25 വർഷത്തേക്ക് പ്രതിമാസം 25,000 രൂപ നേടാം; ഇതാണ് ശരിയായ റിട്ടയർമെന്റ് പ്ലാൻ

റിട്ടയർമെന്റ് സമ്പാദ്യത്തിൽ നിന്ന് എങ്ങനെ പ്രതിമാസ വരുമാനം ഉണ്ടാക്കുമെന്ന് നിങ്ങൾ ചിന്തിച്ചിട്ടുണ്ടോ?. റിട്ടയർമെന്റ് സമയത്ത് സമ്പാദ്യമെല്ലാം ബാങ്കിൽ സ്ഥിരനിക്ഷേം നടത്താനാണ് പലരും നിർദേശിക്കാറുള്ളത്. എന്നാൽ, ഇതുവഴി നിങ്ങൾക്ക് 7-8% റിട്ടേൺ മാത്രമേ ലഭിക്കൂ. ഇത് കുറഞ്ഞ റിട്ടേൺ ആണ്. മാത്രമല്ല, 10-15 വർഷത്തിന് ശേഷം പലിശ നിരക്ക് ഗണ്യമായി കുറയാനും സാധ്യതയുണ്ട്.

പോസ്റ്റ് ഓഫീസിന്റെ സീനിയർ സിറ്റിസൺ സേവിംഗ്സ് സ്കീം ഇപ്പോൾ 8.2% ഉയർന്ന പലിശ നൽകുന്നുണ്ട്. ഇവിടെ, നിങ്ങൾക്ക് 30 ലക്ഷം രൂപയിൽ കൂടുതൽ നിക്ഷേപിക്കാൻ കഴിയില്ല. മാത്രമല്ല, അഞ്ചു വർഷത്തിനു ശേഷവും അതിനുശേഷവും ഇതേ നിരക്ക് ആവർത്തിക്കുമെന്നതിന് യാതൊരു ഉറപ്പുമില്ല. ആജീവനാന്ത പലിശ നിരക്ക് അതേപടി തുടരുന്ന ഒരു ആന്വിറ്റി പ്ലാനിൽ നിക്ഷേപിക്കാൻ മറ്റുള്ളവർ പറഞ്ഞേക്കാം. എന്നാൽ, നിങ്ങൾക്ക് 6-7% റിട്ടേൺ മാത്രമായിരിക്കും ലഭിക്കുക.

നിങ്ങൾക്ക് ഹ്രസ്വകാലത്തേക്ക് ഉയർന്ന റിട്ടേൺ നേടാൻ കഴിയും, എന്നാൽ സുരക്ഷിതവും കടാധിഷ്ഠിതവുമായ നിക്ഷേപങ്ങൾ മാത്രമാണ് പരിഗണിക്കുന്നതെങ്കിൽ, ദീർഘകാലത്തേക്ക് നിങ്ങൾ വളരെ കുറഞ്ഞ നിരക്ക് സ്വീകരിക്കേണ്ടിവരും. നിക്ഷേപങ്ങളിൽ സുരക്ഷിതത്വത്തിന് മുൻഗണന നൽകുന്നത് കുറഞ്ഞ പ്രതിമാസ വരുമാനത്തിന് കാരണമായേക്കാം. അപ്പോൾ പിന്നെ സുസ്ഥിരമായ വരുമാനം എങ്ങനെ നേടാൻ കഴിയും?.

സിസ്റ്റമാറ്റിക് വിഡ്രോവൽ പ്ലാൻ

റിട്ടേണുകൾ, റിസ്ക്, പ്രതിമാസ വരുമാന ആവശ്യകതകൾ എന്നിവയെ ആശ്രയിച്ച് നിക്ഷേപങ്ങൾ ക്രമീകരിക്കുകയാണ് വിരമിക്കൽ വരുമാനം നിയന്ത്രിക്കാനുള്ള ഏറ്റവും നല്ല മാർഗം. ഇവിടെയാണ് മ്യൂച്വൽ ഫണ്ടുകളിലെ സിസ്റ്റമാറ്റിക് വിഡ്രോവൽ പ്ലാൻ നിങ്ങളെ സഹായിക്കുന്നത്. മ്യൂച്വൽ ഫണ്ടുകളിലെ സിസ്റ്റമാറ്റിക് വിഡ്രോവൽ പ്ലാനിലൂടെ പ്രതിമാസ വരുമാനം ഉറപ്പിക്കാനാകും. ഡെബ്റ്റ്, ഇക്വിറ്റി, സ്വർണം തുടങ്ങിയ വിവിധ അസറ്റ് ക്ലാസുകളിൽ നിക്ഷേപിക്കുന്നതിലൂടെ സ്ഥിര വരുമാനം നേടാനാകും. എന്നാൽ നിക്ഷേപ തുക വിപണിയിലെ ലാഭനഷ്ടങ്ങൾക്ക് വിധേയം ആയിരിക്കും.

എസ്ഡബ്ല്യുപി വഴി 25 വർഷത്തേക്ക് 25,000 രൂപ പ്രതിമാസ വരുമാനം എങ്ങനെ നേടാം

മ്യൂച്വൽ ഫണ്ടിലെ മൾട്ടി അസറ്റ് ഫണ്ടുകളിൽ തുക നിക്ഷേപിച്ച് സിസ്റ്റമാറ്റിക് പ്ലാനിലൂടെ 6% നിരക്കിൽ പ്രതിമാസം 25,000 രൂപ വരെ നേടാം. ഇതിനായി, 70 ലക്ഷം രൂപയുടെ നിക്ഷേപം ആവശ്യമാണ്. 70 ലക്ഷം രൂപ 25 വർഷത്തേക്ക് നിക്ഷേപിച്ചാൽ, 6% റിട്ടേണിൽ കാലാവധി പൂർത്തിയാകുമ്പോൾ 73.54 ലക്ഷം രൂപ കിട്ടും. 51 ലക്ഷം നിക്ഷേപിച്ചാൽ, 8% റിട്ടേണിൽ 51.77 ലക്ഷം ലഭിക്കും. 41 ലക്ഷം 10% റിട്ടേണിൽ 49.62 ലക്ഷം രൂപയും 34 ലക്ഷം 12% റിട്ടേണിൽ 49.39 ലക്ഷം ലഭിക്കും.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.