നല്ല ശമ്പളമുണ്ടായിട്ടും മിച്ചം പിടിക്കാനാവുന്നില്ലേ? സമ്പാദ്യം കീറാമുട്ടിയായി മാറുന്നതിന്റെ 8 കാരണങ്ങൾ

നമ്മുടെ മാതാപിതാക്കളുടെ കാലത്തൊക്കെ തുച്ഛമായ വരുമാനമുണ്ടായിരുന്നിട്ടും ഭാവിയിലേക്കായി എന്തെങ്കിലും മിച്ചം പിടിക്കാൻ അവർക്ക് സാധിച്ചിരുന്നു. എന്നാൽ, ഇന്ന് കൈനിറയെ ശമ്പളമുണ്ടായിട്ടും മാസാവസാനം അക്കൗണ്ട് ബാലൻസ് നോക്കുമ്പോൾ പലരുടെയും നെഞ്ചിടിക്കും. നല്ല വരുമാനമുണ്ടായിട്ടും സമ്പാദ്യം ഒരു കീറാമുട്ടിയായി മാറുന്നതിന്റെ പ്രധാന കാരണങ്ങൾ പരിശോധിക്കാം.

1. ചെലവിന് അനുസരിച്ച് വരുമാനം ഇല്ല

പഴയകാലത്തെ അപേക്ഷിച്ച് ശമ്പളത്തിൽ വലിയ വർദ്ധനവുണ്ടായിട്ടുണ്ട് എന്നത് സത്യമാണ്. എന്നാൽ അതിനൊപ്പം തന്നെ ജീവിതച്ചെലവുകളും കുതിച്ചുയർന്നു. പണ്ട് വരുമാനത്തിന്റെ ചെറിയൊരു ഭാഗം മാത്രം വാടകയ്ക്കായി നീക്കിവെച്ചാൽ മതിയായിരുന്നു. ഇന്ന് ശമ്പളത്തിന്റെ 30 ശതമാനത്തോളം വാടകയ്ക്കും വൈദ്യുതി ബില്ലിനുമായി പോകുന്നു. വീട്ടുചെലവുകളും വിദ്യാഭ്യാസവും ചികിത്സാച്ചെലവുകളും കൂടിയതോടെ ബാക്കി വരുന്നത് തുച്ഛമായ തുക മാത്രം.

2. സബ്‌സ്‌ക്രിപ്‌ഷനുകളുടെ കെണി

പഴയ തലമുറയ്ക്ക് കേബിൾ ടിവി ബില്ല് മാത്രമായിരുന്നു മാസാവസാനത്തെ അധികച്ചെലവ്. എന്നാൽ ഇന്ന് അങ്ങനെയല്ല. ഒടിടി പ്ലാറ്റ്‌ഫോമുകൾ, മ്യൂസിക് ആപ്പുകൾ, ജിം മെമ്പർഷിപ്പ്, ഓൺലൈൻ ഗെയിമുകൾ എന്നിങ്ങനെ നൂറുകൂട്ടം സബ്‌സ്‌ക്രിപ്‌ഷനുകൾ. ഓരോന്നും ചെറിയ തുകയാണെന്ന് തോന്നുമെങ്കിലും, മാസാവസാനം ഇവയെല്ലാം കൂട്ടിനോക്കുമ്പോൾ വലിയൊരു തുക നിങ്ങളുടെ സമ്പാദ്യത്തിൽ നിന്ന് ചോർന്നുപോയിട്ടുണ്ടാകും.

3. ജീവിതച്ചെലവിലെ വർദ്ധനവ്

ഇന്ന് വളരെ സാധാരണമായൊരു ജീവിതം നയിക്കാൻ പോലും വൻതുക ചെലവാക്കേണ്ടി വരുന്നു. മെട്രോ നഗരങ്ങളിലാണെങ്കിൽ വാടക, കുട്ടികളുടെ സ്കൂൾ ഫീസ്, യാത്ര, ഭക്ഷണം എന്നിവയ്ക്കു മാത്രമായി ശമ്പളത്തിന്റെ വലിയൊരു ഭാഗം മാറ്റി വെക്കേണ്ടി വരും. ആഡംബരങ്ങളൊന്നുമില്ലാതെ തന്നെ ജീവിക്കാൻ ഇന്ന് മുൻപത്തെക്കാൾ കൂടുതൽ പണം ആവശ്യമാണ്.

4. ഇഎംഐ എന്ന ചതിക്കുഴി

പണ്ട് പണം സ്വരുക്കൂട്ടിയ ശേഷമായിരുന്നു ആളുകൾ സാധനങ്ങൾ വാങ്ങിയിരുന്നത്. ഇന്ന് നേരെ തിരിച്ചാണ്. കയ്യിൽ പണമില്ലെങ്കിലും ഇഎംഐ വഴി എളുപ്പത്തിൽ സാധനങ്ങൾ വാങ്ങാം. 70,000 രൂപയുടെ ഫോൺ 3,000 രൂപയുടെ മാസത്തവണയിൽ കിട്ടുമ്പോൾ നമ്മൾ അതിന്റെ യഥാർത്ഥ വില മറക്കുന്നു. ഇത്തരം നിരവധി ഇഎംഐകൾ ഒത്തുചേരുമ്പോൾ ഭാവിയിലെ വരുമാനം കൂടി മുൻകൂട്ടി ചെലവാക്കപ്പെടുകയാണ്.

5. ഇൻസ്റ്റഗ്രാം ടാക്സ്

സോഷ്യൽ മീഡിയയാണ് ഇന്നത്തെ കാലത്തെ ഏറ്റവും വലിയ ചെലവ് വർദ്ധിപ്പിക്കുന്നത്. മറ്റുള്ളവരുടെ വിദേശയാത്രകളും പുത്തൻ കാറുകളും ആഡംബര ജീവിതവും കാണുമ്പോൾ നമുക്കും അതിന് പ്രലോഭനമുണ്ടാകുന്നു. ഈ 'സോഷ്യൽ സ്റ്റാറ്റസ്' നിലനിർത്താൻ വേണ്ടി അനാവശ്യമായി പണം ചെലവാക്കുന്നത് സമ്പാദ്യത്തെ ബാധിക്കുന്നു.

6. തൊഴിൽ മേഖലയിലെ അനിശ്ചിതത്വം

പണ്ടത്തെ കാലത്ത് ജോലിയിൽ വലിയ സുരക്ഷിതത്വമുണ്ടായിരുന്നു. എന്നാൽ ഇന്ന് പിരിച്ചുവിടലുകളും കമ്പനികളുടെ തകർച്ചയും നിത്യസംഭവമാണ്. ഈ അനിശ്ചിതത്വം കാരണം പണം ദീർഘകാലത്തേക്ക് നിക്ഷേപിക്കുന്നതിന് പകരം കയ്യിൽ വെക്കാൻ പലരും താല്പര്യപ്പെടുന്നു. ഇത് കൃത്യമായ നിക്ഷേപശീലത്തെ തടസ്സപ്പെടുത്തുന്നു.

7. സാമ്പത്തിക അലസത

"അടുത്ത വർഷം ശമ്പളം കൂടുമ്പോൾ സമ്പാദിച്ചു തുടങ്ങാം" എന്ന ചിന്ത പലർക്കുമുണ്ട്. ഈ വൈകിക്കൽ വലിയൊരു നഷ്ടമാണ്. നിക്ഷേപം നേരത്തെ തുടങ്ങുന്നതിലൂടെ ലഭിക്കുന്ന കോമ്പൗണ്ടിങ് ഗുണങ്ങൾ ഇതുവഴി നഷ്ടമാകുന്നു. ഒരു വർഷത്തെ താമസം പോലും ലക്ഷക്കണക്കിന് രൂപയുടെ നഷ്ടമുണ്ടാക്കിയേക്കാം.

8. ഒന്നിലധികം ഓപ്ഷനുകൾ നൽകുന്ന ആശയക്കുഴപ്പം

മ്യൂച്വൽ ഫണ്ടുകൾ, ഓഹരി വിപണി, എസ്‌ഐപി, ഡിജിറ്റൽ ഗോൾഡ് എന്നിങ്ങനെ നിക്ഷേപിക്കാൻ ഇന്ന് ധാരാളം വഴികളുണ്ട്. ഏത് തിരഞ്ഞെടുക്കണം എന്ന ആശയക്കുഴപ്പം കാരണം പലരും നിക്ഷേപം തുടങ്ങാതെ നീട്ടിവെക്കുന്നു.

സമ്പാദ്യം എന്നത് ഇന്ന് വെല്ലുവിളി നിറഞ്ഞതാണെങ്കിലും അസാധ്യമല്ല. അനാവശ്യ ചെലവുകൾ തിരിച്ചറിയുകയും കൃത്യമായ പ്ലാനിംഗോടെ നിക്ഷേപം തുടങ്ങുകയും ചെയ്താൽ ഏത് വലിയ സാമ്പത്തിക പ്രതിസന്ധിയെയും മറികടക്കാൻ നമുക്ക് സാധിക്കും.