ജോലി കിട്ടാനും ഇനി മികച്ച സിബിൽ സ്കോർ വേണം; തിരിച്ചടവ് മുടങ്ങിയാൽ പണി കിട്ടും

വായ്പ എടുക്കാനും ക്രെഡിറ്റ് കാർഡിനും അപേക്ഷിക്കുമ്പോൾ മാത്രം ശ്രദ്ധിച്ചിരുന്ന ഒന്നായിരുന്നു ഇതുവരെ നമ്മുടെ ക്രെഡിറ്റ് സ്കോർ അഥവാ സിബിൽ സ്കോർ. എന്നാൽ ഇനി മുതൽ കഥ മാറും. ബാങ്കിങ് മേഖലയിൽ ജോലി ആഗ്രഹിക്കുന്നവർക്ക് സിബിൽ സ്കോർ വില്ലനായേക്കാം എന്ന സൂചനയാണ് പുറത്തുവരുന്നത്. ബാങ്ക് ജീവനക്കാരുടെ നിയമനത്തിൽ ക്രെഡിറ്റ് ഹിസ്റ്ററി പരിശോധിക്കാൻ പൊതുമേഖലാ ബാങ്കുകൾക്ക് അനുമതി നൽകിയിരിക്കുകയാണ് കേന്ദ്ര സർക്കാർ.

എന്താണ് പുതിയ മാറ്റം?

രാജ്യസഭയിൽ ഉന്നയിക്കപ്പെട്ട ഒരു ചോദ്യത്തിന് മറുപടിയായി ധനമന്ത്രാലയ സഹമന്ത്രി പങ്കജ് ചൗധരിയാണ് ഇക്കാര്യം വ്യക്തമാക്കിയത്. ഐബിപിഎസ് വഴി തിരഞ്ഞെടുക്കപ്പെടുന്ന ഉദ്യോഗാർത്ഥികൾ ജോലിയിൽ പ്രവേശിക്കുന്ന സമയത്ത് മികച്ച ക്രെഡിറ്റ് ഹിസ്റ്ററി ഉള്ളവരായിരിക്കണം. ചുരുക്കത്തിൽ, പരീക്ഷ പാസായതുകൊണ്ട് മാത്രം ബാങ്കിൽ ജോലി ലഭിക്കണമെന്നില്ല, നിങ്ങളുടെ സാമ്പത്തിക അച്ചടക്കം കൂടി ബാങ്കുകൾ പരിശോധിക്കും.

എന്തുകൊണ്ട് സിബിൽ സ്കോർ നോക്കുന്നു?

പൊതുജനങ്ങളുടെ പണം കൈകാര്യം ചെയ്യുന്ന, വായ്പകൾ അനുവദിക്കുന്ന ഒരു സ്ഥാപനത്തിൽ ജോലി ചെയ്യുന്ന വ്യക്തിക്ക് സാമ്പത്തിക അച്ചടക്കം അത്യാവശ്യമാണെന്ന് ബാങ്കുകൾ കരുതുന്നു. സാമ്പത്തിക ക്രയവിക്രയങ്ങൾ നടത്തുന്ന ഉദ്യോഗസ്ഥർ തന്നെ കടക്കെണിയിലോ തിരിച്ചടവ് വീഴ്ചയിലോ പെടുന്നത് സ്ഥാപനത്തിന്റെ വിശ്വാസ്യതയെ ബാധിച്ചേക്കാം എന്ന വിലയിരുത്തലാണ് ഇതിന് പിന്നിൽ.

അറിഞ്ഞിരിക്കേണ്ട പ്രധാന കാര്യങ്ങൾ

അപേക്ഷിക്കാൻ തടസ്സമില്ല: ബാങ്ക് പരീക്ഷയ്ക്ക് അപേക്ഷിക്കാനോ പരീക്ഷ എഴുതാനോ സിബിൽ സ്കോർ ഒരു മാനദണ്ഡമല്ല. ജോലിയിൽ പ്രവേശിക്കുന്ന ഘട്ടത്തിലാണ് ഈ പരിശോധന നടക്കുക.

ബാങ്ക് അക്കൗണ്ട് ഇല്ലാത്തവർക്ക് ഇളവ്: നിലവിൽ ബാങ്ക് അക്കൗണ്ടോ ക്രെഡിറ്റ് ചരിത്രമോ ഇല്ലാത്ത ഉദ്യോഗാർത്ഥികളെ ഈ നിബന്ധന ബാധിക്കില്ല.

തീരുമാനം ബാങ്കുകളുടേത്: എത്ര സ്കോർ വേണമെന്ന കാര്യത്തിൽ ഓരോ ബാങ്കിനും സ്വന്തമായ തീരുമാനമെടുക്കാം. പരീക്ഷാ ഏജൻസിയായ ഐബിപിഎസ് അല്ല, മറിച്ച് നിയമനം നൽകുന്ന ബാങ്കാണ് സിബിൽ സ്കോർ പരിശോധിച്ച് അന്തിമ തീരുമാനമെടുക്കുന്നത്.

ആശങ്കപ്പെടണോ?

കഴിഞ്ഞ മൂന്ന് വർഷത്തിനിടെ സിബിൽ സ്കോറിലെ പ്രശ്നങ്ങൾ കാരണം ജോലി നഷ്ടമായത് കേവലം 20 പേർക്ക് മാത്രമാണ്. അതായത് ആകെ നിയമനം ലഭിച്ചവരിൽ വെറും 0.02 ശതമാനം മാത്രം. അതിനാൽ തന്നെ ഇതൊരു വലിയ വെല്ലുവിളിയായി കാണേണ്ടതില്ലെങ്കിലും, ഭാവിയിൽ ബാങ്ക് ജോലി സ്വപ്നം കാണുന്നവർ ക്രെഡിറ്റ് കാർഡ് ബില്ലുകളും ലോൺ ഇ.എം.ഐകളും കൃത്യസമയത്ത് അടച്ചുതീർത്ത് നല്ലൊരു ക്രെഡിറ്റ് സ്കോർ നിലനിർത്താൻ ശ്രദ്ധിക്കുന്നത് നന്നായിരിക്കും.

വിദ്യാഭ്യാസ വായ്പ എടുത്തവർക്ക് പ്രത്യേക പരിഗണന ലഭിക്കുമോ എന്ന കാര്യത്തിൽ വ്യക്തത വന്നിട്ടില്ലെങ്കിലും, മനഃപൂർവം തിരിച്ചടവ് മുടക്കുന്നവരെ മാത്രമായിരിക്കും ഇത് പ്രധാനമായും ബാധിക്കുക എന്നാണ് സൂചന.