ഇപ്പോള്‍ ഗ്യാരന്റീട് റിട്ടേണ്‍ ഇന്‍ഷുറന്‍സ് പ്ലാനുകള്‍ തിരഞ്ഞെടുക്കുന്നത് അനുയോജ്യമോ?

അടുത്ത കാലത്തായി ഗ്യാരന്റീട് റിട്ടേണ്‍ ഇന്‍ഷുറന്‍സ് പ്ലാനുകളുടെ ആവശ്യക്കാരുടെ എണ്ണത്തില്‍ വലിയ വര്‍ധനവുണ്ടായിട്ടുണ്ട്. നികുതി ഇളവുകളോടൊപ്പം ദീര്‍ഘകാലത്തേക്ക് ഉയര്‍ന്ന നിരക്കിലുള്ള സ്ഥിരമായ ആദായവും ഉപയോക്താക്കള്‍ക്ക് ഉറപ്പുനല്‍കുന്നതിനാലാണിത്. ഇവ ദീര്‍ഘകാല നിക്ഷേപങ്ങള്‍ക്ക് ഏറ്റവും മികച്ച തെരഞ്ഞെടുപ്പാണെന്ന് ഇന്‍ഷുന്‍സ് ഏജന്റുകളും സ്ഥാപനങ്ങളും ഉപഭോക്താക്കളെ ബോധ്യപ്പെടുത്തുകയും ചെയ്യുന്നു.

2021 സാമ്പത്തിക വര്‍ഷത്തിന്റെ ആദ്യ പാദത്തില്‍ ഗ്യാരന്റീട് ഇന്‍ഷുറന്‍സ് പ്ലാനുകളുടെ ആവശ്യക്കാരുടെ എണ്ണത്തില്‍ 15 മുതല്‍ 20 ശതമാനത്തിന്റെ വരെ വര്‍ധനവാണ് ഉണ്ടായിരിക്കുന്നതെന്ന് വിവിധ റിപ്പോര്‍ട്ടുകള്‍ വ്യക്തമാക്കുന്നു. ബാങ്കുകളിലെ സ്ഥിര നിക്ഷേപങ്ങളുടെ പലിശ നിരക്ക് കുറഞ്ഞു കൊണ്ടിരിക്കുന്ന സാഹചര്യത്തിലും ഓഹരി വിപണിയിലെ ഉയര്‍ന്ന അസ്ഥിരതകള്‍ക്കിടയിലും ഇപ്പോള്‍ ഗ്യാരന്റീട് ഇന്‍ഷുറന്‍സ് പ്ലാനുകള്‍ തെരഞ്ഞെടുക്കുന്നത് അഭികാമ്യമാണോ എന്ന് നമുക്കൊന്ന് നോക്കാം.

വിദഗ്ധരുടെ അഭിപ്രായങ്ങള്‍ പ്രകാരം വിപണിയിലെ ഒട്ടുമിക്ക ഗ്യാരന്റീട് റിട്ടേണ്‍ പോളിസികളും സ്ഥിര നിക്ഷേപ പദ്ധതികളെക്കാള്‍ ആകര്‍ഷകമായതും ഉയര്‍ന്നതുമായ ഇന്റേണല്‍ റേറ്റ് ഓഫ് റിട്ടേണ്‍ (ഐആര്‍ആര്‍) വാഗ്്ദാനം ചെയ്യുന്നവയാണ്. ആര്‍ബിഐ റിപ്പോ നിരക്കില്‍ വരുത്തിയ കുറവുകള്‍ കാരണം ഹ്രസ്വകാല നിക്ഷേപ പദ്ധതികളുടെ പലിശ നിരക്ക് കുത്തനെ ഇടിഞ്ഞിരിക്കുകയാണ്. എന്നാല്‍ അത്രയും നിരക്കില്‍ ദീര്‍ഘകാല നിക്ഷേപ പദ്ധതികളുടെ പലിശ നിരക്കില്‍ മാറ്റമുണ്ടായിട്ടില്ല.

30 വയസ്സുള്ള ഒരു പുരുഷന് 10 മുതല്‍ 20 വര്‍ഷം വരെയുള്ള കാലയളവിലേക്ക് എച്ച്ഡിഎഫ്‌സി ലൈഫ്, ഐസിഐസിഐ പ്രുഡന്‍ഷ്യല്‍, ബജാജ് അലയന്‍സ്, ടാറ്റ എഐഎ, ഭാരതി എഎക്‌സ്എ ലൈഫ്, മാക്‌സ് ലൈഫ് എന്നീ ഇന്‍ഷുറന്‍സ് സ്ഥാപനങ്ങള്‍ വാഗ്ദാനം ചെയ്യുന്ന ഗ്യാരന്റീട് പ്ലാനുകളിലെ ഐആര്‍ആര്‍ 5.4 ശതമാനത്തിനും 6 ശതമാനത്തിനും ഇടയിലാണ്.

എന്നാല്‍ മുന്‍നിര ബാങ്കുകളായ സ്റ്റേറ്റ് ബാങ്ക് ഓഫ് ഇന്ത്യ (എസ്ബിഐ), എച്ച്ഡിഎഫ്‌സി ബാങ്ക്, കൊഡാക് മഹീന്ദ്ര ബാങ്ക്, ഐസിഐസിഐ ബാങ്ക്, ബാങ്ക് ഓഫ് ബറോഡ എന്നിവിടങ്ങളില്‍ 5 വര്‍ഷവും അതിന് മുകളിലേക്കുമുള്ള സ്ഥിര നിക്ഷേപങ്ങള്‍ക്ക് വാഗ്ദാനം ചെയ്യുന്നത് 5 ശതമാനം മുതല്‍ 5.4 ശതമാനം വരെയാണ്.

ലൈഫ് ഇന്‍ഷുറന്‍സ് പോളിസികളില്‍ നിന്നുള്ള മെച്യൂരിറ്റി തുക ആസ്തി ആദായത്തില്‍ നിന്നും നികുതി ഒഴിവാക്കുന്നതിന് അര്‍ഹമാണ്. ഒപ്പം പോളിസിയ്ക്കായി അടയ്ക്കുന്ന പ്രീമിയം തുകയ്ക്ക് ആദായ നികുതി നിയമത്തിലെ വകുപ്പ് 80c പ്രകാരം നികുതി ഇളവും ലഭിക്കും. ബാങ്കുകളിലെ സാധാരണ സ്ഥിര നിക്ഷേപ പദ്ധതികളില്‍ ഇത്തരം ഇളവുകള്‍ നിക്ഷേപകന് ലഭിക്കുകയില്ല.

ഗ്യാരന്റീട് റിട്ടേണ്‍ ഇന്‍ഷുറന്‍സില്‍ പരമാവധി ആദായം ലഭിക്കുന്നതിനായി ലോക്ക് ഇന്‍ പിരീഡിന് മുമ്പ് പോളിസി സറണ്ടര്‍ ചെയ്യാതിരിക്കുക.