എസ്ബിഐ സ്ഥിര നിക്ഷേപമോ പോസ്റ്റ് ഓഫീസ് നിക്ഷേപമോ കൂടുതല്‍ മികച്ചത്? പലിശ നിരക്കുകള്‍ പരിശോധിക്കാം

സുരക്ഷിതമായ നിക്ഷേപവും നിക്ഷേപത്തിന് മേല്‍ സ്ഥിരമായ ആദായവും ആഗ്രഹിക്കുന്നവരുടെ മികച്ച തിരഞ്ഞെടുപ്പാണ് സ്ഥിര നിക്ഷേപങ്ങള്‍. രാജ്യത്തെ എല്ലാ ബാങ്കുകളും തന്നെ ഹ്രസ്വകാല, ദീര്‍ഘകാല സ്ഥിര നിക്ഷേപ സേവനങ്ങള്‍ ഉപയോക്താക്കള്‍ക്കായി വാഗ്ദാനം ചെയ്യുന്നുണ്ട്. നിക്ഷേപകന്റെ ആവശ്യകതയും താത്പര്യവും അടിസ്ഥാനമാക്കി നിക്ഷേപത്തിന്റെ കാലാവധി തെരഞ്ഞടുക്കാവുന്നതാണ്. ബാങ്കുകളെക്കൂടാതെ പോസ്റ്റ് ഓഫീസുകളിലും സ്ഥിര നിക്ഷേപ സേവനം ലഭ്യമാണ്.

പോസ്റ്റ് ഓഫീസ് ടേം ഡെപ്പോസിറ്റുകള്‍ ബാങ്കുകളിലെ സ്ഥിര നിക്ഷേപത്തിന് സമാനമാണ്. ഒരു വര്‍ഷം മുതല്‍ അഞ്ച് വര്‍ഷം വരെയുള്ള കാലാവധിയില്‍ പോസ്റ്റ് ഓഫീസുകളില്‍ സ്ഥിര നിക്ഷേപ സേവനം ലഭ്യമാണ്. ഒരു വര്‍ഷം മുതല്‍ മൂന്ന് വര്‍ഷം വരെയുള്ള പോസ്റ്റ് ഓഫീസ് നിക്ഷേപങ്ങള്‍ക്ക് 5.5 ശതമാനം പലിശ നിരക്കാണ് ലഭിക്കുക. അഞ്ച് വര്‍ഷത്തേക്കുള്ള നിക്ഷേപങ്ങള്‍ക്ക് 6.7 ശതമാനവും പലിശ നിരക്ക് ലഭിക്കും.

എസ്ബിഐയിലെ 7 ദിവസം മുതല്‍ 45 ദിവസം വരെയുള്ള സ്ഥിര നിക്ഷേപങ്ങള്‍ക്ക് 2.9 ശതമാനം പലിശ നിരക്കാണ് ലഭിക്കുക. 46 ദിവസം മുതല്‍ 179 ദിവസം വരെയുള്ള നിക്ഷേപങ്ങള്‍ക്ക് 3.9 ശതമാനം പലിശ നിരക്ക് ലഭിക്കും. 180 ദിവസം മുതല്‍ ഒരു വര്‍ഷത്തിന് 1 ദിവസം കുറവ് വരെയുള്ള നിക്ഷേപത്തിന് 4.4 ശതമാനമാണ് പലിശ നിരക്ക് നല്‍കുന്നത്. 1 വര്‍ഷം മുതല്‍ 2 വര്‍ഷം വരെയുള്ള നിക്ഷേപങ്ങള്‍ക്ക് 5 ശതമാനം പലിശ നിരക്ക് ലഭിക്കും. രണ്ട് വര്‍ഷം മുതല്‍ 3 വര്‍ഷം വരെയുള്ള നിക്ഷേപങ്ങള്‍ക്ക് ലഭിക്കുന്ന പലിശ നിരക്ക് 5.1 ശതമാനമാണ്. 3 വര്‍ഷം മുതല്‍ 5 വര്‍ഷം വരെയുള്ള നിക്ഷേപങ്ങള്‍ക്ക് 5.3 ശതമാനം പലിശ നിരക്ക് ലഭിക്കും. 5 വര്‍ഷം മുതല്‍ 10 വര്‍ഷം വരെയുള്ള നിക്ഷേപങ്ങള്‍ക്ക് 5.4 ശതമാനമാണ് പലിശ നിരക്ക്.

മുതിര്‍ന്ന പൗരന്മാരുടെ സ്ഥിര നിക്ഷേപങ്ങള്‍ക്ക് എസ്ബിഐയില്‍ 3.4 ശതമാനം മുതല്‍ 6.2 ശതമാനം വരെ പലിശ നിരക്ക് ലഭിക്കും.