10 ലക്ഷമല്ല, ഇനി 20 ലക്ഷം വായ്പ എടുക്കാം, ഈ പദ്ധതിയുടെ വായ്പ പരിധി വർധിപ്പിച്ച് ധനമന്ത്രി, പ്രഖ്യാപനം ബജറ്റിൽ

ചെറുകിട വ്യവസായ പദ്ധതികൾ ആരംഭിക്കാൻ പണം കണ്ടെത്തുക എന്നതായിരുന്നു ഇടത്തരം യുവാക്കൾ നേരിട്ട ഏറ്റവും വലിയ പ്രതിസന്ധി. ബാങ്കുകളിൽ വായ്പയ്ക്ക് പോയാൽ ഈട് നൽകാതെ വായ്പ കിട്ടില്ല. എന്നാൽ 2015-ൽ കേന്ദ്രസർക്കാർ പ്രഖ്യാപിച്ച ഏറ്റവും വലിയ പദ്ധതികളിലൊന്നായിരുന്നു പ്രധാനമന്ത്രി മുദ്ര യോജന (പിഎംഎംവൈ). കോർപ്പറേറ്റ് ഇതര, കാർഷികേതര ചെറുകിട, സൂക്ഷ്മ സംരംഭകർക്ക് ഈട് രഹിത വായ്പ നൽകുക എന്നതായിരുന്നു പദ്ധതിയുടെ ലക്ഷ്യം.

രാജ്യത്തെ കോടിക്കണക്കിന് വരുന്ന യുവാക്കൾ പദ്ധതിയെ കൃത്യമായി പ്രയോജനപ്പെടുത്തുകയും മികച്ച നേട്ടമുണ്ടാക്കുകയും ചെയ്തു. രാജ്യത്തെ യുവ സംരംഭകർക്ക് ആശ്വാസം നൽകി മുദ്രാ വായ്പ പരിധി ഉയർത്തുന്നു എന്ന നിർണ്ണായക പ്രഖ്യാപനം നിർമ്മല സീതാരാമൻ ഇന്ന് അവതരിപ്പിച്ച ബജറ്റിൽ നടത്തി.

ഇരട്ടി തുക നേടാം

പ്രധാനമന്ത്രി മുദ്ര യോജനയുടെ വായ്പ തുക ഇരട്ടിയാക്കുകയാണ് എന്ന പ്രഖ്യാപനമാണ് ധനമന്ത്രി നടത്തിയത്. വായ്പ തുക 10 ലക്ഷത്തിൽ നിന്നും 20 ലക്ഷമായാണ് ഉയർത്തിയത്. എംഎസ്എംഇകൾക്ക് ഈടില്ലാതെ വായ്പ നൽകുമെന്നും പ്രത്യേക സഹായ ഫണ്ട് ആയിരം കോടി വകയിരുത്തുമെന്നും ബജറ്റിൽ പ്രഖ്യാപിച്ചു. എംഎസ്എംഇ ക്ലസ്റ്ററുകളിൽ പ്രത്യേക സിഡ്ബി ശാഖകൾ തുടങ്ങുമെന്നും ഈ വർഷം 24 ശാഖകൾ തുറക്കുമെന്നും ധനമന്ത്രി.

വായ്പ അർക്കെല്ലാം ലഭിക്കും

ചെറുകിട ബിസിനസ് ആരംഭിക്കുന്നവർക്കാണ് മുദ്രാ ബാങ്ക് വഴി വായ്പകൾ ലഭിക്കുക. യുവ സംരംഭകർ, തൊഴിൽ നൈപുണ്യമുള്ളവർ, വനിതാ സംരംഭകർ എന്നിവർക്ക് മുൻതൂക്കം നൽകും. ബിസിനസിന് ആവശ്യമായ ഉപകരണങ്ങൾ വാങ്ങുന്നതിനും മറ്റും നിങ്ങൾക്ക് ഈ വായ്പ തുക ചെലവാക്കാം.

വായ്പ എങ്ങനെ ലഭിക്കും?

മുദ്രാബാങ്കുകൾ എന്ന പേരിൽ രാജ്യത്ത് ബാങ്കുകൾ ഇല്ല. നിങ്ങളുടെ അടുത്തുള്ള സ്വകാര്യ പൊതുമേഖല മാങ്കുകളുടെ ബാങ്കിന്റെ ബ്രാഞ്ചിൽ പോയി വായ്പയ്ക്കായി അപേക്ഷിക്കാം. യോഗ്യത മാനദണ്ഡങ്ങൾ പരിശോധിച്ച ശേഷം നിങ്ങൾ അർഹരാണെങ്കിൽ വായ്പ ലഭിക്കും.

എങ്ങനെ അപേക്ഷിക്കാം?

അപേക്ഷകർക്ക് www.udyamimitra.in എന്ന ഔദ്യോഗിക വെബ്സൈറ്റ് സന്ദർശിക്കാവുന്നതാണ്