റിട്ടയർമെന്‍റ് ജീവിതം അടിപൊളിയാക്കാം, അഞ്ച് നിക്ഷേപ പദ്ധതികൾ ഇതാണ്,നേടാം പ്രതിമാസ വരുമാനം

'സമ്പത്ത് കാലത്ത് തൈ പത്ത് വെച്ചാൽ ആപത്ത് കാലത്ത് കാ പത്ത് തിന്നാം' എന്ന ചൊല്ല് നിങ്ങൾ കേട്ടിട്ടുണ്ടാകും അല്ലേ. കയ്യിൽ പണമുള്ളപ്പോൾ നിക്ഷേപം തുടങ്ങിയാൽ വാർദ്ധക്യ കാലത്ത് സാമ്പത്തിക സുരക്ഷയോടെ ജീവിക്കാം എന്നാണ് ചൊല്ല് അർത്ഥമാക്കുന്നത്. കാരണം റിട്ടയർമെന്‍റ് ജീവിതത്തിൽ ഏക ആശ്രയം നമ്മൾ പണം സമ്പാദിക്കുന്ന കാലഘട്ടത്തിൽ സ്വരു കൂട്ടി വെയ്ക്കുന്ന തുകകൾ തന്നെ ആകും. നിങ്ങളുടെ റിട്ടയർമെൻ്റ് ജീവിതം നന്നായി ആസ്വദിക്കാൻ സഹായിക്കുന്ന അഞ്ച് നിക്ഷേപ പദ്ധതിളെക്കുറിച്ച് വിശദമായി നമുക്ക് പരിശോധിക്കാം.

1. അടൽ പെൻഷൻ യോജന

വാർദ്ധക്യത്തിൽ വരുമാന സുരക്ഷ ഉറപ്പാക്കുന്നതിനുള്ള കേന്ദ്ര സർക്കാരിന്‍റെ പദ്ധതിയാണിത്. 2015-16 ബജറ്റിലാണ് അടൽ പെൻഷൻ യോജന നടപ്പാക്കുന്നത്. റിട്ടയർമെന്റിനായി പണം സമ്പാദിക്കാൻ ആളുകളെ പ്രോത്സാഹിപ്പിക്കുക എന്നതാണ് പദ്ധതിയുടെ ലക്ഷ്യം.

18 മുതൽ 40 വയസ്സുവരെ നിക്ഷേപം ആരംഭിക്കാം. ഒരു വ്യക്തിക്ക് 60 വയസ്സ് പൂർത്തിയാകുന്നതുവരെ എല്ലാ മാസവും ഒരു ചെറിയ വിഹിതം പദ്ധതിയിൽ അടക്കണം. 60 വയസ്സിന് ശേഷം ആളുകൾക്ക് 1000 രൂപ മുതൽ 5000 രൂപ വരെ പ്രതിമാസ പെൻഷൻ്റെ ആനുകൂല്യം നൽകുന്നു.

2. നാഷണൽ പെൻഷൻ സിസ്റ്റം

പ്രതിമാസ പെൻഷൻ ലഭിക്കാനുള്ള മറ്റൊരു മാർഗമാണിത് . ഈ സ്കീമിൽ, നിക്ഷേപിച്ച തുകയുടെ ഭൂരിഭാഗവും വിപണിയിൽ നിക്ഷേപിക്കപ്പെടുന്നു, അത്തരമൊരു സാഹചര്യത്തിൽ നിങ്ങൾക്ക് ശരാശരി 10 ശതമാനം വരുമാനം ലഭിക്കും. 18 നും 70 നും ഇടയിൽ പ്രായമുള്ള ഏതൊരു ഇന്ത്യൻ പൗരനും ഈ പദ്ധതി പ്രയോജനപ്പെടുത്താം. പെൻഷൻ ലഭിക്കാൻ 60 വയസ്സ് വരെ നിക്ഷേപിക്കണം. എന്നിരുന്നാലും, റിട്ടയർമെൻ്റിന് മുമ്പ് അക്കൗണ്ട് ഉടമയ്ക്ക് എമർജൻസി ഫണ്ട് ആവശ്യമുണ്ടെങ്കിൽ, നിക്ഷേപത്തിൽ നിന്ന് നിങ്ങൾക്ക് തുകയുടെ 60% പിൻവലിക്കാം. ഇതിൽ 40 ശതമാനം ആന്വിറ്റിയായി ഉപയോഗിക്കുന്നു.

3. പോസ്റ്റ് ഓഫീസ് പ്രതിമാസ വരുമാന പദ്ധതി

പോസ്റ്റ് ഓഫീസിൻ്റെ ഈ സ്കീം വഴി, ഏതൊരു വ്യക്തിക്കും എല്ലാ മാസവും സ്ഥിരവരുമാനം ക്രമീകരിക്കാൻ കഴിയും. ഈ പദ്ധതിയിൽ ജോയിൻ്റ് അക്കൗണ്ട് തുറക്കാം. വ്യക്തിഗത അക്കൗണ്ടിൽ നിങ്ങൾക്ക് പ്രതിവർഷം പരമാവധി 9 ലക്ഷം രൂപ വരെ നിക്ഷേപിക്കാം. ജോയിൻ്റ് അക്കൗണ്ടിൽ 15 ലക്ഷം രൂപ വരെ നിക്ഷേപിക്കാം. നിലവിൽ 7.4 ശതമാനം പലിശയാണ് നൽകുന്നത്. അത്തരമൊരു സാഹചര്യത്തിൽ, ജോയിൻ്റ് അക്കൗണ്ട് വഴി എല്ലാ മാസവും 9,250 രൂപ വരെ പെൻഷൻ ലഭിക്കും.

4. മ്യൂച്വൽ ഫണ്ട്

എസ്ഐപി വഴി മ്യൂച്വൽ ഫണ്ടുകളിൽ നിക്ഷേപിക്കുന്നതിലൂടെ മികച്ച ഒരു റിട്ടയർമെൻ്റ് പ്ലാൻ തയ്യാറാക്കാൻ കഴിയും . ദീർഘകാലാടിസ്ഥാനത്തിൽ മ്യൂച്വൽ ഫണ്ടുകളുടെ ശരാശരി വരുമാനം 12 ശതമാനമായി കണക്കാക്കപ്പെടുന്നു, ഇത് മറ്റേതൊരു പദ്ധതിയേക്കാളും മികച്ചതാണ്. അത്തരമൊരു സാഹചര്യത്തിൽ, 20 മുതൽ 25 വർഷം വരെ നിക്ഷേപിക്കുന്നതിലൂടെ, നിങ്ങൾക്ക് വലിയ ഫണ്ട് കണ്ടെത്താൻ കഴിയുകയും മികച്ച തുക ലഭിക്കുകയും ചെയ്യും.

5. ഇ.പി.എഫ്.ഒ

നിങ്ങൾ ജോലിക്കാരനാണെങ്കിൽ എല്ലാ മാസവും ഇപിഎഫ്ഒയിലേക്ക് ശമ്പളത്തിൻ്റെ ഒരു ഭാഗം നൽകണം .വേതനത്തിന്‍റെ 12% ആണ് പി എഫിലേക്കുള്ള കുറഞ്ഞ സംഭാവന. അടിസ്ഥാനവേതനം, ക്ഷാമബത്ത, മറ്റു അലവൻസുകൾ എന്നിവ ചേർത്താണ് ഇവിടെ വേതനം കണക്കാക്കുക. തൊഴിലാളികളുടെ താൽപ്പര്യപ്രകാരം, 15,000 രൂപയുടെ 12% ആയ 1,800 രൂപയായി പി എഫിലേക്കുള്ള സംഭാവന നിജപ്പെടുത്താം. അതുപോലെ തന്നെ, ആഗ്രഹമുണ്ടെങ്കിൽ അടിസ്ഥാന വേതനത്തിന്‍റെ 100%-വും പി എഫിലേക്ക് സംഭാവന നൽകാൻ തൊഴിലാളികൾക്ക് കഴിയും.