ആക്‌സിസ് ബാങ്കിന്റെ പുതുക്കിയ എസ്എംഎസ് സര്‍വീസ് ചാര്‍ജുകള്‍ നാളെ മുതല്‍ പ്രാബല്യത്തില്‍

രാജ്യത്തെ മൂന്നാമത്തെ ഏറ്റവും വലിയ സ്വകാര്യ മേഖലാ ബാങ്കാണ് ആക്‌സിസ് ബാങ്ക്. നിലവില്‍ സേവിംഗ്‌സ് ബാങ്ക് അക്കൗണ്ടുകളുടെ പല സര്‍വീസ് ചാര്‍ജുകളും ആക്‌സിസ് ബാങ്ക് പുതുക്കി നിശ്ചയിച്ചിരിക്കുകയാണ്. ഇതില്‍ ചില നിരക്കുകള്‍ 2021 മെയ് 1 മുതല്‍ക്ക് തന്നെ പ്രാബല്യത്തില്‍ വന്നിട്ടുണ്ട്. മറ്റു ചില പുതുക്കിയ ചാര്‍ജുകള്‍ 2021 ജൂലൈ 1 ഒന്ന് മുതല്‍ നിലവില്‍ വരുമെന്ന് ആക്‌സിസ് ബാങ്ക് അറിയിച്ചു കഴിഞ്ഞു.

സൗജന്യ പരിധിയ്ക്ക് ശേഷമുള്ള എടിഎം പണം പിന്‍വലിക്കലുകള്‍ക്കുള്ള ചാര്‍ജുകള്‍ ബാങ്ക് ഉയര്‍ത്തിയിട്ടുണ്ട്. കൂടാതെ പല തരത്തിലുള്ള സേവിംഗ്‌സ് ബാങ്ക് അക്കൗണ്ടുകളുടെ മിനിമം ബാലന്‍സ് തുകയിലും ബാങ്ക് വര്‍ധനവ് വരുത്തിയിട്ടുണ്ട്.

ടെലികോം റെഗുലേറ്ററി അതോറിറ്റി ഓഫ് ഇന്ത്യ (ട്രായ്)യുടെ പുതുക്കിയ നയങ്ങള്‍ക്കനുസരിച്ച് ആക്‌സിസ് ബാങ്ക് തങ്ങളുടെ എസ്എംഎസ് സേവനങ്ങളുടെ പലിശ നിരക്കും പുതുക്കി നിശ്ചയിച്ചിരിക്കുകയാണ്. 2021 ജൂലൈ 1 മുതല്‍ ഓരോ എസ്എംഎസ് അലേര്‍ട്ടിനും 25 പൈസാ വീതമാണ് ബാങ്ക് ഉപയോക്താവില്‍ നിന്നും ഈടാക്കുക.

ഒരു മാസം ഈടാക്കുന്ന പരമാവധി തുക 25 രൂപയായിരിക്കും. പ്രമോഷണല്‍ എസ്എംഎസ് സന്ദേശങ്ങള്‍, ഉപയോക്താവിന് അയയ്ക്കുന്ന എസ്എംഎസ് സന്ദേശങ്ങള്‍, ഉപയോക്താവിന് അയയ്ക്കുന്ന ഒടിപി സന്ദേശങ്ങള്‍ എന്നിവ ഈ എസ്എംഎസ് സേവനങ്ങളുടെ പരിധിയില്‍ ഉള്‍പ്പെടും. നേരത്തേ മാസം 5 രൂപയായിരുന്നു ആക്‌സിസ് ബാങ്ക് എസ്എംഎസ് സേവനങ്ങള്‍ക്കുള്ള ചാര്‍ജായി ഈടാക്കിയിരുന്നത്.

അതേ സമയം ഡിജിറ്റല്‍ സേവനങ്ങള്‍ മെച്ചപ്പെടുത്തുന്നതിനായി ആമസോണ്‍ വെബ് സര്‍വീസസുമായി ആക്‌സിസ് ബാങ്ക് ഒരു കരാര്‍ തയ്യാറാക്കിയിട്ടുണ്ട്. ആറ് മിനുട്ടുകള്‍ കൊണ്ട് ഓണ്‍ലൈനായി അക്കൗണ്ട് ആരംഭിക്കുവാനും തത്സമയ ഡിജിറ്റല്‍ പെയ്‌മെന്റുകളും തുടങ്ങി ഉപഭോക്താക്കള്‍ക്ക് ഡിജിറ്റല്‍ സേവനങ്ങളുടെ പുതിയ അനുഭവം വാഗ്ദാനം ചെയ്യുവാനാണ് ഇതിലൂടെ ആക്‌സിസ് ബാങ്ക് ലക്ഷ്യമിടുന്നത്.

നിലവില്‍ 200 മില്യണിലേറെ ഉപഭോക്താക്കളാണ് ആക്‌സിസ് ബാങ്കിനുള്ളത്.