പലിശയായി 2 ലക്ഷം രൂപ വരെ നേടാം; ഈ പോസ്റ്റ് ഓഫീസ് പദ്ധതിയെക്കുറിച്ച് അറിഞ്ഞിരിക്കാം

ഓഹരി വിപണിയിലെ ചാഞ്ചാട്ടങ്ങളിൽ ആശങ്കപ്പെടാതെ, തങ്ങളുടെ സമ്പാദ്യം സുരക്ഷിതമായിരിക്കണമെന്നും അതോടൊപ്പം മികച്ച ആദായം ലഭിക്കണമെന്നും ആഗ്രഹിക്കുന്നവർക്ക് കൈത്താങ്ങായി പോസ്റ്റ് ഓഫീസിന്റെ സ്മോൾ സേവിങ്സ് സ്കീമുകൾ. കേന്ദ്ര സർക്കാരിന്റെ നേരിട്ടുള്ള നിയന്ത്രണത്തിലുള്ള പദ്ധതിയായതിനാൽ ഇതിൽ നിക്ഷേപിക്കുന്ന പണം പൂർണ്ണമായും സുരക്ഷിതമാണ്. പോസ്റ്റ് ഓഫീസ് ടൈം ഡെപ്പോസിറ്റ് അഥവാ നാഷണൽ സേവിങ്സ് ടൈം ഡെപ്പോസിറ്റ് അക്കൗണ്ടിലൂടെ നിക്ഷേപകർക്ക് ലക്ഷങ്ങൾ പലിശയായി മാത്രം നേടിയെടുക്കാൻ സാധിക്കും.

എന്താണ് പോസ്റ്റ് ഓഫീസ് ടൈം ഡെപ്പോസിറ്റ്?

ബാങ്കുകളിലെ ഫിക്സഡ് ഡെപ്പോസിറ്റുകൾക്ക് സമാനമാണ് പോസ്റ്റ് ഓഫീസിലെ ടൈം ഡെപ്പോസിറ്റ് സ്കീം. ഒന്ന്, രണ്ട്, മൂന്ന് അല്ലെങ്കിൽ അഞ്ച് വർഷം എന്നിങ്ങനെ നിക്ഷേപകർക്ക് തങ്ങളുടെ സാമ്പത്തിക ലക്ഷ്യങ്ങൾക്കനുസരിച്ച് നിക്ഷേപ കാലാവധി തിരഞ്ഞെടുക്കാം. ഓരോ കാലയളവിനും വ്യത്യസ്ത പലിശ നിരക്കുകളാണ് ലഭിക്കുന്നത്.

നിലവിലെ പലിശ നിരക്കുകൾ:

1 വർഷത്തെ നിക്ഷേപത്തിന്: 6.9%

2 വർഷത്തെ നിക്ഷേപത്തിന്: 7.0%

3 വർഷത്തെ നിക്ഷേപത്തിന്: 7.1%

5 വർഷത്തെ നിക്ഷേപത്തിന്: 7.5%

ഗ്രാമപ്രദേശങ്ങളിലും ചെറുകിട നഗരങ്ങളിലും ഏറ്റവും ജനപ്രീതിയുള്ള നിക്ഷേപ മാർഗ്ഗങ്ങളിലൊന്നാണ് ഇത്. വെറും 1,000 രൂപ മുതൽ ഈ പദ്ധതിയിൽ അക്കൗണ്ട് തുടങ്ങാം. നിക്ഷേപത്തിന് ഉയർന്ന പരിധിയില്ല എന്നതും ഇതിന്റെ പ്രത്യേകതയാണ്.

പലിശയിലൂടെ മാത്രം എങ്ങനെ 2 ലക്ഷം രൂപ നേടാം?

ശരിയായ തുകയും കാലാവധിയും തിരഞ്ഞെടുക്കുകയാണെങ്കിൽ പലിശ ഇനത്തിൽ മാത്രം വൻ തുക സമ്പാദിക്കാൻ നിക്ഷേപകർക്ക് സാധിക്കും. ഉദാഹരണത്തിന്, ഒരാൾ 4.5 ലക്ഷം രൂപ അഞ്ച് വർഷത്തേക്ക് നിക്ഷേപിച്ചാൽ 7.5 ശതമാനം പലിശ നിരക്കിൽ കാലാവധി പൂർത്തിയാകുമ്പോൾ ഏകദേശം 6.51 ലക്ഷം രൂപ തിരികെ ലഭിക്കും. ഇതിൽ 2.01 ലക്ഷം രൂപയും പലിശ ഇനത്തിൽ ലഭിക്കുന്ന ലാഭമാണ്. ഇനി 2.5 ലക്ഷം രൂപയാണ് നിക്ഷേപിക്കുന്നതെങ്കിൽ അഞ്ച് വർഷം കൊണ്ട് ഏകദേശം 1.12 ലക്ഷം രൂപ പലിശയായി ലഭിക്കും. ഇത്തരത്തിൽ സുരക്ഷിതമായ മാർഗ്ഗത്തിലൂടെ പണം വളർത്താൻ ഈ പദ്ധതി സഹായിക്കുന്നു.

 

അഞ്ച് വർഷത്തെ ടൈം ഡെപ്പോസിറ്റ് തിരഞ്ഞെടുക്കുന്നവർക്ക് ആദായനികുതി നിയമത്തിലെ സെക്ഷൻ 80C പ്രകാരം നികുതി ഇളവിന് അർഹതയുണ്ട്. എന്നാൽ ലഭിക്കുന്ന പലിശ പൂർണ്ണമായും നികുതിരഹിതമല്ല. പലിശ വരുമാനം ഒരു നിശ്ചിത പരിധി കടക്കുകയാണെങ്കിൽ നികുതി നൽകേണ്ടി വരും.

മൂന്ന് മാസം കൂടുമ്പോഴാണ് കേന്ദ്ര ധനമന്ത്രാലയം പോസ്റ്റ് ഓഫീസ് പദ്ധതിയുട പലിശ നിരക്കുകൾ പുനപരിശോധിക്കുന്നത്. വിപണിയിലെ മാറ്റങ്ങൾക്കനുസരിച്ച് ഇതിൽ നേരിയ മാറ്റങ്ങൾ വരാമെങ്കിലും, ഒരിക്കൽ നിക്ഷേപിച്ചാൽ കാലാവധി തീരുന്നത് വരെ മാറ്റമില്ലാത്ത പലിശ ഉറപ്പായും ലഭിക്കും. സുരക്ഷിതത്വവും മികച്ച ലാഭവും ഒരേപോലെ ആഗ്രഹിക്കുന്ന സാധാരണക്കാർക്ക് പോസ്റ്റ് ഓഫീസിലെ ഈ ടൈം ഡെപ്പോസിറ്റ് മികച്ചൊരു സമ്പാദ്യ മാർഗ്ഗമാണ്.