ക്രെഡിറ്റ് സ്കോർ ഇല്ലേ? വിദ്യാഭ്യാസ വായ്പ കിട്ടില്ലെന്ന് വിഷമിക്കേണ്ട, അറിയാം മറ്റു വഴികൾ

പേഴ്സണൽ ലോണോ, ഹോം ലോണോ, എജ്യൂക്കേഷൻ ലോണോ എന്തുമാകട്ടെ, വായ്പകൾ എളുപ്പത്തിൽ നേടണമെങ്കിൽ ഉയർന്ന ക്രെഡിറ്റ് സ്കോർ ഉണ്ടായിരിക്കണം. വായ്പകൾ ലഭിക്കുന്നതിൽ ക്രെഡിറ്റ് സ്കോർ നിർണായക പങ്ക് വഹിക്കുന്നുണ്ട്. വിദ്യാർത്ഥികളെ സംബന്ധിച്ചിടത്തോളം ഉന്നത പഠനത്തിന് വിദ്യാഭ്യാസ വായ്പകൾ വളരെയധികം ഗുണം ചെയ്യുന്നുണ്ട്. എന്നാൽ, ഉയർന്ന ക്രെഡിറ്റ് സ്കോറും വ്യക്തമായ ക്രെഡിറ്റ് ചരിത്രവും ഇല്ലാത്തത് വിദ്യാർത്ഥികൾക്ക് വിദ്യാഭ്യാസ വായ്പകൾ നേടുന്നതിൽ കാര്യമായ വെല്ലുവിളികൾ ഉയർത്തുന്നുണ്ട്.

അത്തരം സാഹചര്യങ്ങളിൽ, നല്ലൊരു ക്രെഡിറ്റ് പ്രൊഫൈൽ ഇല്ലെങ്കിലും വിദ്യാഭ്യാസ ധനസഹായം ലഭിക്കുന്നതിന് വിദ്യാർത്ഥികൾക്ക് മുന്നിൽ മറ്റു നിരവധി മാർഗങ്ങളുണ്ട്. ക്രെഡിറ്റ് സ്കോർ ഇല്ലാതെ വിദ്യാഭ്യാസ വായ്പ നേടുന്നതിനുള്ള ചില ഓപ്ഷനുകൾ നോക്കാം.

സർക്കാർ പിന്തുണയുള്ള പദ്ധതികൾ

രാജ്യത്തെ സാമ്പത്തികമായി പിന്നാക്കം നിൽക്കുന്ന വിഭാഗങ്ങളിൽ (ഇഡബ്ല്യുഎസ്) നിന്നുള്ള വിദ്യാർത്ഥികളെ സഹായിക്കുന്നതിനായി ഇന്ത്യാ ഗവൺമെന്റ് നിരവധി പദ്ധതികൾ ആരംഭിച്ചിട്ടുണ്ട്. പ്രൊഫഷണൽ അല്ലെങ്കിൽ ടെക്നിക്കൽ കോഴ്സുകൾ പഠിക്കുന്ന വിദ്യാർത്ഥികൾക്ക് മൊറട്ടോറിയം കാലയളവിൽ പലിശ സബ്സിഡി നൽകാൻ സെൻട്രൽ സെക്ടർ പലിശ സബ്സിഡി പദ്ധതി (CSIS) കൊണ്ടുവന്നിട്ടുണ്ട്. മാതാപിതാക്കളുടെ വാർഷിക വരുമാനം 4.5 ലക്ഷത്തിൽ കവിയാത്ത, സാമ്പത്തികമായി പിന്നാക്കം നിൽക്കുന്ന വിഭാഗങ്ങളിലെ വിദ്യാർത്ഥികൾക്ക് മാത്രമേ ഈ പദ്ധതിയുടെ പ്രയോജനം നേടാനാകൂ.

സമാനമായ രീതിയിൽ, വിദ്യാഭ്യാസ വായ്പകൾക്കായുള്ള ക്രെഡിറ്റ് ഗ്യാരണ്ടി ഫണ്ട് സ്കീം (CGFSEL) ക്രെഡിറ്റ് ഗ്യാരണ്ടികൾ നൽകുന്നു. ഇതിലൂടെ ഈടിന്റെ ആവശ്യകത ഇല്ലാതെയും ക്രെഡിറ്റ് ചരിത്രമില്ലാത്ത വിദ്യാർത്ഥികൾക്കും വായ്പകൾ എളുപ്പത്തിൽ ലഭിക്കുന്നു. പഠനം പൂർത്തിയാക്കിയശേഷം മാത്രം വിദ്യാർത്ഥികൾക്ക് വായ്പ തിരിച്ചടച്ചാൽ മതിയാകും. ഈ പദ്ധതികളെക്കുറിച്ചുള്ള കൂടുതൽ വിവരങ്ങൾക്ക് വിദ്യാഭ്യാസ മന്ത്രാലയത്തിലെ ഉന്നത വിദ്യാഭ്യാസ വകുപ്പിന്റെ ഔദ്യോഗിക വെബ്സൈറ്റ് സന്ദർശിക്കുക.

കൊളാറ്ററലുകളും സഹ-അപേക്ഷകരും

ക്രെഡിറ്റ് ചരിത്രം ഇല്ലാത്ത വ്യക്തികൾക്ക് വായ്പ നൽകുന്നതുമായി ബന്ധപ്പെട്ട അപകടസാധ്യത കുറയ്ക്കുന്നതിന് മുൻനിര ബാങ്കുകൾ പലപ്പോഴും ഉയർന്ന ക്രെഡിറ്റ് പ്രൊഫൈലുള്ള സഹ-അപേക്ഷകരെയും കൊളാറ്ററലുകളും പരിഗണിക്കാറുണ്ട്. ഉദാഹരണത്തിന്, ആക്സിസ് ബാങ്ക്, എച്ച്ഡിഎഫ്സി ബാങ്ക്, ഐസിഐസിഐ ബാങ്ക് തുടങ്ങിയ ബാങ്കുകൾ സെക്യൂരിറ്റികളും കൊളാറ്ററലുകളും ഈടായി നൽകി വായ്പ നൽകുന്നു. വസ്തുക്കൾ, സ്ഥിര നിക്ഷേപങ്ങൾ തുടങ്ങിയ ആസ്തികൾ പണയം വയ്ക്കുന്നത് ഈ ബാങ്കുകളുടെ വായ്പ ലഭിക്കാനുള്ള സാധ്യത വർധിപ്പിക്കും.

ഉയർന്ന ക്രെഡിറ്റ് സ്കോറും 750 അല്ലെങ്കിൽ അതിൽ കൂടുതലുള്ള സ്‌കോറും ഉള്ള രക്ഷിതാവ് പോലുള്ള സഹ-അപേക്ഷകൻ ഉണ്ടായിരിക്കുന്നത് വിദ്യാഭ്യാസ വായ്പാ ലഭിക്കാനുള്ള സാധ്യത വർധിപ്പിക്കും.

എൻ‌ബി‌എഫ്‌സികൾ, ബാങ്കുകൾ, ഇതര വായ്പ നൽകുന്നവർ

സാമ്പത്തിക വെല്ലുവിളികൾ നേരിടുന്ന വിദ്യാർത്ഥികൾക്ക് പ്രമുഖ ബാങ്കിംഗ് ഇതര ധനകാര്യ കമ്പനികളും (NBFC-കൾ) ബാങ്കുകളും വിദ്യാഭ്യാസ വായ്പ നൽകുന്നുണ്ട്. നിരവധി വായ്പാദാതാക്കൾ വ്യത്യസ്ത നിരക്കിൽ വിദ്യാഭ്യാസ വായ്പകൾ വാഗ്‌ദാനം ചെയ്യുന്നു. എച്ച്ഡിഎഫ്സി ബാങ്കിന്റെ വിദ്യാഭ്യാസ വായ്പകൾ പ്രതിവർഷം 9.55% പലിശ നിരക്കിൽ ആരംഭിക്കുന്നു, ബജാജ് ഫിനാൻസ് 10.25% മുതൽ ആരംഭിക്കുന്നു.

സഹ-അപേക്ഷകരുടെ ക്രെഡിറ്റ് പ്രൊഫൈൽ, നൽകിയ കൊളാറ്ററൽ തുക, മുൻകാല ക്രെഡിറ്റ് ചരിത്രം, സഹ-അപേക്ഷകരുടെ ക്രെഡിറ്റ് സ്കോർ തുടങ്ങിയ നിരവധി ഘടകങ്ങളെ ഒരു വ്യക്തിക്ക് ബാധകമായ അന്തിമ പലിശ നിരക്ക് ആശ്രയിച്ചിരിക്കുന്നുവെന്നത് ശ്രദ്ധിക്കേണ്ടതാണ്. അതിനാൽ, പുതിയ പലിശ നിരക്കുകളെക്കുറിച്ച് അറിയാൻ വായ്പ അപേക്ഷിക്കുന്ന ധനകാര്യ സ്ഥാപനത്തെ സമീപിക്കുക. ഈ ലോണുകൾക്ക് ബാധകമായ പലിശ നിരക്കുകൾ, ബന്ധപ്പെട്ട വെബ്‌സൈറ്റുകളിൽ നൽകിയിരിക്കുന്ന ഇഎംഐ കാൽക്കുലേറ്ററുകൾ വഴി താരതമ്യം ചെയ്യാനും കഴിയും.

അറിയിപ്പ്: മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് വായ്പ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. സ്വന്തം റിസ്‌കില്‍ മാത്രം വായ്പ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗ്രേനിയം ഇന്‍ഫര്‍മേഷന്‍ ടെക്നോളജീസും ലേഖകനും ഉത്തരവാദികളല്ല.