ബെംഗളൂരു മെട്രോ യെല്ലോ ലൈനിൽ പുതിയ ബസ് സ്റ്റോപ്പുകൾ; യാത്രക്കാർക്ക് ആശ്വാസം

ബെംഗളൂരു: ആർ.വി റോഡ് മുതൽ ബൊമ്മസന്ദ്ര വരെയുള്ള ബെംഗളൂരു മെട്രോയുടെ യെല്ലോ ലൈനിൽ യാത്രക്കാരുടെ സൗകര്യം കണക്കിലെടുത്ത് പുതിയ ബസ് സ്റ്റോപ്പുകൾ സ്ഥാപിക്കുന്നു. മെട്രോ സ്റ്റേഷനുകളിൽ നിന്ന് മറ്റ് സ്ഥലങ്ങളിലേക്കുള്ള യാത്ര സുഗമമാക്കുന്നതിനായി ബാംഗ്ലൂർ മെട്രോ റെയിൽ കോർപ്പറേഷൻ ലിമിറ്റഡും ബാംഗ്ലൂർ മെട്രോപൊളിറ്റൻ ട്രാൻസ്പോർട്ട് കോർപ്പറേഷനും സംയുക്തമായാണ് ഈ നടപടി സ്വീകരിച്ചിരിക്കുന്നത്.

 

ബയോക്കോൺ ഹെബ്ബഗോഡി, ബേരതന അഗ്രഹാര, സിംഗസന്ദ്ര, ഹോംഗസന്ദ്ര, സെൻട്രൽ സിൽക്ക് ബോർഡ്, ആർ.വി റോഡ് എന്നീ സ്റ്റേഷനുകളിൽ പുതിയ ബസ് സ്റ്റോപ്പുകൾ പ്രവർത്തനസജ്ജമായതായി ബി.എം.ആർ.സി.എൽ അറിയിച്ചു. ഇലക്ട്രോണിക് സിറ്റി, ഹോസ റോഡ്, രാഗിഗുഡ്ഡ എന്നീ സ്ഥലങ്ങളിലെ നിലവിലുള്ള ബസ് സ്റ്റോപ്പുകൾ മെട്രോ സ്റ്റേഷനുകൾക്ക് തൊട്ടടുത്തേക്ക് മാറ്റി സ്ഥാപിക്കാൻ തീരുമാനിച്ചിട്ടുണ്ട്. ഇതുവഴി യാത്രക്കാർക്ക് മെട്രോയിൽ നിന്ന് ഇറങ്ങി ബസ് കയറാനുള്ള ദൂരം കുറയ്ക്കാൻ സഹായിക്കും.

 

 

കഴിഞ്ഞ ഓഗസ്റ്റിലാണ് ബെംഗളൂരു മെട്രോയുടെ (നമ്മ മെട്രോ) പുതിയ യെല്ലോ ലൈന്‍ പ്രധാനമന്ത്രി നരേന്ദ്രമോദി ഉദ്ഘാടനം ചെയ്തത്. ആര്‍വി റോഡ് മുതല്‍ ബൊമ്മസാന്ദ്ര വരെ 19 കിലോമീറ്റര്‍ നീളത്തിലുള്ള പുതിയ മെട്രോ പാതയാണ് പ്രധാനമന്ത്രി തുറന്നുകൊടുത്തത്. 5,056.99 കോടി രൂപ മുടക്കിയാണ് യെല്ലോ ലൈന്‍ നിര്‍മാണം പൂര്‍ത്തിയാക്കിയത്.  ആര്‍വിറോഡ്, ഹൊസ റോഡ്, കുട്ലു ഗേറ്റ്, ബൊമ്മനഹള്ളി, ഇലക്ട്രോണിക് സിറ്റി തുടങ്ങി 16 സ്റ്റേഷനുകള്‍ ഈ റൂട്ടിലുണ്ട്. 

 

പൂര്‍ണമായും ആകാശപ്പാതയിലൂടെയുള്ള ഈ മെട്രോ സര്‍വീസ് നഗരത്തിലെ വൻ ഗതാഗത കുരുക്ക് കുറയ്ക്കുന്നതിന് ഒരുപരിധിവരെ സഹായമായിട്ടുണ്ട്.  നിലവില്‍ ഈ റൂട്ടില്‍ പ്രതിദിനം ഒരു ലക്ഷത്തിലേറെ പ്പേര്‍ യാത്രചെയ്യുന്നുണ്ടെന്നാണ് കണക്കുകള്‍. യെല്ലോ ലൈനിനു പുറമേ ഗ്രീന്‍, പര്‍പ്പിള്‍ ലൈനുകളാണ് ബെംഗളൂരു മെട്രോയ്ക്ക് ഉള്ളത്.