10 കോടി രൂപ സമ്പാദ്യം നേടണോ; തുടങ്ങാം നേരത്തെ; മാസം എത്ര രൂപ നിക്ഷേപിക്കണമെന്നറിയാം

വാർദ്ധക്യകാലത്തുള്ള ജീവിതമാണ് പലരുടെയും ആശങ്ക. ആ സമയത്ത് കണ്ടെത്തേണ്ടി വരുന്ന തുക, ചിലവ് എല്ലാം ആശങ്കയ്ക്ക് കാരണമാണ്. അതുകൊണ്ടുതന്ന വാർദ്ധക്യകാല ജീവിതം സുഗമമാക്കാൻ നിക്ഷേപവും ശീലമാക്കണം. ഏതു പദ്ധതികളിൽ നിക്ഷേപിക്കണം എത്ര രൂപ നിക്ഷേപിക്കണം എന്നത് ഓരോരുത്തരുടെയും സാമ്പത്തിക ശേഷി അനുസരിച്ചാണ്. ഏതു പദ്ധതി ആയാലും കൃത്യമായ കണക്കുകൂട്ടലിലൂടെ മുന്നോട്ടു പോയാൽ റിട്ടയർമെന്റ് കാലത്ത് ഉയർന്ന തുക സമ്പാദിക്കാൻ കഴിയും. വ്യവസ്ഥിത നിക്ഷേപ പദ്ധതി അഥവാ എസ്.ഐ.പി യാണ് ഏറ്റവും സുരക്ഷിതവും എളുപ്പവുമായ നിക്ഷേപ പദ്ധതി.

പ്രതിവാരമോ പ്രതിമാസമോ ആയി സമയ ബന്ധിതമായി ചെറിയതുക എസ്ഐപിയിലൂടെ നിക്ഷേപിക്കാൻ കഴിയും. വിപണിയിലെ നല്ലനേരം നോക്കാൻ ശ്രമിച്ച് തെറ്റുകൾ സംഭവിക്കുന്നത് ഒഴിവാക്കാൻ ഇതിലൂടെ സാധ്യമാണ്. മാത്രമല്ല, ദീർഘകാല സാമ്പത്തിക ലക്ഷ്യങ്ങളുടെ കാര്യത്തിൽ നേർവഴി കാണിക്കാനും എസ്ഐപി നിക്ഷേപങ്ങൾക്കു കഴിയും. എത്ര നേരത്തെ നിക്ഷേപം തുടങ്ങുന്നുവോ അത്രയും വരുമാനം വർദ്ധിപ്പിക്കാൻ സാധിക്കും എന്നതാണ് വസ്തുത.

അറുപതാം വയസിൽ 10 കോടി

ഇപ്പോൾ 25 വയസുള്ള ഒരു നിക്ഷേപകന് റിട്ടയർമെന്റ് കാലത്ത് അതായത്, 60 വയസിൽ 10 കോടി രൂപ ലഭിക്കണമെന്നതാണ് ലക്ഷ്യം. ആ ലക്ഷ്യത്തിലേക്ക് എങ്ങനെ എത്തുമെന്ന് നോക്കാം.

25 ആം വയസ്സു മുതൽ എസ്.ഐ.പി യിൽ നിക്ഷേപിക്കാൻ തുടങ്ങുകയാണെങ്കിൽ പ്രതിമാസം നൽകേണ്ടത് 15,000 രൂപയാണ്.

35 വർഷത്തെ നിക്ഷേപവും 12 ശതമാനം വാർഷിക പലിശയും ചേരുമ്പോൾ 60 വയസിൽ 10 കോടി രൂപ ലഭിക്കും. ഫണ്ട്‌സ് ഇന്ത്യയുടെ റിസർച്ച് റിപ്പോർട്ടിലാണ് ഈ കണക്കുകളുള്ളത്.

ഒരു കാര്യം പ്രത്യേകം ശ്രദ്ധിക്കണം. എസ്ഐപി നിക്ഷേപം തുടങ്ങാൻ വൈകിയാൽ പ്രതിമാസം നൽകേണ്ട തുകയിൽ വർദ്ധനവ് ഉണ്ടാകും. ഉദാഹരണത്തിന് 30ആം വയസ്സിലാണ് നിക്ഷേപം തുടങ്ങുന്നതെങ്കിൽ പ്രതിമാസം നൽകേണ്ടത് 28,000 രൂപയാണ്. എന്നാൽ മാത്രമേ നിങ്ങൾക്ക് 60ആം വയസ്സിൽ 10 കോടി രൂപ നേടാൻ കഴിയുകയുള്ളൂ. 40ആം വയസ്സിലാണ് നിക്ഷേപം തുടങ്ങുന്നതെങ്കിൽ പ്രതിമാസം 1,00,000 രൂപ നൽകണം. എന്നാൽ മാത്രമേ അറുപതാം വയസ്സിൽ 10 കോടി രൂപ നേടൻ സാധിക്കുകയുള്ളൂ. 60ആം വയസിൽ

പത്തു കോടി രൂപയാണ് നിങ്ങളുടെ ലക്ഷ്യമെങ്കിൽ, നിക്ഷേപം തുടങ്ങാൻ വൈകുംതോറും പ്രതിമാസ നിക്ഷേപത്തിലും വലിയ വർദ്ധനവ് ഉണ്ടാകും.

മ്യൂച്വൽ ഫണ്ടുകളിലെ എസ്‌ഐപിയുടെ വരവോടെ നിക്ഷേപ രംഗത്ത് വലിയ മാറ്റമാണ് ഉണ്ടായത്. ഉയർന്ന തുക ഒറ്റത്തവണയായി നിക്ഷേപിക്കുന്നതിന് പകരം

കൃത്യമായ ഇടവേളകളിൽ ചെറിയ തുക നിക്ഷേപിക്കാൻ നിക്ഷേപകർക്ക് സാധിച്ചു. പക്ഷേ അപ്പോഴും നിക്ഷേപിക്കാൻ തിരഞ്ഞെടുക്കുന്ന സമയം വളരെ പ്രധാനപ്പെട്ടതാണ്. വലിയ നിക്ഷേപങ്ങളുടെ സമ്മർദ്ദമില്ലാതെ സാമ്പത്തിക ലക്ഷ്യങ്ങളിൽ എത്തിച്ചേരാൻ, കഴിയുന്നത്ര നേരത്തെ നിക്ഷേപം ആരംഭിക്കുന്നതാണ് ഉചിതം.

എസ്.ഐ.പി നിക്ഷേപത്തിൽ ശ്രദ്ധിക്കേണ്ട കാര്യങ്ങള്‍

1. സാമ്പത്തിക ലക്ഷ്യങ്ങള്‍ക്ക് സമയക്രമം നിശ്ചയിക്കുക.

2. എത്ര പണമാണ് നിക്ഷേപിക്കാനാഗ്രഹിക്കുന്നതെന്നു തീരുമാനിക്കുക

3. റിസ്‌കെടുക്കാനുള്ള ക്ഷമതയ്ക്കനുസരിച്ച് നിക്ഷേപം വൈവിധ്യ വല്‍ക്കരിക്കുക.

4. എസ്ഐപി അടവുകള്‍ സമയാസമയങ്ങളില്‍ ടോപ്പപ് ചെയ്യുക. വരുമാനം വളരുന്നതിനനുസരിച്ച് അതിലെ ഉയര്‍ന്ന ഒരുവിഹിതം എസ്ഐപി ടോപപ്പിനായി മാറ്റി വെക്കുക.

5. പോര്‍ട്ഫോളിയോ പ്രകടനം വിലയിരുത്തുക. സമയ ബന്ധിതമായി പോര്‍ട്ഫോളിയോ അവലോകനം നടത്തി സന്തുലനം ഉറപ്പു വരുത്തണം.