നികുതി ആനുകൂല്യങ്ങളോടെ പേഴ്സണൽ ലോൺ! ഇതറിയാതെ പോയാൽ നഷ്ടം

അപ്രതീക്ഷിത ചെലവുകൾ കൈകാര്യം ചെയ്യുന്നതിന് വ്യക്തികൾ കൂടുതലായും ആശ്രയിക്കുന്നത് വ്യക്തിഗത വായ്പകളെയാണ്. ഹോം ലോൺ, കാർ ലോണോ പോലുള്ള വായ്പകളിൽ നിന്ന് വ്യത്യസ്തമായി, പേഴ്സണൽ ലോണുകൾ അൺസെക്യുവേർഡ് ആണ്, അതായത് അവയ്ക്ക് ഈട് ആവശ്യമില്ല. വായ്പ നൽകുന്നയാളുടെ ക്രെഡിറ്റ് പോളിസിയെയും മറ്റ് ഘടകങ്ങളെയും ആശ്രയിച്ച് പലിശ നിരക്കുകൾ വ്യത്യാസപ്പെടാമെങ്കിലും, വളരെ എളുപ്പത്തിൽ നേടിയെടുക്കാൻ സാധിക്കും. ഇഷ്ടമുള്ള തിരിച്ചടവ് കാലയളവും പ്രതിമാസ തവണകളും പേഴ്സണൽ ലോണുകളെ കൂടുതൽ സൗകര്യപ്രദമാക്കുന്നു.

ഭവന വായ്പകളോ ബിസിനസ് വായ്പകളോ പോലെ പേഴ്സണൽ ലോണുകളിൽ നികുതി ആനുകൂല്യങ്ങൾ ക്ലെയിം ചെയ്യാൻ കഴിയില്ല എന്നത് പൊതുവായ ഒരു ധാരണയാണ്. എന്നാൽ, പ്രത്യേക ആവശ്യങ്ങൾക്കായി ലഭിക്കുന്ന വ്യക്തിഗത വായ്പകളിൽ വായ്പക്കാർക്ക് ആദായനികുതി ആനുകൂല്യങ്ങൾ ക്ലെയിം ചെയ്യാൻ കഴിയും. വ്യക്തിഗത വായ്പകളിൽ കിഴിവുകൾ ക്ലെയിം ചെയ്യുന്നതിന്, ആവശ്യമായ എല്ലാ രേഖകളും നൽകേണ്ടതായുണ്ട്.

വ്യക്തിഗത വായ്പകളുടെ നികുതി ആനുകൂല്യങ്ങൾ

വ്യക്തിഗത വായ്പകൾക്ക് നികുതി ആനുകൂല്യങ്ങൾ നേടാൻ കഴിയും, എന്നാൽ ഇവ പ്രത്യേക സാഹചര്യങ്ങളിൽ ബാധകമാണ്. വ്യക്തിഗത വായ്പകളിൽ ആദായനികുതി കിഴിവുകൾ ക്ലെയിം ചെയ്യാൻ കഴിയുന്ന ചില സാഹചര്യങ്ങൾ ഇവയാണ്.

റെസിഡൻഷ്യൽ പ്രോപ്പർട്ടി വാങ്ങൽ അല്ലെങ്കിൽ നിർമ്മാണം: ആദായനികുതി നിയമത്തിലെ സെക്ഷൻ 80C പ്രകാരം, ഒരു റെസിഡൻഷ്യൽ വീട് വാങ്ങുന്നതിനോ നിർമ്മാണത്തിനോ വേണ്ടി എടുത്ത വ്യക്തിഗത വായ്പയുടെ മുതലിന്റെ തിരിച്ചടവിന് ഒരു സാമ്പത്തിക വർഷത്തിൽ 1.5 ലക്ഷം വരെയുള്ളവയ്ക്ക് നികുതി വരുമാനത്തിൽ നിന്ന് കിഴിവ് ക്ലെയിം ചെയ്യാം. ആദായനികുതി നിയമത്തിലെ സെക്ഷൻ 24 പ്രകാരം, സ്വന്തം ആവശ്യത്തിനായി വീട് വാങ്ങുന്നതിനോ നിർമ്മിക്കുന്നതിനോ വായ്പ ഉപയോഗിക്കുകയാണെങ്കിൽ, അടച്ച പലിശയിൽ 2 ലക്ഷം വരെ നികുതി കിഴിവ് ക്ലെയിം ചെയ്യാം. വാടകയ്ക്ക് നൽകുന്ന വസ്തുവിന്റെ കാര്യത്തിൽ മുഴുവൻ പലിശ തുകയും കിഴിവായി ക്ലെയിം ചെയ്യാം. വായ്പ എടുത്ത സാമ്പത്തിക വർഷത്തിന്റെ അവസാനം മുതൽ 5 വർഷത്തിനുള്ളിൽ വാങ്ങലോ നിർമ്മാണമോ പൂർത്തിയാകുന്നില്ലെങ്കിൽ പലിശയിൽ നിന്നുള്ള കിഴിവ് 30,000 ആയി പരിമിതപ്പെടുത്തും.

വീട് പുതുക്കിപ്പണിയുകയോ നന്നാക്കുകയോ ചെയ്യുക: വീട് പുതുക്കിപ്പണിയാനോ നന്നാക്കാനോ ഉള്ള വ്യക്തിഗത വായ്പയ്ക്ക് നൽകുന്ന പലിശയ്ക്ക് ആദായനികുതി നിയമത്തിലെ സെക്ഷൻ 24 പ്രകാരം പ്രതിവർഷം 30,000 രൂപ വരെ നികുതി കിഴിവ് ക്ലെയിം ചെയ്യാം.

ബിസിനസ് നിക്ഷേപം: ബിസിനസ്സിനായി ഒരു വ്യക്തിഗത വായ്പ ഉപയോഗിക്കുകയാണെങ്കിൽ, ആദായനികുതി നിയമത്തിലെ സെക്ഷൻ 37(1) പ്രകാരം അടച്ച പലിശയ്ക്ക് നികുതി കിഴിവ് ക്ലെയിം ചെയ്യാം. ബിസിനസ്സിനായി വാഹനങ്ങൾ പോലുള്ള ആസ്തികൾ വാങ്ങുന്നതിന് വായ്പ ഉപയോഗിച്ചാലും ഇത് ബാധകമാണ്. തുക ബിസിനസ് ചെലവുകളായി കണക്കാക്കാം.

വിവാഹങ്ങൾ, അവധിക്കാല ആഘോഷം തുടങ്ങിയ ആവശ്യങ്ങൾക്കായി എടുക്കുന്ന വ്യക്തിഗത വായ്പകൾക്ക് നികുതി ആനുകൂല്യങ്ങൾക്ക് അർഹതയില്ല.

വിദ്യാഭ്യാസ ചെലവുകൾ: കുട്ടികളുടെ വിദ്യാഭ്യാസത്തിനായി ഒരു വ്യക്തിഗത വായ്പ ഉപയോഗിക്കുകയാണെങ്കിൽ, ഐ-ടി നിയമത്തിലെ സെക്ഷൻ 80E പ്രകാരം അടച്ച പലിശയ്ക്ക് നികുതി കിഴിവുകൾ ക്ലെയിം ചെയ്യാം. പരമാവധി എട്ട് വർഷത്തേക്ക് അല്ലെങ്കിൽ വായ്പ പൂർണ്ണമായും തിരിച്ചടയ്ക്കുന്നതുവരെ, ഏതാണ് ആദ്യം സംഭവിക്കുന്നത് എന്നതിനെ അനുസരിച്ച് ഈ കിഴിവ് ലഭ്യമാണ്.