ക്രെഡിറ്റ് കാർഡ് എത്ര ഉപയോഗിച്ചാലും ചെലവ് കൂടില്ല; എന്താണ് ഇതിന് പിന്നിലെ രഹസ്യം?

ഇന്ന് മിക്കവാറും എല്ലാവരുടെയും പോക്കറ്റിൽ ഒന്നിലധികം ക്രെഡിറ്റ് കാർഡുകൾ കാണും. ഓരോ തവണ സാധനങ്ങൾ വാങ്ങുമ്പോഴും നാം കാർഡ് ഉരയ്ക്കാറുമുണ്ട്. എന്നാൽ അതിശയിപ്പിക്കുന്ന ഒരു കണക്കാണ് ഇപ്പോൾ പുറത്തുവരുന്നത്. ആളുകൾ ക്രെഡിറ്റ് കാർഡുകൾ ഉപയോഗിക്കുന്നത് വർദ്ധിച്ചെങ്കിലും, ഓരോ ഇടപാടിലും ചിലവാക്കുന്ന തുക കുറയുകയാണത്രേ!

പുതിയ റിപ്പോർട്ടുകൾ പ്രകാരം, ക്രെഡിറ്റ് കാർഡ് വിപണിയിൽ വലിയ മാറ്റങ്ങളാണ് പ്രകടമാകുന്നത്. വർദ്ധിച്ചുവരുന്ന ജീവിതച്ചെലവ്, കർശനമായ ക്രെഡിറ്റ് നിബന്ധനകൾ, ക്രെഡിറ്റ് കാർഡ് റിവാർഡ് ഘടനയിലെ മാറ്റങ്ങൾ എന്നിവയ്ക്കിടയിൽ ഇന്ത്യക്കാരുടെ ചെലവാക്കൽ ശീലങ്ങളിൽ വരുന്ന മാറ്റങ്ങളെയാണ് ഈ വ്യത്യാസം സൂചിപ്പിക്കുന്നത്.

1. ചെറിയ ഇടപാടുകൾക്കും കാർഡ് ആശ്രയിക്കുന്നു 

മുൻപ് വലിയ പർച്ചേസുകൾക്ക് മാത്രം ഉപയോഗിച്ചിരുന്ന ക്രെഡിറ്റ് കാർഡുകൾ ഇന്ന് ചായ കുടിക്കാനും പലചരക്ക് സാധനങ്ങൾ വാങ്ങാനും വരെ ആളുകൾ ഉപയോഗിക്കുന്നു. ഡിജിറ്റൽ പേയ്മെന്റുകൾ വ്യാപകമായതോടെ ചെറിയ തുകകൾക്കും കാർഡ് ഉപയോഗിക്കുന്നത് പതിവായി. ഇത് ഇടപാടുകളുടെ എണ്ണം വർദ്ധിപ്പിച്ചു എങ്കിലും മൊത്തത്തിലുള്ള 'ശരാശരി ചിലവ്' കുറയാൻ കാരണമായി.

2. യുപിഐയും ക്രെഡിറ്റ് കാർഡും 

യുപിഐ വഴി ക്രെഡിറ്റ് കാർഡുകൾ ബന്ധിപ്പിക്കാൻ സാധിക്കുന്നത് വിപ്ലവകരമായ മാറ്റമുണ്ടാക്കി. ചെറിയ കടകളിൽ പോലും ക്യുആർ കോഡ് സ്കാൻ ചെയ്ത് ക്രെഡിറ്റ് കാർഡ് വഴി പണമടയ്ക്കാം. ഇതോടെ ഡെബിറ്റ് കാർഡുകൾക്കും പണത്തിനും പകരം ആളുകൾ ക്രെഡിറ്റ് കാർഡുകളെ ഡിജിറ്റൽ വാലറ്റുകളെപ്പോലെ ഉപയോഗിക്കാൻ തുടങ്ങി.

3. ബാങ്കുകളുടെ കർശന നിയന്ത്രണങ്ങൾ 

ബാങ്കുകൾ പുതിയ കാർഡുകൾ ധാരാളമായി വിതരണം ചെയ്യുന്നുണ്ടെങ്കിലും, വായ്പാ പരിധി (അനുവദിക്കുന്നതിൽ ഇപ്പോൾ കൂടുതൽ ജാഗ്രത കാണിക്കുന്നുണ്ട്. അനാവശ്യമായ വലിയ ചിലവുകൾ കുറയ്ക്കാൻ ഇത് ഉപഭോക്താക്കളെ പ്രേരിപ്പിക്കുന്നു.

4. റിവാർഡ് പോയിന്റുകളിലെ മാറ്റം 

പല ബാങ്കുകളും തങ്ങളുടെ റിവാർഡ് പോയിന്റ് വ്യവസ്ഥകളിൽ മാറ്റം വരുത്തിയിട്ടുണ്ട്. വലിയ പർച്ചേസുകൾക്ക് ലഭിച്ചിരുന്ന ആനുകൂല്യങ്ങളിൽ കുറവ് വന്നതും, ഓൺലൈൻ പർച്ചേസുകൾക്ക് കൂടുതൽ മുൻഗണന നൽകുന്നതും ഉപഭോക്താക്കളുടെ ചിലവ് രീതിയെ മാറ്റിമറിച്ചു.

നമ്മൾ കാർഡ് കൂടുതൽ തവണ ഉപയോഗിക്കുന്നുണ്ടെങ്കിലും പണം ചിലവാക്കുന്നത് വളരെ കരുതലോടെയാണ് എന്നാണ് ഈ കണക്കുകൾ സൂചിപ്പിക്കുന്നത്. അതായത്, ഉപഭോക്താക്കൾ കാർഡുകൾ ആവേശത്തോടെ ഉപയോഗിക്കുന്നതിന് പകരം, അടിയന്തര സാഹചര്യങ്ങളിലേക്ക് കരുതിവെക്കുകയാണ് ചെയ്യുന്നത്.