സൗജന്യമായി എയർപോർട്ട് ലോഞ്ചിൽ പ്രവേശിക്കാൻ ക്രെഡിറ്റ് കാർഡ് നിർബന്ധമില്ല: ഈ ഡെബിറ്റ് കാർഡുകൾ മതി

സ്ഥിരമായി വിമാന യാത്രകൾ നടത്തുന്നവർ ക്രെഡിറ്റ് കാർഡിന് അപേക്ഷിക്കുമ്പോൾ ലോഞ്ച് ആക്സസ് ആനുകൂല്യങ്ങൾ ഉറപ്പാക്കുന്ന കാർഡുകൾ പരി​ഗണിക്കാറുണ്ട്. ചിലർ സൗജന്യ ലോഞ്ച് ആക്സസ് ലഭിക്കുന്നതിന് വേണ്ടി മാത്രം ക്രെഡിറ്റ് കാർഡുകൾ പർച്ചേസ് ചെയ്യാറുണ്ട്. എന്നാൽ ക്രെഡിറ്റ് കാർഡ് മാത്രമാണോ ഇത്തരം ആനുകൂല്യങ്ങൾ വാ​ഗ്ദാനം ചെയ്യുന്നത്? അല്ല, ചില ഡെബിറ്റ് കാർഡുകളും സൗജന്യ ലോഞ്ച് ആക്സസ് സേവനങ്ങൾ ഉറപ്പാക്കുന്നുണ്ട്.

സൗജന്യ എയർപോർട്ട് ലോഞ്ച് പ്രവേശനം വാഗ്ദാനം ചെയ്യുന്ന അത്തരം പ്രീമിയം ഡെബിറ്റ് കാർഡുകൾ ഏതെല്ലാമാണ്? ഓരോ കാർഡുകളും വിശദമായി അറിയാം;

1. ഐസിഐസിഐ ബാങ്ക് കോറൽ പ്ലസ് ഡെബിറ്റ് കാർഡ്

ഈ ഡെബിറ്റ് കാർഡ് മികച്ച ലോഞ്ച് പ്രവേശനം വാ​ഗ്ദാനം ചെയ്യുന്നു. നിങ്ങൾ ഈ കാർഡുപയോ​ഗിച്ച് കഴിഞ്ഞ പാദത്തിൽ 10,000 രൂപ ചെലവഴിച്ചാൽ ഒരു പാദത്തിൽ രണ്ട് സൗജന്യ ഡൊമസ്റ്റിക് ലോഞ്ച് ആക്സസ് ഉറപ്പാക്കാം. മാത്രമല്ല ഈ ആനുകൂല്യം ഉറപ്പാക്കാൻ പ്രതിമാസം 249 രൂപ ഈടാക്കുന്നു. ഇത് പതിവായി യാത്ര ചെയ്യുന്നവർക്ക് നല്ലൊരു എൻട്രി ലെവൽ ഡെബിറ്റ് കാർഡായിരിക്കും.

2. ആക്സിസ് ബാങ്ക് ബർഗണ്ടി & വെൽത്ത് ഡെബിറ്റ് കാർഡുകൾ

ഈ രണ്ട് ഡെബിറ്റ് കാർഡുകളും വിമാന യാത്ര നടത്തുന്നവർക്ക് മികച്ച ഓപ്ഷനാണ്. കാരണം തിരഞ്ഞെടുത്ത ആഭ്യന്തര, അന്തർദേശീയ എയർപോർട്ട് ലോഞ്ചുകളിൽ ഒരു പാദത്തിൽ മൂന്ന് സൗജന്യ ലോഞ്ച് ആക്സസ് ഈ കാർഡുകൾ നൽകുന്നുണ്ട്. ബർഗണ്ടി കാർഡിന് വാർഷിക ഫീസ് നൽകേണ്ടതില്ല, പക്ഷേ ത്രൈമാസ ചെലവ് കുറഞ്ഞത് 5,000 രൂപ വേണ്ടി വരും.

3. എച്ച്ഡിഎഫ്സി പ്ലാറ്റിനം & റുപേ പ്ലാറ്റിനം ഡെബിറ്റ് കാർഡുകൾ

എച്ച്ഡിഎഫ്സി പ്ലാറ്റിനം ഡെബിറ്റ് കാർഡ് ഒരു പാദത്തിൽ രണ്ട് ലോഞ്ച് ആക്സസ് വാ​ഗ്ദാനം ചെയ്യുന്നുണ്ട്. ഈ കാർഡിൻ്റെ വാർഷിക ഫീസ് 850 രൂപയാണ്.
എച്ച്ഡിഎഫ്സി റൂപേ പ്ലാറ്റിനം ഡെബിറ്റ് കാർഡ് രണ്ട് അന്താരാഷ്ട്ര എയർപോർട്ട് ലോഞ്ച് ആക്സസും, ഒരു പാദത്തിൽ ഒരു ആഭ്യന്തര ലോഞ്ച് ആക്സസും, റെയിൽവേ ലോഞ്ച് ആക്സസും വാ​ഗ്ദാനം ചെയ്യുന്നു. ഈ കാർഡിൻ്റെ വാർഷിക ഫീസ് 200 രൂപയാണ്.

4. എച്ച്ഡിഎഫ്സി ബാങ്ക് ഇൻഫിനിറ്റി ഡെബിറ്റ് കാർഡ്

ഈ ഡെബിറ്റ് കാർഡ് പ്രതിവർഷം 16 സൗജന്യ ആഭ്യന്തര ലോഞ്ച് ആക്സസ് വാഗ്ദാനം ചെയ്യുന്നു. അതായത് ഒരു പാദത്തിൽ 4 എണ്ണം വീതം. ഈ കാർഡിന് അപേക്ഷിച്ചാൽ 2,500 രൂപ ഫീസ് നൽകേണ്ടി വരും. എന്നാൽ ഇൻഫിനിറ്റി ബാങ്കിംഗ് ക്ലയന്റുകൾക്ക് ആദ്യ വർഷത്തിൽ ഈ തുക അടക്കേണ്ടി വരില്ല.

5. കൊട്ടക്, എസ്‌ബി‌ഐ & ഐസിഐസിഐ സഫിറോ എന്നീ ഡെബിറ്റ് കാർഡുകൾ

• കൊട്ടക് പ്രിവി ലീഗ് പ്ലാറ്റിനം/ബ്ലാക്ക് ഡെബിറ്റ് കാർഡ്: ഒരു പാദത്തിൽ രണ്ട് സൗജന്യ ആഭ്യന്തര ലോഞ്ച് പ്രവേശനം വാഗ്ദാനം ചെയ്യുന്നു.

• കൊട്ടക് ഇൻഫിനിറ്റ് ഡെബിറ്റ് കാർഡ്: ഈ കാർഡ് അൺലിമിറ്റഡ് ആഭ്യന്തര ലോഞ്ച് ആക്‌സസ് വാഗ്ദാനം ചെയ്യുന്നു.

• എസ്‌ബി‌ഐ പ്ലാറ്റിനം ഇന്റർനാഷണൽ ഡെബിറ്റ് കാർഡ്: കുറഞ്ഞ വാർഷിക ഫീസോടെ ലോഞ്ച് ആക്‌സസ് വാഗ്ദാനം ചെയ്യുന്നു.

• ഐസിഐസിഐ സഫിറോ ഡെബിറ്റ് കാർഡ്: ത്രൈമാസം 5,000 രൂപ ചെലവഴിച്ചാൽ ഒരു പാദത്തിൽ നാല് സൗജന്യ ലോഞ്ച് പ്രവേശനം നേടാനാവും.