വയോജനങ്ങൾക്ക് കൈത്താങ്ങായി 'ആയുഷ്മാൻ വായ വന്ദന' കാർഡ്; എങ്ങനെയെടുക്കാം? എന്തൊക്കെയാണ് നേട്ടങ്ങൾ?

വാർധക്യകാലത്തെ ചികിത്സാച്ചെലവ് പല കുടുംബങ്ങളെയും സാമ്പത്തിക പ്രതിസന്ധിയിലാക്കാറുണ്ട്. വാർധക്യകാലത്ത് വയോജനങ്ങളുടെ ആരോഗ്യ സുരക്ഷ ഉറപ്പാക്കുന്നതിനായി കേന്ദ്ര സർക്കാർ വിഭാവനം ചെയ്ത പദ്ധതിയാണ് 'ആയുഷ്മാൻ വയ വന്ദന' കാർഡ്. 70 വയസ്സും അതിനുമുകളിൽ പ്രായമുള്ളതുമായ എല്ലാ മുതിർന്ന പൗരന്മാർക്കും അഞ്ച് ലക്ഷം രൂപയുടെ സൗജന്യ ഇൻഷുറൻസ് പരിരക്ഷ ഉറപ്പാക്കുന്ന പദ്ധതിയാണിത്. ആയുഷ്മാൻ ഭാരത് പദ്ധതിയുടെ വിപുലീകരിച്ച രൂപമാണിത്. 

ആർക്കെല്ലാം അപേക്ഷിക്കാം?

സാമ്പത്തിക സ്ഥിതിയോ വരുമാന പരിധിയോ ജാതിയോ മതമോ പരിഗണിക്കാതെ, 70 വയസ്സ് തികഞ്ഞ ഇന്ത്യയിലെ ഏതൊരു പൗരനും ഈ പദ്ധതിയുടെ ഗുണഭോക്താവാകാം. ആധാർ കാർഡിലെ ജനനത്തീയതി പ്രകാരമാണ് പ്രായം കണക്കാക്കുന്നത്.

എത്ര രൂപയുടെ ഇൻഷുറൻസ് ലഭിക്കും?

ഒരു കുടുംബത്തിലെ 70 വയസ്സ് കഴിഞ്ഞ എല്ലാ മുതിർന്നവർക്കുമായി പ്രതിവർഷം 5 ലക്ഷം രൂപയുടെ ചികിത്സാ പരിരക്ഷയാണ് ലഭിക്കുന്നത്. നിലവിൽ ആയുഷ്മാൻ ഭാരത് കാർഡുള്ള കുടുംബമാണെങ്കിൽ, ആ കുടുംബത്തിന് ലഭിക്കുന്ന 5 ലക്ഷം രൂപയ്ക്ക് പുറമെ, മുതിർന്ന പൗരന്മാർക്കായി പ്രത്യേകമായി ഒരു 5 ലക്ഷം രൂപയുടെ 'ടോപ്പ്-അപ്പ്' കൂടി ലഭിക്കും. ഇത് അവർക്ക് മാത്രമായി ഉപയോഗിക്കാം. ഒരു വീട്ടിൽ 70 വയസ്സ് കഴിഞ്ഞ ദമ്പതികൾ ഉണ്ടെങ്കിൽ, അവർക്ക് രണ്ടുപേർക്കുമായി ഈ 5 ലക്ഷം രൂപ വീതിച്ചുപയോഗിക്കാം.

നിലവിൽ മറ്റ് ഇൻഷുറൻസ് ഉള്ളവർക്ക് ചേരാനാകുമോ?

നിലവിൽ സ്വകാര്യ ഇൻഷുറൻസ് പോളിസിയുള്ളവർക്കും വയ വന്ദന കാർഡിന് അപേക്ഷിക്കാം. ഇത് അധിക സുരക്ഷയായി ഉപയോഗിക്കാം. സി.ജി.എച്ച്.എസ്, ഇ.സി.എച്ച്.എസ് തുടങ്ങിയ സർക്കാർ ആരോഗ്യ പദ്ധതികളിൽ അംഗങ്ങളായവർക്ക് വേണമെങ്കിൽ ആയുഷ്മാൻ ഭാരതിലേക്ക് മാറാൻ അവസരമുണ്ട്. അല്ലെങ്കിൽ പഴയ പദ്ധതിയിൽ തന്നെ തുടരാം. ഇ.എസ്.ഐ ഗുണഭോക്താക്കൾക്കും ഈ പദ്ധതിയുടെ ഭാഗമാകാൻ തടസ്സമില്ല.

എന്തൊക്കെ ചികിത്സകൾ ലഭിക്കും?

പദ്ധതിയുടെ പട്ടികയിൽ ഉൾപ്പെട്ട സർക്കാർ ആശുപത്രികളിലും തിരഞ്ഞെടുത്ത സ്വകാര്യ ആശുപത്രികളിലും സൗജന്യ ചികിത്സ ലഭിക്കും. രജിസ്റ്റർ ചെയ്ത അന്നു മുതൽ തന്നെ ചികിത്സാ ആനുകൂല്യം ലഭ്യമാണ്. നിലവിലുള്ള അസുഖങ്ങൾക്കും ആദ്യ ദിവസം മുതൽ തന്നെ പരിരക്ഷ ലഭിക്കുമെന്നത് വയോജനങ്ങൾക്ക് വലിയ ആശ്വാസമാണ്.

എങ്ങനെ അപേക്ഷിക്കണം?

ലളിതമായ രീതിയിൽ ഓൺലൈൻ വഴി തന്നെ ഇതിനായി അപേക്ഷിക്കാം. പ്ലേ സ്റ്റോറിൽ നിന്ന് 'Ayushman App' ഡൗൺലോഡ് ചെയ്യുക. 'Beneficiary' ഓപ്ഷൻ തിരഞ്ഞെടുത്ത് മൊബൈൽ നമ്പർ നൽകി ഒ.ടി.പി വഴി ലോഗിൻ ചെയ്യുക. ആധാർ കാർഡ് വിവരങ്ങൾ നൽകി ഇ-കെവൈസി പൂർത്തിയാക്കുക. അപേക്ഷകന്റെ ലൈവ് ഫോട്ടോ എടുത്ത് അപ്‌ലോഡ് ചെയ്യണം. അപേക്ഷ സമർപ്പിച്ച് കുറഞ്ഞ സമയത്തിനുള്ളിൽ തന്നെ 'ആയുഷ്മാൻ വയ വന്ദന കാർഡ്' ഡൗൺലോഡ് ചെയ്ത് എടുക്കാം.

വാർധക്യകാലത്തെ ചികിത്സാച്ചെലവുകൾ മക്കളെ ആശ്രയിക്കാതെ തന്നെ നേരിടാൻ മുതിർന്ന പൗരന്മാരെ പ്രാപ്തരാക്കുന്ന വിപ്ലവകരമായ നീക്കമാണിത്. അർഹരായ എല്ലാ മുതിർന്നവരും ഈ കാർഡ് എടുക്കുന്നുണ്ടെന്ന് ഉറപ്പുവരുത്തേണ്ടത് ഓരോ കുടുംബത്തിന്റെയും ഉത്തരവാദിത്തമാണ്.