മക്കൾക്ക് വേണ്ടി 50 ലക്ഷം രൂപ സമ്പാദിക്കാം; സുരക്ഷിത നിക്ഷേപം ഇതാ

ഭാവി മുന്നിൽക്കണ്ട് മക്കൾക്കായി നിക്ഷേപിക്കാൻ ഒരുങ്ങുന്നവർ തേടി നടക്കുന്നത് സുരക്ഷിത നിക്ഷേപമാണ്. റിസ്ക് കുറഞ്ഞതും മികച്ച റിട്ടേൺ ലഭിക്കുന്നതുമായ നിക്ഷേപം ഇത്തരക്കാർ നോക്കും. അക്കൂട്ടത്തിൽ ഒന്നാണ് സുകന്യ സമൃദ്ധി യോജന. കേന്ദ്ര സർക്കാർ പിന്തുണയുള്ള ലഘു സമ്പാദ്യ പദ്ധതികളിൽ ഒന്നാണിത്.

ആർക്കൊക്കെ അക്കൗണ്ട്

1 വയസ് മുതൽ 10 വയസിനുള്ളിൽ സുകന്യ സമൃദ്ധി യോജനയിൽ അക്കൗണ്ടെടുക്കാം. പൂർണമായും റിസ്‌ക് ഒഴിഞ്ഞ പദ്ധതിയിൽ 15 വർഷം നിക്ഷേപിക്കാൻ സാധിക്കും.വർഷത്തിൽ നിക്ഷേപിക്കാവുന്ന ഏറ്റവും കുറഞ്ഞ തുക 250 രൂപയാണ്. 1.5 ലക്ഷം രൂപ വരെ പ്രതിവർഷം നിക്ഷേപിക്കാം. അക്കൗണ്ടെടുത്ത് 21-ാം വർഷം നിക്ഷേപം പിൻവലിക്കാം. പെൺകുട്ടിക്ക് 18 വയസ് പൂർത്തിയാകുന്ന സമയത്ത് നിക്ഷേപത്തിൽ നിന്ന് 50 ശതമാനം തുക പിൻവലിക്കാം.

പലിശ നിരക്ക്

സുകന്യ സമൃദ്ധി യോജനയിൽ 8.2 ശതമാനം പലിശയാണ് സർക്കാർ നൽകുന്നത്.
പെൺകുട്ടി ജനിച്ചയുടനെ സുകന്യ സമൃദ്ധി യോജനയിൽ അക്കൗണ്ടെടുക്കാം. ഇങ്ങനെ അക്കൗണ്ടെടുത്ത വ്യക്തി 15 വർഷത്തേക്ക് നിക്ഷേപിക്കുമ്പോൾ പെൺകുട്ടിക്ക് 14 വയസ് തികയുന്നത് വരെ നിക്ഷേപിക്കണം.

നികുതി ഇളവ്

സുകന്യ സമൃദ്ധി യോജനയിൽ നിക്ഷേപിക്കുന്ന തുകയ്ക്ക് ആദായ നികുതി നിയമത്തിലെ സെക്ഷൻ 80സി പ്രകാരം 1.50 ലക്ഷം രൂപ വരെ നികുതി ഇളവ് ലഭിക്കും. പരമാവധി നിക്ഷേപിക്കാവുന്ന തുക 1.50 ലക്ഷമായതിനാൽ നിക്ഷേപിക്കുന്ന തുകയ്ക്ക് പൂർണമായും നികുതി ഇളവ് ലഭിക്കും. ഇതോടൊപ്പം പലിശ വരുമാനത്തിനും കാലാവധിയിൽ ലഭിക്കുന്ന തുകയ്ക്കും പൂർണമായും നികുതി ഇളവ് ലഭിക്കും.