മൂച്വൽ ഫണ്ടിൽ നിക്ഷേപിക്കാം: കുട്ടിക്ക് 18 വയസ് പൂർത്തിയാകുമ്പോൾ 1 കോടി വരെ നേടാം

നല്ല ജീവിത സാഹചര്യം, നല്ല വിദ്യാഭ്യാസം ഇതൊക്കെയാണ് ഒരു കുഞ്ഞിന് മാതാപിതാക്കൾക്ക് നൽകാൻ കഴിയുക. ഇവയൊക്കെ നൽകണമെങ്കിൽ പണം വേണം. മാസവരുമാനത്തിലാണ് നിങ്ങളുടെ ദൈനംദിന ജീവിതം മുന്നോട്ടു പോകുന്നതെങ്കിൽ, നിങ്ങളുടെ കുട്ടിയുടെ ഉന്നത വിദ്യാഭ്യാസത്തിനായി ദീർഘകാല നിക്ഷേപത്തെക്കുറിച്ച് ചിന്തിക്കേണ്ട സമയമായിരിക്കുന്നു. ഇന്ത്യയിൽ ഉന്നത വിദ്യാഭ്യാസം ചെലവേറിയതായി മാറിയിട്ടുണ്ട്. മക്കളെ പുറത്തേക്ക് അയച്ച് പഠിപ്പിക്കണമെങ്കിൽ വലിയൊരു തുക തന്നെ വേണ്ടിവരും. ഇതിനായി നിങ്ങൾക്ക് അധിക വരുമാനം ആവശ്യമാണ്.

അങ്ങനെയെങ്കിൽ, കുഞ്ഞിന്റെ ജനനത്തിനുപിന്നാലെ നിക്ഷേപ പദ്ധതികളിൽ അംഗമാകുന്നതാണ് ഉചിതം. നിങ്ങളുടെ കുട്ടി ബിരുദത്തിനും തുടർന്ന് ഉന്നത വിദ്യാഭ്യാസത്തിനും തയ്യാറാവുമ്പോഴേക്കും വലിയൊരു തുക നിങ്ങൾക്ക് മാറ്റിവയ്ക്കാൻ സാധിക്കും. മക്കൾക്ക് 18 വയസ് പൂർത്തിയാകുമ്പോൾ നല്ലൊരു തുക കയ്യിൽ കിട്ടുന്നതിന് മൂച്വൽ ഫണ്ടുകളിലെ നിക്ഷേപങ്ങൾ സഹായിക്കും. അതിനായി നിങ്ങൾ മാസത്തിൽ വലിയൊരു തുക മാറ്റിവയ്ക്കേണ്ടതില്ല. മാസം 5000 രൂപയോ 10000 രൂപയോ നിക്ഷേപിച്ച് 1 കോടിയോളം രൂപ നേടാനാകും.

5000 രൂപ നിക്ഷേപിച്ചാൽ കിട്ടുന്നത് എത്ര?

ഒരു മൂച്വൽ ഫണ്ട് സ്കീമിൽ പ്രതിമാസം 5,000 രൂപ 18 വർഷത്തേക്ക് നിക്ഷേപിച്ചാൽ, അതിൽനിന്നും വാർഷികത്തിൽ 12 ശതമാനം തിരികെ കിട്ടും. 18 വർഷം പൂർത്തിയാകുമ്പോൾ മൊത്ത നിക്ഷേപ തുക 10,80,000 രൂപയായിരിക്കും. 27,47,196 രൂപ അധിക വരുമാനമായി കിട്ടും. അങ്ങനെയെങ്കിൽ കാലാവധി പൂർത്തിയാകുമ്പോൾ നിങ്ങൾക്ക് കിട്ടുക 38,27,196 രൂപയാണ്. പ്രതിവർഷം 5 ശതമാനം പണം അധികമായി നിക്ഷേപിക്കാവുന്ന സ്കീം തിരഞ്ഞെടുത്താൽ 18 വർഷം കഴിയുമ്പോൾ 16,87,943 രൂപയായിരിക്കും മൊത്ത നിക്ഷേപ തുക. 12 ശതമാനം വാർഷിക റിട്ടേണായി കണക്കുകൂട്ടിയാൽ 34,57,451 രൂപയാണ് അധികമായി ലഭിക്കുക. കാലാവധി പൂർത്തിയാകുമ്പോൾ കയ്യിൽ കിട്ടുമെന്ന് പ്രതീക്ഷിക്കുന്ന തുക 51,45,394 രൂപയാണ്.

10000 രൂപ നിക്ഷേപിച്ചാൽ കിട്ടുന്നത് എത്ര?

കുഞ്ഞ് ജനിച്ചശേഷം 18 വർഷത്തേക്ക് 10000 രൂപയാണ് പ്രതിമാസം നിക്ഷേപിക്കുന്നതെങ്കിൽ മൊത്ത നിക്ഷേപ തുക 21,60,000 രൂപയായിരിക്കും. വാർഷികത്തിൽ 12 ശതമാനം റിട്ടേൺ ഇനത്തിൽ കിട്ടുന്ന 54,94,392 രൂപയും കൂടി ചേർത്താൽ കയ്യിൽ കിട്ടുക 76,54,392 രൂപയായിരിക്കും. ഓരോ വർഷവും 5 ശതമാനം വീതം നിക്ഷേപ തുക കൂട്ടിയാൽ കാലാവധി പൂർത്തിയാകുമ്പോഴുള്ള നിക്ഷേപ തുക 33,75,886 രൂപയായിരിക്കും. വാർഷിക റിട്ടേണായ 69,14,901 രൂപയും കൂടി ചേർത്താൽ കാലാവധി പൂർത്തിയാകുമ്പോൾ കിട്ടുമെന്ന് പ്രതീക്ഷിക്കുന്ന തുക 1,02,90,788 രൂപയാണ്.