ബാങ്ക് എഫ്ഡി vs പിഒഎംഐഎസ്: മികച്ചത് ഏത്? പ്രതിമാസം വരുമാനം കൂടുതൽ എവിടെ?

നിക്ഷേപകർ വ്യത്യസ്തരാണ് എന്നതുപോലെ തന്നെ അവരുടെ നിക്ഷേപങ്ങളിൽ നിന്ന് വ്യത്യസ്ത ലക്ഷ്യങ്ങളും പ്രതീക്ഷകളുമായിരിക്കും ഉള്ളത്. ഇത്തരത്തിൽ വ്യത്യസ്ത ലക്ഷ്യങ്ങളിലേക്ക് എത്താൻ സാധിക്കുന്ന നിരവധി നിക്ഷേപ രീതികളും അവസരങ്ങളും ഇന്ന് വിപണിയിൽ ലഭ്യവുമാണ്. സുനിശ്ചിത വരുമാനത്തിനായി നിക്ഷേപിക്കുന്ന ആളുകളുടെ എണ്ണത്തിൽ കാര്യമായ വർധനവ് അടുത്ത കാലത്ത് ഉണ്ടായിട്ടുണ്ട്. അങ്ങനെ സ്ഥിരമായ പ്രതിമാസ വരുമാനത്തിനാണ് മുൻഗണന നൽകുന്നവർക്ക് തിരഞ്ഞെടുക്കാൻ സാധിക്കുന്നതും ഏറ്റവും കൂടുതൽ ആളുകൾ തിരഞ്ഞെടുത്തിട്ടുള്ളതുമായ രണ്ട് രീതികളാണ് ബാങ്ക് എഫ്ഡി അഥവ സ്ഥിര നിക്ഷേപവും പോസ്റ്റ് ഓഫീസ് പ്രതിമാസ വരുമാന പദ്ധതിയും (പിഒഎംഐഎസ്). ഈ ജനപ്രിയ നിക്ഷേപ മാർഗങ്ങൾ വ്യക്തികളെ അവരുടെ ഫണ്ടുകൾ സുരക്ഷിതമായി നിക്ഷേപിക്കാനും പതിവ് പേഔട്ടുകൾ ആസ്വദിക്കാനും അനുവദിക്കുന്നു.

ബാങ്കുകളും ബാങ്കിതര ധനകാര്യ സ്ഥാപനങ്ങളും എഫ്ഡി സ്കീം വാഗ്ദാനം ചെയ്യുന്നു. ഇതൊരു പരമ്പരാഗത നിക്ഷേപ രീതിയുമാണ്. അതിൽ ഒരാൾ ഒരു നിശ്ചിത കാലയളവിനായി നിശ്ചിത പലിശ നിരക്കിൽ ഒറ്റത്തവണ തുക നിക്ഷേപിക്കുന്നു. പ്രതിമാസമോ മെച്വൂരിറ്റി കാലയളവിന് ശേഷമോ പലിശ തുക പിൻവലിക്കാൻ നിക്ഷേപകന് സാധിക്കും. തിർന്ന പൗരന്മാർക്ക് സാധാരണ വ്യക്തികളേക്കാൾ ഉയർന്ന പലിശ നിരക്കും പല ബാങ്കുകളും വാഗ്ദാനം ചെയ്യുന്നു. ഏഴ് ദിവസം മുതൽ 10 വർഷം വരെയാണ് എഫ്ഡിയിൽ നിക്ഷേപ കാലാവധി. നിക്ഷേപകർക്ക് പ്രതിമാസ, ത്രൈമാസ, അർദ്ധ വാർഷിക അല്ലെങ്കിൽ വാർഷിക പലിശ പേഔട്ടുകളും തിരഞ്ഞെടുക്കാം. പകരമായി, കാലാവധി പൂർത്തിയാകുമ്പോൾ അവർക്ക് പലിശ പേഔട്ട് തിരഞ്ഞെടുക്കാം. ധനകാര്യ സ്ഥാപനങ്ങൾ ദൈർഘ്യമേറിയ നിക്ഷേപ കാലയളവുകളിൽ ഉയർന്ന പലിശ നിരക്കുകൾ വാഗ്ദാനം ചെയ്യുന്നു.

ഉദാഹരണത്തിന്, ഒരു നിക്ഷേപകൻ 8 ശതമാനം പലിശ നിരക്കിൽ അഞ്ച് ലക്ഷത്തിന്റെ സ്ഥിരനിക്ഷേപ അക്കൗണ്ട് അഞ്ച് വർഷത്തേക് തുറക്കുകയാണെങ്കിൽ മൊത്തം പലിശ 2,34,664 രൂപ ആയിരിക്കും. കാലാവധി പൂർത്തിയാകുമ്പോൾ മൊത്തം വരുമാനം 7,34,664 രൂപയും ആയിരിക്കും. ഇതിൽ നിന്ന് ലഭിക്കുന്ന പ്രതിമാസ വരുമാനം 3,333 രൂപ ആണ്. അവർ തിരഞ്ഞെടുക്കുന്ന അക്കൗണ്ട് തരം, ക്യുമുലേറ്റീവ് എഫ്ഡി അല്ലെങ്കിൽ നോൺ-ക്യുമുലേറ്റീവ് എഫ്ഡി എന്നിവയെ അടിസ്ഥാനമാക്കി ഒരാൾക്ക് അവരുടെ സ്ഥിരനിക്ഷേപത്തിന് ലഭിക്കുന്ന പലിശ വ്യത്യാസപ്പെടാം എന്ന കാര്യം ശ്രദ്ധിക്കുക.

നിക്ഷേപങ്ങളിൽ ആകർഷകമായ വരുമാനം വാഗ്ദാനം ചെയ്യുന്ന പോസ്റ്റ് ഓഫീസ് മന്ത്ലി ഇൻകം സ്കീം പോലെയുള്ള നിരവധി വ്യത്യസ്ത സ്കീമുകൾ പോസ്റ്റ് ഓഫീസ് വാഗ്ദാനം ചെയ്യുന്നു. പിഒഎംഐഎസ് പദ്ധതിയിലെ നിക്ഷേപകർക്ക് 7.4 ശതമാനം പലിശയാണ് ഇപ്പോൾ ലഭിക്കുന്നത്. എല്ലാ മാസവും പലിശ പേഔട്ടുകൾ സ്വീകരിക്കാനും കഴിയും.

ഒരു നിക്ഷേപകൻ 5 വർഷത്തേക്ക് പോസ്റ്റ് ഓഫീസ് പ്രതിമാസ വരുമാന പദ്ധതിയിൽ 5 ലക്ഷം രൂപ നിക്ഷേപിക്കുന്നു എന്ന് കരുതുക. പോസ്റ്റ് ഓഫീസ് മന്ത്ലി ഇൻകം സ്കീം പ്രതിമാസം നൽകേണ്ട പലിശ നിരക്ക് നിലവിൽ 7.4 ശതമാനം ആണ്. ഈ പലിശ നിരക്ക് അനുസരിച്ച്, നിക്ഷേപത്തിൽ അവർക്ക് ലഭിക്കുന്ന പ്രതിമാസ വരുമാനം 3,083 രൂപ ആയിരിക്കും. നിക്ഷേപ കാലയളവിന്റെ അവസാനം അവർ നേടുന്ന മൊത്തം പലിശ 1,84,980 രൂപ ആയിരിക്കും. അതിനാൽ, അവരുടെ പിഒഎംഐഎസ് നിക്ഷേപത്തിന്റെ കാലാവധി പൂർത്തിയാകുമ്പോൾ മൊത്തം വരുമാനം 6,84,980 രൂപ ആയിരിക്കും.