പ്രമുഖ സ്വകാര്യ മേഖലാ ബാങ്കായ ആക്സിസ് ബാങ്ക് സ്ഥിര നിക്ഷേപങ്ങള്ക്ക് മേലുള്ള പലിശ നിരക്കുകള് പുതുക്കി നിശ്ചയിച്ചു. മാര്ച്ച് 18 മുതല് പുതിയ നിരക്കുകള് പ്രാബല്യത്തില് വന്നുകഴിഞ്ഞു.
7 ദിവസങ്ങള് മുതല് 10 വര്ഷം വരെ നീളുന്ന വ്യത്യസ്ത കാലയളവുകളിലേക്ക് ആക്സിസ് ബാങ്ക് സ്ഥിര നിക്ഷേപ സേവനങ്ങള് നല്കി വരുന്നുണ്ട്.
പുതുക്കിയ നിരക്കുകള് പ്രകാരം 7 ദിവസങ്ങള് മുതല് 29 ദിവസങ്ങള് വരെയുള്ള കാലയളവിലേക്ക് 2.50 ശതമാനമാണ് സ്ഥിര നിക്ഷേപങ്ങള്ക്കായി ആക്സിസ് ബാങ്ക് നല്കുന്ന പലിശ നിരക്ക്. 30 ദിവസങ്ങള് മുതല് 3 മാസം വരെയുള്ള സ്ഥിര നിക്ഷേപങ്ങള്ക്ക് 3 ശതമാനവും 3 മാസം മുതല് ആറ് മാസം വരെയുള്ള സ്ഥിര നിക്ഷേപങ്ങള്ക്ക് 3.5 ശതമാനവും പലിശ ലഭിക്കും.
ആറ് മാസം മുതല് 11 മാസവും 25 ദിവസവും വരെയുള്ള നിക്ഷേപങ്ങള്ക്ക് ആക്സിസ് ബാങ്ക് നല്കുന്നത് 4.40 ശതമാനം പലിശ നിരക്കാണ്. 11 മാസവും 25 ദിവസവും മുതല് ഒരു വര്ഷവും അഞ്ച് ദിവസവും വരെയുള്ള സമയത്തെ നിക്ഷേപങ്ങള്ക്ക് 5.15 ശതമാനം പലിശ ലഭിക്കും. ഒരു വര്ഷവും 5 ദിവസവും മുതല് 18 മാസം വരെയാണ് നിക്ഷേപിക്കുന്നതെങ്കില് 5.10 ശതമാനമാണ് പലിശ ലഭിക്കുക. 18 മാസം കാലവധിയുള്ള ടേം ഡെപ്പോസിറ്റുകള്ക്ക് 5.25 ശതമാനമാണ് ആക്സിസ് ബാങ്ക് വാഗ്ദാനം ചെയ്യുന്ന പലിശ നിരക്ക്.
2 വര്ഷം മുതല് 5 വര്ഷം വരെയുള്ള ദീര്ഘകാല നിക്ഷേപങ്ങള്ക്ക് ആക്സിസ് ബാങ്ക് നല്കുന്നത് 5.40 ശതമാനം പലിശയാണ്. അഞ്ച് വര്ഷം മുതല് പത്ത് വര്ഷം വരെയുള്ള നിക്ഷേപങ്ങള്ക്ക് 5.75 ശതമാനമാണ് ആക്സിസ് ബാങ്കിന്റെ പുതുക്കിയ പലിശ നിരക്ക്.
മുതിര്ന്ന പൗരന്മാര്ക്ക് ആക്സിസ് ബാങ്ക് നിശ്ചിത കാലത്തേക്കുള്ള നിക്ഷേപങ്ങള്ക്കായി ഉയര്ന്ന പലിശ നിരക്കാണ് വാഗ്ദാനം ചെയ്യുന്നത്. 7 ദിവസം മുതല് 10 വര്ഷം വരെ നീളുന്ന വിവിധ കാലയളവുകളിലേക്കുള്ള നിക്ഷേപങ്ങള്ക്ക് 2.5 ശതമാനം മുതല് 6.50 ശതമാനം വരെ മുതിര്ന്ന പൗരന്മാര്ക്ക് പലിശ ലഭിക്കും.
സ്ഥിര നിക്ഷേപങ്ങള് കാലാവധിയെത്തും മുമ്പ് പിന്വലിക്കുകയാണെങ്കില് ബാങ്ക് ഈടാക്കുന്ന പിഴ ഒഴിവാക്കുകയാണെന്ന് ആക്സിസ് ബാങ്ക് നേരത്തെ അറിയിച്ചിരുന്നു. ആകസ്മികമായുണ്ടാകാന് സാധ്യതയുള്ള സാമ്പത്തിക ആവശ്യങ്ങളെക്കുറിച്ച് ആകുലപ്പെടാതെ സ്ഥിര നിക്ഷേപങ്ങള് തിരഞ്ഞെടുക്കാന് ഇത് ഉപഭോക്താക്കള്ക്ക് ധൈര്യം നല്കുന്നുവെന്നാണ് ബാങ്കിന്റെ വിലയിരുത്തല്.