പ്രതിമാസം 5,000 നിക്ഷേപിക്കാം; വിരമിക്കൽ സമയത്ത് 2.64 കോടിയും പെൻഷനായി 1.34 ലക്ഷവും കയ്യിൽ കിട്ടും

റിട്ടയർമെന്റ് ജീവിതം എപ്പോഴും മുന്നിൽ കണ്ടാണ് നിക്ഷേപ പദ്ധതികൾ തിരഞ്ഞെടുക്കേണ്ടത്. ജോലിയിൽനിന്നും വിരമിക്കുമ്പോൾ ആരുടെയും ആശ്രയമില്ലാതെ തന്നെ ജീവിത ചെലവുകൾ കൈകാര്യം ചെയ്യാൻ ഈ നിക്ഷേപ പദ്ധതികൾ നിങ്ങളെ സഹായിക്കും. എന്നാൽ, ഈ സാമ്പത്തിക ലക്ഷ്യം നേടുന്നതിന് ശരിയായ ആസൂത്രണം ഉണ്ടായിരിക്കണം. വിരമിക്കലിന് ശേഷമുള്ള ജീവിതം സന്തോഷകരമാക്കാൻ ഇതിലൂടെ സാധിക്കും. മാത്രമല്ല, റിട്ടയർമെന്റിനുശേഷം ഒരു വ്യക്തിക്ക് ജീവിതത്തിലുടനീളം അവരുടെ ചെലവുകൾ നടത്തുന്നതിന് മതിയായ റിട്ടയർമെന്റ് കോർപ്പസും ഇതിലൂടെ നേടിയെടുക്കാൻ സാധിക്കും.

റിട്ടയർമെന്റ് ജീവിതം സുരക്ഷിതമാക്കാനുള്ള മികച്ചൊരു സാമ്പത്തിക മാർഗമാണ് എസ്ഐപികളിലെ നിക്ഷേപം. വിരമിക്കൽ സമയത്തെ സാമ്പത്തിക ലക്ഷ്യം കൈവരിക്കാൻ ഒരാളെ സഹായിക്കുന്ന ദീർഘകാല നിക്ഷേപ തന്ത്രമാണിത്. നിരവധി മൂച്വൽ ഫണ്ടുകൾ വിപണിയിൽ ലഭ്യമാണ്. നിങ്ങളുടെ സാമ്പത്തിക ആവശ്യം മനസിലാക്കി അനുയോജ്യമായവ തിരഞ്ഞെടുക്കാവുന്നതാണ്. 500 രൂപയില്‍ നിന്ന് നിക്ഷേപം ആരംഭിക്കാന്‍ കഴിയുന്ന നിരവധി എസ്ഐപി പദ്ധതികള്‍ നിലവിലുണ്ട്.

റിട്ടയർമെന്റ് സമയത്ത് 2.64 കോടി നേടാനായി ഒരാൾ 25-ാം വയസിൽ നിക്ഷേപം തുടങ്ങണം. പ്രതിമാസം 5000 രൂപയാണ് നിക്ഷേപം നടത്തേണ്ടത്. ഓരോ വർഷം കൂടുമ്പോഴും നിക്ഷേപം 5 ശതമാനം വർധിപ്പിക്കുക. 30 വർഷം ഇങ്ങനെ തുടരുന്നത് നല്ലൊരു നിക്ഷേപ തുക സ്വന്തമാക്കാൻ സഹായിക്കും.

പ്രതിമാസം 5000 രൂപ നിക്ഷേപിച്ച് 2.64 കോടി എങ്ങനെ നേടാം

ഇതിനായി ഒരു വ്യക്തി ഒരു മ്യൂച്വൽ ഫണ്ട് സ്കീമിൽ പ്രതിമാസം 5,000 രൂപയുടെ നിക്ഷേപം നടത്തണം. നിക്ഷേപകൻ അവരുടെ വാർഷിക എസ്ഐപി നിക്ഷേപം 5 ശതമാനം വർധിപ്പിക്കണം. ഈ നിക്ഷേപത്തിലെ റിട്ടേൺസ് 12 ശതമാനമാണ്. 30 വർഷമാണ് നിക്ഷേപ കാലാവധി. 30 വർഷത്തിനുള്ളിൽ, മൊത്തം നിക്ഷേപം 39,86,331 രൂപയും റിട്ടേൺസിലൂടെ 2,23,80,699 രൂപയും ലഭിക്കും. കാലാവധി പൂർത്തിയാകുമ്പോഴുള്ള നിങ്ങളുടെ സമ്പാദ്യം 2,63,67,030 രൂപ ആയിരിക്കും.

പ്രതിമാസം 1.34 ലക്ഷം പെൻഷൻ എങ്ങനെ നേടാം

ഒരാൾ 2,23,80,699 രൂപ സ്ഥിരനിക്ഷേപത്തിൽ (എഫ്ഡി) നിക്ഷേപിക്കുകയും അതിൽ നിന്ന് 6 ശതമാനം പലിശ പ്രതീക്ഷിക്കുകയും ചെയ്താൽ, അവർക്ക് ലഭിക്കുന്ന പ്രതിമാസ വരുമാനം 1,11,347 രൂപ ആയിരിക്കും. ഈ തുക ഒരു മ്യൂച്വൽ ഫണ്ടിൽ നിക്ഷേപിച്ചാൽ, അവർക്ക് 30 വർഷത്തേക്ക് പ്രതിമാസം 1,33,500 രൂപ ലഭിക്കും.