യം എത്രത്തോളം നേരത്തെ നിങ്ങൾക്ക് റിട്ടയർമെന്റ് പ്ലാനിംഗ് നടത്താൻ സാധിക്കുമോ അത്രത്തോളം സാമ്പത്തിക ഞെരുക്കം ഒഴിവാക്കാൻ സാധിക്കും.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.