സ്ഥിര നിക്ഷേപത്തിലൂടെ സ്ഥിര വരുമാനം, മികച്ച പലിശ നൽകുന്ന ബാങ്കുകൾ ഇവയാണ്, നോക്കുന്നോ

ഏറ്റവും സുരക്ഷിതമായ നിക്ഷേപ മാർഗമാണ് സ്ഥിര നിക്ഷേപം. ഒരു നിശ്ചിത കാലയളവിൽ നിശ്ചിത പലിശയോടെ നിശ്ചിത തുക നിക്ഷേപിക്കുക എന്നതാണ് സ്ഥിര നിക്ഷേപം കൊണ്ട് ഉദ്ദേശിക്കുന്നത്. സ്ഥിര നിക്ഷേപത്തിന് ലഭിക്കുന്ന പലിശ ധനകാര്യ സ്ഥാപനങ്ങൾ അനുസരിച്ച് വ്യത്യാസപ്പെടും. മുതിർന്ന പൗരന്മാർക്ക് സാധാരണയായി ഉയർന്ന പലിശനിരക്കും സ്ഥിര നിക്ഷേപത്തിന് ധനകാര്യ സ്ഥാപനങ്ങൾ വാഗ്ദാനം ചെയ്യുന്നു.

7 ദിവസം മുതൽ 10 വർഷം വരെയാണ് സാധാരണ സ്ഥിര നിക്ഷേപത്തിന്‍റെ കാലയളവ്. നിക്ഷേപകർക്ക് അവരുടെ സൗകര്യത്തിനനുസരിച്ച് കാലാവധി തിരഞ്ഞെടുക്കാം. ഒരു നിശ്ചിത പലിശ നിരക്കിൽ തുക നിക്ഷേപിച്ചുകഴിഞ്ഞാൽ, പലിശ നിരക്കുകളിലോ വിപണിയിലെ ഏറ്റക്കുറച്ചിലുകളിലോ തുടർന്നുള്ള മാറ്റങ്ങളാൽ അത് ബാധിക്കപ്പെടാതെ തുടരും. അതിനാൽ, നിങ്ങളുടെ നിക്ഷേപത്തിൻ്റെ വരുമാനം ഉറപ്പാണ്.

ആനുകൂല്യങ്ങളും നിരവധി

സ്ഥിര നിക്ഷേപത്തിൽ നിരവധി ആനുകൂല്യങ്ങളുമുണ്ട്. ഒരാൾക്ക് നിക്ഷേപ തുകയുടെ 90 ശതമാനം വരെ വളരെ കുറഞ്ഞ പലിശ നിരക്കിൽ വായ്പ ലഭിക്കും. അതോടൊപ്പം നികുതി ലാഭിക്കുന്ന സ്ഥിരനിക്ഷേപങ്ങളിൽ നിക്ഷേപിക്കുന്നതിലൂടെ നികുതിയിളവുകൾ ലഭിക്കും. അതോടൊപ്പം സ്ഥിര വരുമാനത്തിനുളള അവസരം കൂടി സ്ഥിര നിക്ഷേപം നൽകുന്നുണ്ട്. അതായത് നിക്ഷേപകന് പ്രതിമാസ, ത്രൈമാസ, അല്ലെങ്കിൽ വാർഷിക അടിസ്ഥാനത്തിൽ ആവശ്യകതകൾക്കനുസരിച്ച് പലിശ തുക ക്രെഡിറ്റ് ചെയ്യാവുന്നതാണ്.

സ്ഥിര നിക്ഷേപം നടത്തുന്നതിന് മുൻപ് പരിഗണിക്കേണ്ട ചില കാര്യങ്ങളുണ്ട്.

1. വിവിധ ബാങ്കുകളുടെ സ്ഥിര നിക്ഷേപത്തിന്‍റെ പലിശ നിരക്കുകൾ താരതമ്യം ചെയ്യുക.
2. സ്ഥിര നിക്ഷേപത്തിൻ്റെ സുരക്ഷിതത്വം പരിശോധിച്ച് വായ്പ നൽകുന്നയാളുടെ വിശ്വാസ്യത അവലോകനം ചെയ്യുക.
3. സ്ഥിര നിക്ഷേപം നടത്തുമ്പോൾ നല്ല ഉപഭോക്തൃ സേവനവും തടസ്സരഹിതമായ പ്രക്രിയയും നൽകുന്ന ഒരു ബാങ്ക് തിരഞ്ഞെടുക്കുക.

എന്തായാലും സ്ഥിര നിക്ഷേപത്തിന് പ്രമുഖ ബാങ്കുകൾ നൽകുന്ന പലിശ നിരക്കുകൾ പരിശോധിക്കാം.

1. എച്ച്‌ഡിഎഫ്‌സി ബാങ്ക്

3 ശതമാനം മുതൽ 7.25 ശതമാനം വരെ പലിശ നിരക്കാണ് എച്ച്‌ഡിഎഫ്‌സി ബാങ്ക് സ്ഥിര നിക്ഷേപങ്ങൾക്ക് നൽകുന്നത്. 18 മാസം മുതൽ 21 മാസം വരെയുള്ള ടേം ഡെപ്പോസിറ്റുകളിൽ ഏറ്റവും ഉയർന്ന നിരക്ക് 7.25 ശതമാനം ലഭിക്കും.

4 വർഷം 7 മാസം മുതൽ 55 മാസം വരെയുള്ള കാലാവധിയിൽ ബാങ്ക് 7.20 ശതമാനം പലിശ വാഗ്‌ദാനം ചെയ്യുന്നു. 2 വർഷം 11 മാസം മുതൽ 35 മാസം വരെയുള്ള കാലയളവിൽ 7.15 ശതമാനം പലിശയാണ് ബാങ്ക് നൽകുന്നത്.

2. ഐസിഐസിഐ ബാങ്ക്

ഐസിഐസിഐ ബാങ്ക് 3 ശതമാനം മുതൽ 7.20 ശതമാനം വരെ പലിശ നിരക്ക് വാഗ്ദാനം ചെയ്യുന്നു. 15 മാസം മുതൽ 2 വർഷം വരെയുള്ള കാലയളവിലാണ് ഏറ്റവും ഉയർന്ന പലിശ നിരക്ക് 7.20 ശതമാനം. 2 വർഷം മുതൽ 5 വർഷം വരെയുള്ള കാലയളവിൽ, ബാങ്ക് 7 ശതമാനം പലിശ നിരക്ക് വാഗ്ദാനം ചെയ്യുന്നു.

3. സ്റ്റേറ്റ് ബാങ്ക് ഓഫ് ഇന്ത്യ

3.50 ശതമാനം മുതൽ 7 ശതമാനം വരെ പലിശയാണ് എസ്ബിഐ സ്ഥിര നിക്ഷേപങ്ങൾക്ക് നൽകുന്നത്. 2 വർഷം മുതൽ 3 വർഷം വരെ കാലാവധിയുള്ള നിക്ഷേപത്തിന് 7 ശതമാനം പലിശ ലഭിക്കും. 1 മുതൽ 2 വർഷത്തെ കാലാവധിക്ക്, പലിശ നിരക്ക് 6.80 ശതമാനമാണ്.

4. കൊട്ടക് മഹീന്ദ്ര ബാങ്ക്

കൊട്ടക് മഹീന്ദ്ര ബാങ്ക് 2.75 ശതമാനം മുതൽ 7.40 ശതമാനം വരെയാണ് സ്ഥിര നിക്ഷേപങ്ങൾക്ക് നൽകുന്ന പലിശ നിരക്ക്. കാലാവധി 390 ദിവസത്തിനും 23 മാസത്തിനും ഇടയിൽ ആയിരിക്കുമ്പോൾ ഏറ്റവും ഉയർന്ന നിരക്കായ 7.40 ശതമാനം ലഭിക്കും.

കാലാവധി 23 മാസം മുതൽ 2 വർഷത്തിൽ താഴെയാണെങ്കിൽ, പലിശ നിരക്ക് 7.30 ശതമാനമാണ്.

5. ബാങ്ക് ഓഫ് ബറോഡ

4.25 ശതമാനം മുതൽ 7.25 ശതമാനം വരെ പലിശ നിരക്കാണ് ബാങ്ക് ഓഫ് ബറോഡ സ്ഥിര നിക്ഷേപങ്ങൾക്ക് നൽകുന്നത്. ഡെപ്പോസിറ്റ് കാലാവധി 2 വർഷത്തിനും 3 വർഷത്തിനിടയിലായിരിക്കുമ്പോൾ ഏറ്റവും ഉയർന്ന നിരക്ക് 7.25 ശതമാനം ലഭിക്കും.

അതേ സമയം 399 ദിവസത്തെ കാലാവധിയുള്ള ബറോഡ തിരംഗ പ്ലസ് ഡെപ്പോസിറ്റ് സ്കീം പ്രതിവർഷം 7.15 ശതമാനം പലിശ വാഗ്ദാനം ചെയ്യുന്നുണ്ട്. ഏറ്റവും പുതിയ നിരക്കുകൾ 2024 ജനുവരി 15 മുതൽ പ്രാബല്യത്തിലാണ്.