ക്രെഡിറ്റ് കാർഡ് വഴി ഓൺലൈൻ പർച്ചേസ് ചെയ്യുമ്പോൾ ഇനി മുതൽ ഒടിപി ആവശ്യമില്ല: പുതിയ മാറ്റവുമായി ഫെഡറൽ ബാങ്ക്

ഓൺലൈൻ പർച്ചേസ് നടത്തുമ്പോൾ ബയോമെട്രിക് സ്ഥിരീകരണത്തിലൂടെ സുരക്ഷ ഉറപ്പാക്കാൻ ഒരുങ്ങി ഫെഡറൽ ബാങ്ക്. ഫിൻടെക് കമ്പനികളായ M2P, MinkasuPay എന്നിവയുമായി സഹകരിച്ചാണ് ഫെഡറൽ ബാങ്ക് ഈ പുതിയ സൊല്യൂഷൻ അവതരിപ്പിക്കുന്നത്. വർദ്ധിച്ചു വരുന്ന തട്ടിപ്പുകളും വഞ്ചനകളും തടയുന്നതിനാണ് ഫെഡറൽ ബാങ്കിൻ്റെ ഈ പുതിയ നീക്കം.

ഫെഡറൽ ബാങ്കിൻ്റെ പുതിയ നീക്കം

സാധാരണയായി ക്രെഡിറ്റ് കാർഡ് അല്ലെങ്കിൽ ഡെബിറ്റ് കാർഡ് ഉപയോ​ഗിച്ച് ഓൺലൈൻ പർച്ചേസ് ചെയ്യുമ്പോൾ ഒടിപി വഴിയാണ് സ്ഥിരീകരണം നടത്തുന്നത്. പക്ഷേ ഇവിടെ ഫെഡറൽ ബാങ്കിൻ്റെ പുതിയ നീക്കം അനുസരിച്ച് ബയോമെട്രിക് പരിശോധന നടത്തും. അതായത് ഫിംഗർപ്രിന്റ് അല്ലെങ്കിൽ ഫേസ് ഐഡി ഉപയോഗിച്ച് ഓൺലൈൻ പർച്ചേസുകൾ ഉറപ്പാക്കാൻ സാധിക്കും. മാത്രമല്ല ഇതിലൂടെ ഇടപാട് സമയം വെറും 3-4 സെക്കൻഡായി കുറയ്ക്കുകയും ചെയ്യുന്നു.

ഒടിപി വഴി നടത്തുന്ന ഇത്തരം ഇടപാടുകൾ പലപ്പോഴും വഞ്ചനയിലേക്ക് നയിക്കാൻ കാരണമാവാറുണ്ട്. തട്ടിപ്പു നടത്തുന്നവർക്ക് ഒടിപി ലഭിക്കാൻ വലിയ പ്രയാസമില്ല എന്നതാണ് സത്യം. എന്നാൽ നിങ്ങളുടെ ബയോമെട്രിക് രേഖകൾ ഒരിക്കലും മറ്റൊരാൾക്ക് ഉപയോ​ഗിക്കാൻ സാധിക്കില്ല എന്നതാണ് കൂടുതൽ സുരക്ഷ ഉറപ്പാക്കുന്നതിൻ്റെ കാര്യം.

"ബയോമെട്രിക് സ്ഥിരീകരണം പേയ്‌മെന്റുകൾ സുരക്ഷിതമാക്കാനും, തടസ്സമില്ലാത്ത രീതിയിൽ ഇടപാട് നടത്താനും സഹായിക്കുന്നു. ഫെഡറൽ ബാങ്ക് നടത്തുന്ന ഓരോ മാറ്റങ്ങൾക്കും ഒരു ലക്ഷ്യമുണ്ട്. അതായത്, ഉപഭോക്താക്കൾക്ക് സുരക്ഷയും ഉറപ്പാക്കുക എന്നതാണ് പ്രധാന ലക്ഷ്യം" ഫെഡറൽ ബാങ്കിന്റെ കൺസ്യൂമർ ബാങ്കിംഗ് ദേശീയ തലവൻ വിരാട് സുനിൽ ദിവാൻജി പറയുന്നു.

ആർ‌ബി‌ഐയുടെ മാർഗ്ഗനിർദ്ദേശങ്ങൾ പാലിച്ചുകൊണ്ടാണ് ബയോമെട്രിക് സ്ഥിരീകരണം നടത്തുന്നത്. ഇനി ഏതെങ്കിലും ഘട്ടത്തിൽ ബയോമെട്രിക്സ് പരിശോധന ഫലപ്രദമായി നടക്കുന്നില്ലെങ്കിൽ ഒടിപി സേവനം ഉപയോ​ഗിക്കാവും സാധിക്കും. ബയോമെട്രിക്സ് സ്ഥിരീകരണത്തിലൂടെ ഉപഭോക്താക്കൾക്ക് മർച്ചന്റ് ആപ്പുകളിൽ തടസ്സമില്ലാതെ പർച്ചേസ് നടത്താനും സാധിക്കും. ഫെഡറൽ ബാങ്ക് നൽകുന്ന ഈ സേവനം എല്ലാ ആൻഡ്രോയിഡ്, ഐഒഎസ് സ്മാർട്ട്‌ഫോണുകളിലും ഉറപ്പാക്കാം.

ബയോമെട്രിക് സ്ഥിരീകരണം ഉപഭോക്താക്കൾക്ക് നേട്ടമാണോ?

സത്യത്തിൽ ഈ ബയോമെട്രിക് പരിശോധന നടത്തുന്നത് എങ്ങനെയാണ് ഉപഭോക്താക്കൾക്ക് നേട്ടം നൽകുന്നത്? വിശദമായി അറിയാം.

1. നിങ്ങളുടെ ക്രെഡിറ്റ് കാർഡ് ഉപയോഗിക്കുമ്പോൾ ഇനി ഒടിപികൾ ഉണ്ടാകില്ല. വിരലടയാളം അല്ലെങ്കിൽ ഫേസ് ഐഡി മാത്രം ഉപയോഗിച്ചാൽ മതിയാകും.

2. പരമാവധി മൂന്ന് സെക്കൻഡിനുള്ളിൽ തന്നെ നിങ്ങൾക്ക് ചെക്ക് ഔട്ട് ചെയ്യാൻ സാധിക്കും.

3. ഓരോ ഇടപാടും പൂർണ സുരക്ഷയോടെയാണ് നടക്കുന്നത്.

4. ബയോമെട്രിക്സ് സ്ഥിരീകരണം നിർബന്ധമല്ല, നിങ്ങൾക്ക് ആവശ്യമെങ്കിൽ ഒടിപി മാർ​ഗത്തിലൂടെ പരിശോധന പൂർത്തിയാക്കാം.

ഫെഡറൽ ബാങ്കിന്റെ ഡെബിറ്റ്, ക്രെഡിറ്റ് കാർഡ് ഉടമകൾക്കും തിരഞ്ഞെടുത്ത പങ്കാളി വ്യാപാരികൾക്കും പുതിയ മാറ്റം ഉറപ്പാക്കാം. ഇത് ഘട്ടം ഘട്ടമായിട്ടാവും പ്രാബല്യത്തിൽ വരുന്നത്. എങ്കിലും വലിയൊരു മാറ്റത്തിനുള്ള തുടക്കമാണ് ഫെഡറൽ ബാങ്ക് മുന്നോട്ട് വെക്കുന്നത്.

അറിയിപ്പ്:
മുകളില്‍ കൊടുത്തിരിക്കുന്ന ലേഖനം പഠനാവശ്യത്തിന് നൽകുന്നതാണ്. ഇതുമായി ബന്ധപ്പെട്ട് നിക്ഷേപ തീരുമാനങ്ങള്‍ എടുക്കും മുന്‍പ് സാമ്പത്തിക വിദഗ്ധന്റെ നിര്‍ദേശം തേടാം. ഓഹരി വിപണിയിലെ നിക്ഷേപം നഷ്ട സാധ്യതകള്‍ക്ക് വിധേയമാണ്. സ്വന്തം റിസ്‌കില്‍ മാത്രം നിക്ഷേപ തീരുമാനം കൈക്കൊള്ളുക. ലേഖനം വായിച്ചിട്ട് എടുക്കുന്ന തീരുമാനത്തിന്റെ അടിസ്ഥാനത്തില്‍ സംഭവിക്കുന്ന ലാഭനഷ്ടങ്ങള്‍ക്ക് ഗുഡ്റിട്ടേൺസ് മലയാളവും ലേഖകനും ഉത്തരവാദികളല്ല.