സ്വന്തമായി വീട് പണിയാം: ഭവന വായ്പ, നികുതി ആനുകൂല്യങ്ങൾ; നിങ്ങൾ അറിയേണ്ടതെല്ലാം

സ്വന്തമായി ഒരു വീട് എന്നത് ഏതൊരു സാധാരണക്കാരന്റെയും സ്വപ്നമാണ്. എന്നാൽ വീടുപണിക്കായി വായ്പ എടുക്കുമ്പോഴും നികുതി ആനുകൂല്യങ്ങൾ കണക്കാക്കുമ്പോഴും കൃത്യമായ ധാരണയില്ലെങ്കിൽ അത് വലിയ ബാധ്യതയായേക്കാം. സ്വന്തം സ്ഥലത്ത് വീട് പണിയാൻ ആഗ്രഹിക്കുന്നവർ അറിഞ്ഞിരിക്കേണ്ട ലോൺ യോഗ്യതകൾ, നികുതി നിയമങ്ങൾ, ഇ.എം.ഐ നിയമങ്ങൾ എന്നിവയെക്കുറിച്ച് നോക്കാം.

ഒരു ഭവന വായ്പ എടുക്കുന്ന കാര്യത്തിൽ, നിർമ്മാണം പൂർത്തിയായ ഒരു വീട് വാങ്ങുന്നതും, നിർമ്മാണത്തിലിരിക്കുന്ന ഒരു വീട് ബുക്ക് ചെയ്യുന്നതും വായ്പ നൽകുന്നവർ ഒരേ രീതിയിലാണ് പരിഗണിക്കുന്നത്. എന്നിരുന്നാലും, നിർമ്മാണത്തിലിരിക്കുന്ന ഒരു വസ്തുവിനുള്ള വായ്പയുടെ കാര്യത്തിൽ, നിർമ്മാണത്തിന്റെ പുരോഗതിക്ക് അനുസൃതമായി ഘട്ടംഘട്ടമായാണ് പണം അനുവദിക്കുന്നത്. ഇത്തരം വസ്തുക്കൾക്ക് വായ്പ നൽകാൻ പല ബാങ്കുകളും തയ്യാറാണ്.

സ്വന്തമായി വീട് പണിയുമ്പോൾ വായ്പ ലഭിക്കുന്നത് എങ്ങനെ?

നിങ്ങളുടെ സ്വന്തം സ്ഥലത്ത് സ്വയം വീട് നിർമ്മിക്കുന്ന സാഹചര്യത്തിൽ, വായ്പ നൽകാൻ തയ്യാറുള്ള ബാങ്കുകളുടെയോ സ്ഥാപനങ്ങളുടെയോ എണ്ണം താരതമ്യേന കുറവായിരിക്കും. എല്ലാ ബാങ്കുകളും സ്വയം നിർമ്മിക്കുന്ന വീടുകൾക്ക് വായ്പ നൽകാൻ താല്പര്യം കാണിക്കാറില്ല. അതിനാൽ വായ്പ എടുക്കുന്നതിന് മുൻപ് ബാങ്കുകളുടെ നിബന്ധനകൾ കൃത്യമായി പരിശോധിക്കുക. ഇത്തരം സാഹചര്യങ്ങളിൽ വസ്‌തു വാങ്ങുന്നതിനും അതിന്റെ നിർമ്മാണത്തിനുമുള്ള ചിലവുകൾ ഒരുമിച്ച് ഉൾക്കൊള്ളുന്ന 'കോമ്പോസിറ്റ് ലോൺ' നിങ്ങൾക്ക് തിരഞ്ഞെടുക്കാം.

നിർമ്മാണത്തിനായി നിങ്ങൾ മുൻകൂട്ടി നിശ്ചയിച്ച നിങ്ങളുടെ വിഹിതം പൂർണ്ണമായും ചിലവഴിച്ചതിന് ശേഷം മാത്രമേ ബാങ്ക് ബാക്കി തുക നൽകിത്തുടങ്ങുകയുള്ളൂ. പണി പൂർത്തിയായ വീടുകൾക്ക് വായ്പ തുക ഒന്നിച്ച് ലഭിക്കുമ്പോൾ, വീട് പണിക്കായി എടുക്കുന്ന വായ്പകൾ നിർമ്മാണത്തിന്റെ ഓരോ ഘട്ടത്തിലായാണ് ബാങ്കുകൾ അനുവദിക്കുക. നിങ്ങളുടെ ആർക്കിടെക്റ്റോ സിവിൽ എഞ്ചിനീയറോ നൽകുന്ന സർട്ടിഫിക്കറ്റിന്റെ അടിസ്ഥാനത്തിൽ, വിവിധ ഘട്ടങ്ങളിലായാണ് ബാങ്ക് പണം അനുവദിക്കുന്നത്. 

നിർമ്മാണത്തിന്റെ ഓരോ ഘട്ടവും പൂർത്തിയായെന്ന് തെളിയിക്കുന്നതിനായി നിങ്ങൾ ഫോട്ടോകൾ സമർപ്പിക്കേണ്ടതുണ്ട്. ചില സന്ദർഭങ്ങളിൽ, നിങ്ങൾ നൽകുന്ന സർട്ടിഫിക്കറ്റിനെ മാത്രം ആശ്രയിക്കാതെ, നിർമ്മാണ പുരോഗതി നേരിട്ട് വിലയിരുത്താൻ ബാങ്ക് സ്വന്തം എഞ്ചിനീയറെയോ ആർക്കിടെക്റ്റിനെയോ നിയോഗിക്കാറുണ്ട്.

വായ്പ തുക മുഴുവനായി നൽകിക്കഴിഞ്ഞാൽ (സാധാരണയായി നിർമ്മാണം പൂർത്തിയാകുന്നതോടെ) ആണ് ഇത്തരം ലോണുകളുടെ തിരിച്ചടവ് ആരംഭിക്കുന്നത്. എന്നാൽ നിർമ്മാണം പൂർത്തിയായതിന് ശേഷം മാത്രമേ ഇഎംഐ തുടങ്ങാവൂ എന്ന് നിർബന്ധമില്ല എന്ന കാര്യം ശ്രദ്ധിക്കുക. നിങ്ങളുടെ കൃത്യമായ ഇഎംഐ  ആരംഭിക്കുന്നത് വരെ, വായ്പയായി ലഭിച്ച തുകയ്ക്ക് നിങ്ങൾ പലിശ അടയ്ക്കേണ്ടി വന്നേക്കാം. 

നികുതി ആനുകൂല്യങ്ങൾ

ആദായനികുതി നിയമത്തിലെ സെക്ഷൻ 80C, സെക്ഷൻ 24(b) എന്നിവ പ്രകാരം വീട് പണിയുന്നവർക്ക് ഇളവുകൾ ലഭിക്കും. സെക്ഷൻ 80C പ്രകാരം ഭവന വായ്പയുടെ മുതലിലേക്കുള്ള തിരിച്ചടവ്, കൂടാതെ യുഎൽഐപി, പിഎഫ്, പിപിഎഫ്, ഇഎൽഎസ്എസ്, എൻഎസ്‌സി തുടങ്ങിയ മറ്റ് നിക്ഷേപങ്ങൾ എന്നിവയുൾപ്പെടെ 1.5 ലക്ഷം രൂപ വരെയുള്ള തുക നികുതി ഇളവിനായി അവകാശപ്പെടാൻ നിങ്ങൾക്ക് അർഹതയുണ്ട്. ഈ വായ്പ ഒരു വീട് നിർമ്മിക്കുന്നതിനോ വാങ്ങുന്നതിനോ വേണ്ടിയുള്ളതും, ബാങ്കുകളിൽ നിന്നോ ഹൗസിംഗ് ഫിനാൻസ് കമ്പനികളിൽ നിന്നോ എടുത്തതുമായിരിക്കണം. എന്നാൽ വീട് പണി പൂർത്തിയാകുന്നതിന് മുൻപ് നിങ്ങൾ അടക്കുന്ന തുകയ്ക്ക് ഈ ഇളവ് ലഭിക്കില്ല. പണി പൂർത്തിയായ വർഷം മുതൽ മാത്രമേ ഇത് ക്ലെയിം ചെയ്യാനാവൂ. വീട് പണി കഴിഞ്ഞ് അഞ്ച് വർഷത്തിനുള്ളിൽ നിങ്ങൾ ആ വീട് വിൽക്കുകയാണെങ്കിൽ, നേരത്തെ ലഭിച്ച ഈ നികുതി ഇളവുകൾ റദ്ദാക്കപ്പെടുകയും ആ തുക നിങ്ങളുടെ വരുമാനമായി കണക്കാക്കി നികുതി ഈടാക്കുകയും ചെയ്യും.

പഴയ നികുതി വ്യവസ്ഥ പ്രകാരം, സ്വന്തം താമസത്തിനായുള്ള പരമാവധി രണ്ട് വീടുകൾക്ക് ചേർത്ത് 2 ലക്ഷം രൂപ വരെ പലിശ ഇളവ് ക്ലെയിം ചെയ്യാം. എന്നാൽ, വായ്പ എടുത്ത സാമ്പത്തിക വർഷം കഴിഞ്ഞ് അഞ്ച് വർഷത്തിനുള്ളിൽ വീടിന്റെ നിർമ്മാണം പൂർത്തിയായില്ലെങ്കിൽ, ഈ 2 ലക്ഷം രൂപ എന്ന പരിധി 30,000 രൂപയായി കുറയും. വീട് വാടകയ്ക്ക് നൽകിയതാണെങ്കിൽ, പലിശ തുക മുഴുവനായി ക്ലെയിം ചെയ്യാം. എങ്കിലും, വീട് വഴിയുള്ള നഷ്ടം മറ്റ് വരുമാനവുമായി തട്ടിക്കഴിക്കാൻ പഴയ നികുതി വ്യവസ്ഥയിൽ 2 ലക്ഷം രൂപ വരെ മാത്രമേ അനുവാദമുള്ളൂ.

നിങ്ങൾ പുതിയ നികുതി വ്യവസ്ഥയാണ് തിരഞ്ഞെടുക്കുന്നതെങ്കിൽ, സ്വന്തമായി താമസിക്കുന്ന വീടിന്റെ വായ്പാ പലിശയിന്മേൽ ഇളവുകൾ ലഭിക്കില്ല എന്നത് പ്രത്യേകം ശ്രദ്ധിക്കുക. എന്നാൽ വീട് വാടകയ്ക്ക് നൽകിയിരിക്കുകയാണെങ്കിൽ ചില നിബന്ധനകളോടെ ഇളവുകൾ ലഭ്യമാണ്. ശ്രദ്ധേയമായ മറ്റൊരു കാര്യം, വീടിന്റെ നിർമ്മാണം പൂർത്തിയായി അഞ്ച് വർഷത്തിനുള്ളിൽ അത് വിൽക്കുകയാണെങ്കിൽ, സെക്ഷൻ 24(b) പ്രകാരം ലഭിച്ച പലിശ ഇളവുകൾ തിരിച്ചെടുക്കാനുള്ള വ്യവസ്ഥകൾ നിയമത്തിലില്ല എന്നതാണ്.

ചുരുക്കത്തിൽ, വീട് പണി തുടങ്ങുന്നതിന് മുൻപ് കൃത്യമായ പ്ലാനിംഗും ബാങ്ക് നിബന്ധനകളെക്കുറിച്ചുള്ള അറിവും ഉണ്ടെങ്കിൽ സാമ്പത്തിക പ്രയാസങ്ങളില്ലാതെ നിങ്ങളുടെ സ്വപ്നഭവനം യാഥാർത്ഥ്യമാക്കാം. ഒരു വീടിന്റെ നിർമ്മാണം നിങ്ങൾക്ക് വിവിധ നികുതി ആനുകൂല്യങ്ങൾ നൽകുന്നുണ്ടെങ്കിലും, അവ നഷ്ടപ്പെടാതിരിക്കാൻ കൃത്യമായ സമയപരിധികൾ പാലിക്കേണ്ടതുണ്ട്.