റിട്ടയർമെന്റ് കാലം തട്ടിയും മുട്ടിയും പോകാൻ കോടികൾ വേണ്ടി വരും; കണക്കുകൾ പറയുന്നതിങ്ങനെ

പ്രായം അറുപതാകുമ്പോൾ ജോലിയിൽ നിന്നും വിരമിക്കുക എന്ന പഴയ സങ്കൽപ്പത്തിന് ഇന്നത്തെ കാലത്ത് വലിയ പ്രസക്തിയില്ല. പണപ്പെരുപ്പവും വർദ്ധിച്ചു വരുന്ന ആരോഗ്യ ചെലവുകളും കണക്കിലെടുക്കുമ്പോൾ, പ്രായത്തേക്കാൾ ഉപരി സാമ്പത്തിക സ്വാതന്ത്ര്യം കൈവരിക്കുന്നതാണ് യഥാർത്ഥ റിട്ടയർമെന്റ് എന്ന് സാമ്പത്തിക വിദഗ്ധർ ചൂണ്ടിക്കാട്ടുന്നു.

അടുത്തിടെ ചാർട്ടേഡ് അക്കൗണ്ടന്റായ നിതിൻ കൗശിക് സോഷ്യൽ മീഡിയയിൽ പങ്കുവെച്ച കണക്കുകൾ പലരെയും അമ്പരപ്പിക്കുന്നതാണ്. ഇന്ന് ഒരാൾ മാസം ഒരു ലക്ഷം രൂപ ചിലവാകുന്ന ജീവിതശൈലിയാണ് നയിക്കുന്നതെങ്കിൽ, റിട്ടയർമെന്റിന് ശേഷം ഇതേ നിലവാരം തുടരാൻ എത്ര രൂപയുടെ സമ്പാദ്യം വേണം?.

നിതിൻ കൗശിക്കിന്റെ കണക്കനുസരിച്ച്, മാസം ഒരു ലക്ഷം രൂപ പിൻവലിച്ച് സുഖമായി ജീവിക്കണമെങ്കിൽ ഏകദേശം 4.5 കോടി രൂപയുടെ റിട്ടയർമെന്റ് നിധി ആവശ്യമാണ്. ഇത് കണക്കാക്കിയിരിക്കുന്നത് സുരക്ഷിതമായ പിൻവലിക്കൽ നിരക്ക്, പണപ്പെരുപ്പം എന്നിങ്ങനെ പ്രധാനമായും രണ്ട് കാര്യങ്ങൾ മുൻനിർത്തിയാണ്. നിങ്ങളുടെ ആകെ സമ്പാദ്യത്തിന്റെ 3.5 ശതമാനം മാത്രം പ്രതിവർഷം ചിലവിനായി എടുക്കുക. ഇത് നിങ്ങളുടെ സമ്പാദ്യം പെട്ടെന്ന് തീർന്നുപോകാതിരിക്കാൻ സഹായിക്കും. ഇന്നത്തെ ഒരു ലക്ഷം രൂപയ്ക്ക് പത്ത് വർഷം കഴിഞ്ഞാൽ ഇതേ മൂല്യം ഉണ്ടാകില്ല. അതുകൊണ്ട് പണപ്പെരുപ്പത്തെ അതിജീവിക്കുന്ന തരത്തിൽ വേണം നിങ്ങളുടെ നിക്ഷേപം വളരാൻ.

പഴയ 'ഒരു കോടി' ഫോർമുല ഇനി നടക്കില്ല

പണ്ട് ഒരു കോടി രൂപ കൈവശമുണ്ടെങ്കിൽ റിട്ടയർമെന്റ് സുരക്ഷിതമായി എന്ന് നമ്മൾ കരുതിയിരുന്നു. എന്നാൽ ഇന്നത്തെ കാലത്ത് ഒരു കോടി രൂപയിൽ നിന്ന് 5% നിരക്കിൽ തുക പിൻവലിച്ചാൽ പോലും മാസം ലഭിക്കുന്നത് ഏകദേശം 41,000 രൂപ മാത്രമാണ്. എന്നാൽ പണപ്പെരുപ്പം കാരണം ജീവിതച്ചെലവ് ഇതിലും എത്രയോ മുകളിലാകും. അതിനാൽ, ലക്ഷ്യം ചുരുങ്ങിയത് 5 കോടി രൂപയെങ്കിലും ആയി നിശ്ചയിക്കുന്നതാണ് ബുദ്ധി എന്ന് വിദഗ്ധർ പറയുന്നു.

ഇതിനൊപ്പം ശ്രദ്ധിക്കേണ്ട മറ്റു ചില കാര്യങ്ങളുമുണ്ട്. റിട്ടയർമെന്റ് കാലത്ത് വലിയൊരു തുക ചികിത്സയ്ക്കായി മാറ്റിവെക്കേണ്ടി വരും. അതിനാൽ വിരമിക്കുന്ന സമയത്തെ ആകെ സമ്പാദ്യത്തിന്റെ 25 ശതമാനമെങ്കിലും ആരോഗ്യ ആവശ്യങ്ങൾക്കായി കരുതണം. വലിയ നഗരങ്ങളിൽ നിന്ന് താരതമ്യേന ചിലവ് കുറഞ്ഞ ചെറിയ നഗരങ്ങളിലേക്ക് മാറുന്നത് നിങ്ങളുടെ സമ്പാദ്യം കൂടുതൽ കാലം നിലനിൽക്കാൻ സഹായിക്കും. ഏകദേശം 40% വരെ ചിലവ് കുറയ്ക്കാൻ ഇത്തരം മാറ്റങ്ങളിലൂടെ സാധിക്കും.