ബിസിനസ് ക്രെഡിറ്റ് കാർഡ് vs ബിസിനസ് ലോൺ? സംരംഭത്തിന് അനുയോജ്യമായത് തിരഞ്ഞെടുക്കാം

ഒരു ബിസിനസ്സ് വളർത്തുന്ന ഘട്ടത്തിൽ പലപ്പോഴും നമുക്ക് അധിക സാമ്പത്തിക സഹായം ആവശ്യമായി വരാറുണ്ട്. ഇന്ത്യയിലെ ദശലക്ഷക്കണക്കിന് ചെറുകിട-ഇടത്തരം സംരംഭകർ നേരിടുന്ന പ്രധാന വെല്ലുവിളിയും കൃത്യസമയത്തുള്ള മൂലധന ലഭ്യതയാണ്. ഇത്തരം സാഹചര്യങ്ങളിൽ നമ്മുടെ മുന്നിലുള്ള രണ്ട് പ്രധാന വഴികളാണ് ബിസിനസ്സ് ക്രെഡിറ്റ് കാർഡുകളും ബിസിനസ്സ് ലോണുകളും. ഇവ രണ്ടും തമ്മിലുള്ള പ്രധാന വ്യത്യാസങ്ങൾ താഴെ പറയുന്നവയാണ്.

ബിസിനസ്സ് ക്രെഡിറ്റ് കാർഡ്

ദൈനംദിന ചെലവുകൾക്കും പെട്ടെന്നുണ്ടാകുന്ന സാമ്പത്തിക ആവശ്യങ്ങൾക്കും ഏറ്റവും അനുയോജ്യമായ ഒന്നാണ് ബിസിനസ്സ് ക്രെഡിറ്റ് കാർഡുകൾ. ആവശ്യാനുസരണം പണം ഉപയോഗിക്കാം, കൃത്യസമയത്ത് തിരിച്ചടച്ചാൽ റിവാർഡ് പോയിന്റുകളും ക്യാഷ്ബാക്കും ലഭിക്കും, പേഴ്സണൽ ചെലവുകളും ബിസിനസ്സ് ചെലവുകളും വേർതിരിച്ചു സൂക്ഷിക്കാൻ സഹായിക്കുന്നു എന്നിവയാണ് പ്രധാന ഗുണങ്ങൾ. ഓഫീസ് സാമഗ്രികൾ വാങ്ങുക, യാത്രകൾ, ചെറിയ രീതിയിലുള്ള സ്റ്റോക്ക് വാങ്ങൽ തുടങ്ങിയ ദൈനംദിന ആവശ്യങ്ങൾക്ക് ഇത് മികച്ചതാണ്.

ബിസിനസ്സ് ലോൺ

വലിയ നിക്ഷേപങ്ങൾക്കും ബിസിനസ്സ് വിപുലീകരണത്തിനുമാണ് സാധാരണയായി ബിസിനസ്സ് ലോണുകൾ ഉപയോഗിക്കുന്നത്. ഒരു നിശ്ചിത തുക ഒന്നിച്ച് ലഭിക്കുകയും അത് മാസത്തവണകളായി തിരിച്ചടയ്ക്കുകയും ചെയ്യുന്ന രീതിയാണിത്. കൂടുതൽ തുക വായ്പയായി ലഭിക്കുന്നു, ക്രെഡിറ്റ് കാർഡുകളെ അപേക്ഷിച്ച് പലിശ നിരക്ക് കുറവായിരിക്കും, തിരിച്ചടവിനായി കൃത്യമായ പ്ലാൻ ഉള്ളതിനാൽ സാമ്പത്തിക അച്ചടക്കം പാലിക്കാൻ സാധിക്കുന്നു എന്നിവയാണ് പ്രധാന ഗുണങ്ങൾ. പുതിയ മെഷിനറികൾ വാങ്ങുക, കട വിപുലീകരിക്കുക, കൂടുതൽ ജീവനക്കാരെ നിയമിക്കുക തുടങ്ങിയ വലിയ ലക്ഷ്യങ്ങൾക്കായി ലോൺ തിരഞ്ഞെടുക്കുന്നതാണ് ബുദ്ധി.

പലിശ നിരക്കിലെ മാറ്റം

ബിസിനസ്സ് ക്രെഡിറ്റ് കാർഡുകൾക്ക് 18% മുതൽ 36% വരെ യാണ് പലിശ. ഇത്തരത്തിൽ ഉയർന്ന പലിശ നിരക്കായതിനാൽ ഹ്രസ്വകാലത്തേക്ക് മാത്രമാണ് നല്ലത്. ബിസിനസ്സ് ലോണിന് 10% മുതൽ 24% വരെയാണ് പലിശ. താരതമ്യേന കുറഞ്ഞ നിരക്ക് ആയതിനാൽ ദീർഘകാലത്തേക്ക് അനുയോജ്യമാണ്.

നിങ്ങൾ ഏതാണ് തിരഞ്ഞെടുക്കേണ്ടത്?

നിങ്ങളുടെ ആവശ്യങ്ങൾ മുൻനിർത്തി വേണം തീരുമാനമെടുക്കേണ്ടത്. ചെറിയ കാര്യങ്ങൾക്കാണെങ്കിൽ ക്രെഡിറ്റ് കാർഡ് മതി. വലിയ ഇൻവെസ്റ്റ്‌മെന്റിന് ലോൺ തന്നെ വേണം. ലക്ഷക്കണക്കിന് രൂപ ഒന്നിച്ച് വേണമെങ്കിൽ ബിസിനസ്സ് ലോൺ ആണ് അഭികാമ്യം. ചുരുങ്ങിയ ദിവസത്തിനുള്ളിൽ തിരിച്ചടയ്ക്കാൻ കഴിയുമെങ്കിൽ ക്രെഡിറ്റ് കാർഡ് ഉപയോഗിക്കാം. വർഷങ്ങളെടുത്ത് തിരിച്ചടയ്ക്കാനാണെങ്കിൽ ലോൺ ആണ് ലാഭകരം.

ചുരുക്കത്തിൽ: ബിസിനസ്സ് നന്നായി മുന്നോട്ട് കൊണ്ടുപോകാൻ മിക്കവാറും സംരംഭകർ ഈ രണ്ട് സേവനങ്ങളും തന്ത്രപരമായി ഉപയോഗിക്കാറുണ്ട്. ദൈനംദിന ആവശ്യങ്ങൾക്ക് ക്രെഡിറ്റ് കാർഡും, വലിയ വികസന പ്രവർത്തനങ്ങൾക്ക് ലോണും ഉപയോഗിക്കുന്നതാണ് ഏറ്റവും മികച്ച രീതി. നിങ്ങളുടെ ബിസിനസ്സിന് ഏറ്റവും അനുയോജ്യമായ പ്ലാനുകൾ തിരഞ്ഞെടുക്കുന്നതിന് മുൻപ് ബാങ്കുകളുടെ നിബന്ധനകളും പലിശ നിരക്കുകളും കൃത്യമായി താരതമ്യം ചെയ്യാൻ മറക്കരുത്.