സ്‌മോള്‍ ഫിനാന്‍സ് ബാങ്കുകള്‍ പലിശ നിരക്കുകള്‍ കുറച്ചു

സ്‌മോള്‍ ഫിനാന്‍സ് ബാങ്കുകള്‍ സ്ഥിര നിക്ഷേപങ്ങള്‍ക്ക് മേല്‍ 7 ശതമാനത്തിന് മുകളില്‍ പലിശ നിരക്കുകള്‍ വാഗ്ദാനം ചെയ്തിരുന്ന സുവര്‍ണകാലം അവസാനിച്ചിരിക്കുകയാണ്. അവയില്‍ മിക്ക മാങ്കുകളും വിവിധ വിഭാഗങ്ങളിലായി പലിശ നിരക്കുകള്‍ കുറച്ചുകൊണ്ടിരിക്കുകയാണ്.

ഇതില്‍ ഏറ്റവും അവസാനം പലിശ നിരക്ക് കുറച്ചിട്ടുള്ളത് സൂര്യോദയ് സ്‌മോള്‍ ഫിനാന്‍സ് ബാങ്ക് ആണ്. 2021 ജൂണ്‍ 21 മുതല്‍ സൂര്യോദയ് സ്‌മോള്‍ ഫിനാന്‍സ് ബാങ്ക് സ്ഥിര നിക്ഷേപങ്ങളുടെ പലിശ നിരക്ക് 25 മുതല്‍ 100 ബേസിസ് പോയിന്റുകള്‍ വരെ കുറയ്ക്കും. വിവിധ കാലയളവുകളിലേക്കുള്ള സ്ഥിര നിക്ഷേപങ്ങളുടെ പലിശ നിരക്കില്‍ ഇത്തരത്തില്‍ കുറവുണ്ടാകും.

ഏറ്റവും വലിയ കുറവ് ഉണ്ടാവുക 5 വര്‍ഷത്തെ സ്ഥിര നിക്ഷേപങ്ങളുടെ പലിശ നിരക്കിലാണ്. 6.25 ശതമാനമായിരിക്കും 5 വര്‍ഷകാലയളവിലേക്കുള്ള സ്ഥിര നിക്ഷേപങ്ങളുടെ പലിശ നിരക്ക്. നേരത്തേ ഇത് 7.25 ശതമാനമായിരുന്നു. ഏറ്റവും കുറവ് ഇടിവുണ്ടാകുന്നത് 1 വര്‍ഷം മുതല്‍ 2 വര്‍ഷം വരെയുള്ള സ്ഥിര നിക്ഷേപങ്ങളുടെ പലിശ നിരക്കിലാണ്. 6.25 ശതമാനമായിരിക്കും പുതിയ പലിശ നിരക്ക്, നേരത്തേ ഇത് 6.75 ശതമാനമായിരുന്നു,

ഈ മാസത്തിന്റെ തുടക്കത്തില്‍ ക്യാപിറ്റല്‍ സ്‌മോള്‍ ഫിനാന്‍സ് ബാങ്ക്, ഇക്വിറ്റാസ് സ്‌മോള്‍ ഫിനാന്‍സ് ബാങ്ക് എന്നീ സ്‌മോള്‍ ഫിനാന്‍സ് ബാങ്കുകള്‍ നിക്ഷേപങ്ങളുടെ പലിശ നിരക്ക് കുറച്ചിരുന്നു. 900 ദിവസത്തെ സ്ഥിര നിക്ഷേപങ്ങള്‍ക്ക് 6.25 ശതമാനമെന്ന ഉയര്‍ന്ന പലിശ നിരക്കാണ് ക്യാപിറ്റല്‍ സ്‌മോള്‍ ഫിനാന്‍സ് ബാങ്ക് വാഗ്ദാനം ചെയ്തിരുന്നത്. 888 ദിവസത്തെ സ്ഥിര നിക്ഷേപങ്ങള്‍ക്ക് ഇക്വിറ്റാസ് സ്‌മോള്‍ ഫിനാന്‍സ് ബാങ്ക് 6.5 ശതമാനം പലിശ നിരക്കും നല്‍കിയിരുന്നു.

ഇക്വിറ്റാസ് സ്‌മോള്‍ ഫിനാന്‍സ് ബാങ്ക്, ഫിന്‍കെയര്‍ സ്‌മോള്‍ ഫിന്‍കെയര്‍ ബാങ്ക്, ജാനാ സ്‌മോള്‍ ഫിന്‍കെയര്‍ ബാങ്ക് എന്നിവ കഴിഞ്ഞ മാസം പലിശ നിരക്ക് കുറച്ചിരുന്നു.

സ്ഥിര നിക്ഷേപങ്ങള്‍ക്ക് മേല്‍ 7 ശതമാനം പലിശ നിരക്ക് വാഗ്ദാനം ചെയ്യുന്ന ബാങ്കുകള്‍ ഉത്കര്‍ഷ് സ്‌മോള്‍ ഫിനാന്‍സ് ബാങ്ക് (700 ദിവസത്തെ നിക്ഷേപങ്ങള്‍ക്ക്), നോര്‍ത്ത് ഈസ്റ്റ് സ്‌മോള്‍ ഫിനാന്‍സ് ബാങ്ക് (777 ദിവസത്തെ നിക്ഷേപങ്ങള്‍ക്ക്) എന്നിവയാണ്. ഇവയില്‍ മിക്ക ബാങ്കുകളും ഹ്രസ്വ കാല നിക്ഷേപങ്ങള്‍ക്ക് ഇപ്പോഴും ആകര്‍ഷകമാണ്. 1 വര്‍ഷം മുതല്‍ 3 വര്‍ഷം വരെയുള്ള സ്ഥിര നിക്ഷേപങ്ങള്‍ക്ക് അവ 6 ശതമാനം മുതല്‍ 6.5 ശതമാനം വരെയുള്ള പലിശ നിരക്കാണ് വാഗ്ദാനം ചെയ്യുന്നത്.

ആറ് വര്‍ഷങ്ങള്‍ക്ക് മുമ്പ് മാത്രമാണ് റിസര്‍വ് ബാങ്ക് സ്‌മോള്‍ ഫിനാന്‍സ് ബാങ്ക് ലൈസന്‍സ് അനുവദിക്കുന്നത്. ഹ്രസ്വകാല നിക്ഷേപങ്ങള്‍ക്ക് മാത്രമാണ് സാമ്പത്തീക വിദഗ്ധര്‍ സ്‌മോള്‍ ഫിനാന്‍സ് ബാങ്കുകളിലെ നിക്ഷേപങ്ങളെ പ്രോത്സാഹിപ്പിക്കുന്നത്.