റിസ്ക്കെടുക്കാൻ തയ്യാറല്ലേ; എളുപ്പത്തിൽ പണം നേടാനുള്ള വഴികളറിയാം

കയ്യിലുള്ള പണം ഏതെങ്കിലും പദ്ധതികളിൽ നിക്ഷേപിക്കണമെന്നാഗ്രഹിക്കുന്നവരാണ് പലരും. പക്ഷെ എങ്ങനെ, ഏത് പദ്ധതിയിൽ നിക്ഷേപിക്കണമെന്നതിൽ ആർക്കും കൃത്യമായ ധാരണയുണ്ടാകില്ല. അതുകൊണ്ടു തന്നെ നിക്ഷേപം നടത്തുന്നതിന് മുൻപ് അവയുടെ അപകട സാധ്യതകളെക്കുറിച്ചും കൃത്യമായ ധാരണയുണ്ടാക്കണം. നിക്ഷേപ പദ്ധതികളെ, സുരക്ഷിതമായ നിക്ഷേപമെന്നും അപകട സാധ്യതയുള്ള നിക്ഷേപമെന്നും രണ്ടായി തിരിക്കാം.

ഏത് നിക്ഷേപ പദ്ധതി തിരഞ്ഞെടുക്കണമെന്നത് നിക്ഷേപകന്‍റെ തീരുമാനമാണ്. സാമ്പത്തിക ഭദ്രതയേയും പണം കൈകാര്യം ചെയ്യാനുള്ള കഴിവിനേയും സാമ്പത്തിക ലക്ഷ്യത്തേയും അടിസ്ഥാനപ്പെടുത്തിയാണത് തീരുമാനിക്കേണ്ടത്. അത്യാവശ്യത്തിനുള്ള പണം കണ്ടെത്തുക എന്നതാണ് ലക്ഷ്യമെങ്കിൽ സുരക്ഷിതമായ നിക്ഷേപങ്ങൾ തിരഞ്ഞെടുക്കുന്നതാണ് നല്ലത്. ദീർഘകാലത്തിന് ശേഷം വലിയ വരുമാനം കണ്ടെത്തുക എന്നതാണ് ലക്ഷ്യമെങ്കിൽ രണ്ട് മാർഗങ്ങളുപയോഗിച്ചും വരുമാനം കണ്ടെത്താം.

എന്തൊക്കെയാണ് സുരക്ഷിതമായ നിക്ഷേപവും അപകട സാധ്യതയുള്ളതുമായ നിക്ഷേപങ്ങൾ തമ്മിലുള്ള വ്യത്യാസങ്ങൾ എന്ന് നോക്കാം

സുരക്ഷിതമായ നിക്ഷേപങ്ങൾ എന്നുള്ളത് പേര് പോലെ നിക്ഷേപങ്ങൾ കൂടുതൽ സുരക്ഷിതമായിരിക്കും എന്നതാണ്. അതായത് നിക്ഷേപിക്കുന്ന തുക നഷ്ടപ്പെടാനുള്ള സാധ്യത കുറവായിരിക്കും. ഫിക്സഡ് ഡിപ്പോസിറ്റ് അല്ലെങ്കിൽ ഫിക്സഡ് റിട്ടേൺ വാഗ്ദാനം ചെയ്യുന്ന സർക്കാർ സ്കീമുകളാണ് ഈ ഗണത്തിൽ പെടുന്നത്. ബാങ്കിലാണ് തുക നിക്ഷേപിക്കുന്നതെങ്കിൽ, നിക്ഷേപം ഡെപ്പോസിറ്റ് ഇൻഷുറൻസ് ആൻഡ് ക്രെഡിറ്റ് ഗ്യാരന്‍റി കോർപ്പറേഷൻ (ഡിഐസിജിസി) മുഖേന പരിരക്ഷിക്കപ്പെടും.

സുരക്ഷയ്ക്ക് വലിയ പ്രാധാന്യം നൽകുന്നുണ്ടെങ്കിലും, മറ്റ് നിക്ഷേപങ്ങളെ അപേക്ഷിച്ച് കുറഞ്ഞ വരുമാനം മാത്രമേ നേടാൻ സാധിക്കുകയുള്ളു. കാരണം സ്ഥിര നിക്ഷേപങ്ങൾക്ക് ബാങ്കുകൾ നൽകുന്ന പലിശ നിരക്ക് പൊതുവേ കുറവായിരിക്കും. നിങ്ങളുടെ വാങ്ങൽ ശേഷിയും കുറയും. പക്ഷെ അപകട സാധ്യതകൾ ഏറ്റെടുക്കാൻ തയ്യാറാകാത്ത നിക്ഷപകൾക്ക് ഏറ്റവും അനുയോജ്യമാണ് ഈ നിക്ഷേപം.

സുരക്ഷിതമായ നിക്ഷേപങ്ങളുടെ കാലയളവ് പലപ്പോഴും കുറവായിരിക്കും. അതോടൊപ്പം നിയന്ത്രണങ്ങളുടെ മാത്രമേ നിക്ഷേപം പിൻവലിക്കാനും സാധിക്കുകയുള്ളു.ച ചിലപ്പോൾ കാലാവധി പൂർത്തിയാകുന്നതിന് മുൻപ് നിക്ഷേപം പിൻവലിച്ചാൽ പിഴയും ചുമത്തിയേക്കാം.

അപകടകരമായ നിക്ഷേപങ്ങൾ ( Risky Investments )ക്ക് വരുമാന സാധ്യതകൾ ഉയർന്നതായിരിക്കും.

ഓഹരികൾ, മ്യൂച്വൽ ഫണ്ടുകൾ, റിയൽ എസ്റ്റേറ്റ് തുടങ്ങിയവയാണ് അപകട നിരക്ക് ഉയർന്ന നിക്ഷേപങ്ങൾ. അപകട സാധ്യത ഉയർന്നതാണെങ്കിലും കുറഞ്ഞ കാലത്തിനുള്ളിൽ കൂടുതൽ വരുമാനം നേടാം എന്നത് നിക്ഷേപകരെ ആകർഷിക്കുന്ന ഘടകമാണ്.

വിപണിയിലെ അസ്ഥിരത ഒരേ സമയം നേട്ടമായും കോട്ടമായും മാറും. ഉദാഹരണത്തിന് സ്റ്റോക്കുകൾക്ക് കുറഞ്ഞ കാലയളവിൽ ഗണ്യമായ വില വർദ്ധനവുണ്ടായാൽ അത് നിക്ഷേപകന് നേട്ടമാണ്. എന്നാൽ വില കുറഞ്ഞാൽ നഷ്ടം സംഭവിക്കും. അതുകൊണ്ടു തന്നെ വിപണിയിലെ ചാഞ്ചാട്ടം കൃത്യമായി മനസിലാക്കണം.

മ്യൂച്വൽ ഫണ്ടുകൾ പോലുള്ള അപകടസാധ്യതയുള്ള നിക്ഷേപങ്ങളുമായി സ്ഥിരനിക്ഷേപം പോലുള്ള അപകടരഹിത നിക്ഷേപങ്ങൾ സംയോജിപ്പിക്കുന്നത് സുരക്ഷിതത്വവും അതോടൊപ്പം വരുമാനവും നൽകും.