50,000 രൂപ ശമ്പളമുണ്ടോ? സമ്പന്നനാകാൻ ഇതാ 5 അഞ്ച് സ്മാർട്ട് വഴികൾ

സാമ്പത്തിക ഭദ്രത കൈവരിക്കുക എന്നത് എത്രത്തോളം സമ്പാദിക്കുന്നു എന്നതിലല്ല, മറിച്ച് കൈയ്യിലുള്ള പണം എങ്ങനെ കൈകാര്യം ചെയ്യുന്നു എന്നതിലാണ്. 50,000 രൂപ മാസശമ്പളം വാങ്ങുന്ന ഒരാളെ സംബന്ധിച്ച് കൃത്യമായ പ്ലാനിംഗ് ഉണ്ടെങ്കിൽ ഭാവിയിലേക്ക് വലിയൊരു സമ്പാദ്യം കെട്ടിപ്പടുക്കാൻ സാധിക്കും. വെറുതെ പണം ചെലവാക്കുന്നതിന് പകരം ശാസ്ത്രീയമായ ചില ബജറ്റിംഗ് രീതികൾ പിന്തുടരുന്നത് സാമ്പത്തിക ഭദ്രത ഉറപ്പാക്കാൻ സഹായിക്കും. അതിനായി സഹായിക്കുന്ന 5 പ്രധാന നിയമങ്ങൾ അറിയാം.

1. 50/30/20 നിയമം

ഈ നിയമപ്രകാരം, നിങ്ങളുടെ വരുമാനത്തിന്റെ 50% അത്യാവശ്യ കാര്യങ്ങൾക്കും, 30% ജീവിതശൈലീ ചെലവുകൾക്കും, 20% സമ്പാദ്യത്തിനുമായി മാറ്റിവയ്ക്കുക. അത്യാവശ്യ കാര്യങ്ങൾക്കായി മാറ്റിവെച്ച 50 ശതമാനത്തിൽ നിന്ന് വ്യക്തിഗത വായ്പകൾ, ഭവന വായ്പകൾ, ക്രെഡിറ്റ് കാർഡ് ബില്ലുകൾ അല്ലെങ്കിൽ മറ്റ് കടബാധ്യതകൾ എന്നിവ വീട്ടാവുന്നതാണ്. ഇതിലൂടെ കടം തിരിച്ചടയ്ക്കുന്നതിന് മുൻഗണന ലഭിക്കുന്നു; കാരണം ഇവയെ 'അത്യാവശ്യ കാര്യങ്ങളുടെ' പട്ടികയിൽ ഉൾപ്പെടുത്തിയിരിക്കുന്നതിനാൽ വിനോദങ്ങൾക്കായി പണം ചെലവാക്കുന്നതിനേക്കാൾ പ്രാധാന്യം ഇതിന് ലഭിക്കുന്നു.

2. 60/20/10 നിയമം

മാസവരുമാനം ബജറ്റ് ചെയ്യുന്നതിനായി വ്യാപകമായി പിന്തുടരുന്ന മറ്റൊരു രീതിയാണിത്. ഈ രീതി അനുസരിച്ച് നിങ്ങളുടെ വരുമാനത്തെ പ്രധാനമായും മൂന്നായി തിരിക്കാം. നിങ്ങളുടെ മാസവരുമാനത്തിന്റെ 60 ശതമാനം വാടക, വൈദ്യുതി ബില്ലുകൾ, സബ്‌സ്‌ക്രിപ്‌ഷൻ ചാർജുകൾ തുടങ്ങിയ ഒഴിവാക്കാനാവാത്ത കാര്യങ്ങൾക്കായി മാറ്റിവെക്കാം. വരുമാനത്തിന്റെ 20 ശതമാനം ഭാവിയിലെ വളർച്ചയ്ക്കായി മ്യൂച്വൽ ഫണ്ടുകൾ, ഓഹരികൾ, സ്വർണം തുടങ്ങിയ വിവിധ നിക്ഷേപങ്ങളിൽ വിനിയോഗിക്കാം. ബാക്കിയുള്ള 20 ശതമാനം നിങ്ങളുടെ ഇഷ്ടങ്ങൾക്കും മറ്റ് വ്യക്തിപരമായ ആവശ്യങ്ങൾക്കുമായി ഉപയോഗിക്കാം. വീട്ടുവാടകയോ വീടുമായി ബന്ധപ്പെട്ട മറ്റ് ചെലവുകളോ നിങ്ങളുടെ വരുമാനത്തിന്റെ വലിയൊരു ഭാഗം കവർന്നെടുക്കുന്ന സാഹചര്യമാണെങ്കിൽ, ഈ ബജറ്റിംഗ് രീതി വളരെ അനുയോജ്യമാണ്.

3. 70/20/10 നിയമം

50-30-20 നിയമത്തേക്കാൾ മികച്ച സമ്പാദ്യശീലം നിങ്ങൾ ആഗ്രഹിക്കുന്നുണ്ടെങ്കിൽ, നിങ്ങൾക്ക് 70-20-10 നിയമം പരീക്ഷിക്കാവുന്നതാണ്. നിങ്ങളുടെ മാസവരുമാനത്തിന്റെ 70% ഭക്ഷണം, വീട്ടുവാടക, ബില്ലുകൾ, മറ്റ് ജീവിതശൈലീ ചെലവുകൾ എന്നിവയ്ക്കായി മാറ്റിവെക്കുന്നു. വരുമാനത്തിന്റെ 20% എമർജൻസി ഫണ്ട് (അടിയന്തര ആവശ്യങ്ങൾക്കുള്ള തുക), എസ്ഐപികൾ, ഓഹരി വിപണിയിലെ നിക്ഷേപം എന്നിവയ്ക്കായി ഉപയോഗിക്കുന്നു. ബാക്കിയുള്ള 10% ഇൻഷുറൻസ് വാങ്ങുന്നതിനും, കടങ്ങൾ തിരിച്ചടയ്ക്കുന്നതിനും, ജീവകാരുണ്യ പ്രവർത്തനങ്ങൾക്കും വേണ്ടിയാണ് നീക്കിവെക്കുന്നത്.

4. സീറോ-ബേസ്ഡ് ബജറ്റിംഗ്

കയ്യിലുള്ള ഓരോ രൂപയ്ക്കും കൃത്യമായ കണക്കുണ്ടാക്കുക എന്നതാണ് ഇതിന്റെ പ്രത്യേകത. മാസാവസാനം വരുമാനത്തിൽ നിന്ന് ചെലവുകൾ കുറച്ചാൽ പൂജ്യം ആയിരിക്കണം ഫലം. അതായത്, ചെലവാക്കിയ പണം കഴിഞ്ഞ് ബാക്കിയുള്ള ഓരോ രൂപയും നിക്ഷേപത്തിലേക്കോ മറ്റ് ലക്ഷ്യങ്ങളിലേക്കോ മുൻകൂട്ടി വകയിരുത്തണം. അനാവശ്യ ചെലവുകൾ ഒഴിവാക്കാൻ ഇത് സഹായിക്കും.

5. 80-20 നിയമം

സങ്കീർണ്ണമായ കണക്കുകൾ താല്പര്യമില്ലാത്തവർക്ക് ഈ രീതി സ്വീകരിക്കാം. ശമ്പളം കിട്ടിയാലുടൻ അതിന്റെ 20% (10,000 രൂപ) സമ്പാദ്യമായി മാറ്റുക.

ബാക്കിയുള്ള 80% (40,000 രൂപ) കൊണ്ട് നിങ്ങളുടെ എല്ലാ ചെലവുകളും നടത്തുക. നിക്ഷേപത്തിന് മുൻഗണന നൽകുന്ന രീതിയാണിത്.

നിങ്ങളുടെ ജീവിതശൈലിക്കും സാമ്പത്തിക ലക്ഷ്യങ്ങൾക്കും അനുയോജ്യമായ രീതി ഇതിൽ നിന്ന് തിരഞ്ഞെടുക്കാം. കൃത്യമായ പ്ലാനിംഗും അച്ചടക്കവും ഉണ്ടെങ്കിൽ 50,000 രൂപ ശമ്പളത്തിൽ നിന്ന് തന്നെ നിങ്ങൾക്ക് വലിയൊരു സാമ്പത്തിക അടിത്തറ പാകാൻ സാധിക്കും.