ഫ്രീലാൻസ് ജോലി ചെയ്യുന്നവർക്ക് ലോൺ കിട്ടുമോ? ഉറപ്പായും കിട്ടും: പക്ഷെ ഈ വഴികൾ സ്വീകരിക്കണം: എടുത്ത് ചാടരുത്

ഫ്രീലാൻസ് ജോലി ചെയ്യുന്നവർ ദിനം പ്രതി അധികരിച്ചുകൊണ്ടിരിക്കുകയാണ് ഇന്ന് ഇന്ത്യയിൽ. സമൂഹത്തിന്റെ പകുതി ഭാഗം വരുന്ന മനുഷ്യരും പാർട്ട്‌ ടൈം ജോലികളെയാണ് ജീവിതം മുന്നോട്ട് കൊണ്ടുപോകാൻ വേണ്ടി തിരഞ്ഞെടുക്കുന്നത്. അതുകൊണ്ട് തന്നെ അവർക്കും ധനസഹായം നൽകാൻ കഴിയുന്ന സ്ഥാപനങ്ങളും സ്കീമുകളും ഉണ്ടാകേണ്ടത് അനിവാര്യമാണ്.

ഫ്രീലാൻസ് ജോലികൾ ചെയ്യുന്നവർക്ക് വേഗത്തിൽ വായ്പ ലഭിക്കാനുള്ള എളുപ്പ വഴികൾ നോക്കാം

ഇന്ത്യയിൽ ഫ്രീലാൻസിങും പാർട്ട് ടൈം ജോലികളും ജനപ്രിയമാകുന്നതോടെ, പല പ്രൊഫഷണലുകളും പരമ്പരാഗത ശമ്പള ജോലികളിൽ നിന്ന് മാറി സ്വതന്ത്രമായ ജോലി രീതികളിലേക്ക് തിരിയുകയാണ്. പാർട്ട് ടൈം ജോലി എന്നത് ഹ്രസ്വകാല, വഴക്കമുള്ള ജോലികളെയാണ് സൂചിപ്പിക്കുന്നത്. ഇതിൽ ഒരു പ്രോജക്ടിനോ ടാസ്കിനോ വേണ്ടി വ്യക്തികളെ നിയമിക്കുന്നു, അതായത് ഫുൾ ടൈം ജോലിക്ക് പകരമായി.

ഫ്രീലാൻസ് റൈറ്റിങ്, റൈഡ്-ഷെയറിങ്, ഫുഡ് ഡെലിവറി, ഗ്രാഫിക് ഡിസൈൻ, ഓൺലൈൻ ട്യൂഷൻ തുടങ്ങിയവയെല്ലാം ഇതിൽ ഉൾപ്പെടുന്നവയാണ്. ഈ മാറ്റം കൂടുതൽ ജോലി സാധ്യതയും സ്വാതന്ത്ര്യവും നൽകുമ്പോൾ, ചില വെല്ലുവിളികളും കൂടെ കൊണ്ടുവരുന്നു. അതിൽ ഏറ്റവും വലുതാണ് വ്യക്തിഗത വായ്പകൾ ലഭിക്കുന്നതിനുള്ള ബുദ്ധിമുട്ട്.

ബാങ്കുകൾ എല്ലായ്പ്പോഴും സ്ഥിരമായ വരുമാനമുള്ള വ്യക്തികൾക്കാണ് വായ്പ നൽകാൻ മുൻഗണന നൽകുന്നത്. ഇത് തിരിച്ചടവ് കൃത്യമായി നടക്കുമെന്ന് ഉറപ്പാക്കാൻ വേണ്ടിയാണ്. ഫ്രീലാൻസർമാർക്കും പാർട്ട്‌ ടൈം വർക്കർമാർക്കും സ്ഥിരമായ വരുമാനം ഇല്ലാത്തതിനാൽ, അവർക്ക് വായ്പ ലഭിക്കുന്നത് ബുദ്ധിമുട്ടാണ്. എന്നാൽ, പ്രക്രിയ ബുദ്ധിമുട്ടാണെങ്കിലും അസാധ്യമല്ല എന്ന് വേണം പറയാൻ.

പാർട്ട് ടൈം വർക്കർമാർക്കും ഫ്രീലാൻസർമാർക്കും ഇന്ത്യയിൽ വ്യക്തിഗത വായ്പ ലഭിക്കുമോ? യോഗ്യത എന്ത്?

പാർട്ട് ടൈം വർക്കർമാർക്കും ഫ്രീലാൻസർമാർക്കും ഇന്ത്യയിൽ വ്യക്തിഗത വായ്പ ലഭിക്കുമോ എന്ന് ചോദിച്ചാൽ അതെ, എന്ന് തന്നെയാണ് ഉത്തരം. എന്നാൽ, ശമ്പളം വാങ്ങുന്ന പ്രൊഫഷണലുകളിൽ നിന്ന് വ്യത്യസ്തമായി ഈ പ്രക്രിയ കുറച്ച് വ്യത്യാസപ്പെട്ടിരിക്കുന്നു. വീടിനോ കാറിനോ വേണ്ടിയുള്ള വായ്പകളിൽ നിന്ന് വ്യത്യസ്തമായി, വ്യക്തിഗത വായ്പകൾ അംഗീകരിക്കപ്പെടുന്നത് വായ്പ എടുക്കുന്നയാളുടെ വരുമാന സ്ഥിരതയും ക്രെഡിറ്റ് യോഗ്യതയും അടിസ്ഥാനമാക്കിയാണ്.

ശമ്പളം വാങ്ങുന്നവർക്ക് സ്ഥിരമായ വരുമാനവും അത് തെളിയിക്കാൻ ബാങ്ക് സ്റ്റേറ്റ്മെന്റുകളും ഉള്ളതിനാൽ അവർക്ക് വായ്പ ലഭിക്കാൻ എളുപ്പമാണ്. എന്നാൽ, ഫ്രീലാൻസർമാർക്കും പാർട്ട് ടൈം വർക്കർമാർക്കും വരുമാനം ഏറ്റക്കുറച്ചിലുകൾ ഉള്ളതിനാൽ ബാങ്കുകൾക്ക് അവരുടെ ക്രെഡിറ്റ് യോഗ്യത വിലയിരുത്താൻ ബുദ്ധിമുട്ടാണ്. വായ്പ നൽകുന്നവർക്ക് ഈ വ്യക്തികളുടെ സാമ്പത്തിക ശേഷി മനസ്സിലാക്കാൻ ഇൻകം ടാക്സ് റിട്ടേണുകൾ, ബാങ്ക് സ്റ്റേറ്റ്മെന്റുകൾ, ക്രെഡിറ്റ് സ്കോർ എന്നിവ പോലുള്ള മറ്റ് മാർഗങ്ങൾ ഉപയോഗിക്കേണ്ടി വരും.

ക്രെഡിറ്റ് സ്കോർ ഉയർന്നതാണെങ്കിൽ വായ്പ ലഭിക്കാനുള്ള സാധ്യതയും കൂടുതലാണ്. നിരവധി ബാങ്കുകളും നോൺ-ബാങ്കിങ് ഫിനാൻഷ്യൽ കമ്പനികളും സ്വയം തൊഴിൽ ചെയ്യുന്നവർക്കും ഫ്രീലാൻസർമാർക്കും വ്യക്തിഗത വായ്പകൾ നൽകുന്നുണ്ട്. ചില ഫിൻടെക് കമ്പനികൾ ഫ്രീലാൻസ് വർക്കർമാർക്ക് അവരുടെ ഡിജിറ്റൽ സാമ്പത്തിക ഡാറ്റയെ അടിസ്ഥാനമാക്കി ഇഷ്ടാനുസൃത വായ്പകളും വാഗ്ദാനം ചെയ്യുന്നുണ്ട്.

വായ്പ ലഭിക്കാൻ എന്ത് ചെയ്യണം

മൂന്ന് ഘട്ടങ്ങളിലൂടെയാണ് ഫ്രീലാൻസ് ജോലി ചെയ്യുന്നവർക്ക് വായ്പ ലഭിക്കുക.

*വിവരങ്ങൾ നൽകുക,
*കെ വൈ സി പ്രക്രിയ പൂർത്തിയാക്കുക
* ഇ എം ഐ കാലാവധി തിരഞ്ഞെടുക്കുക.

നിങ്ങളുടെ ജോലി സ്ഥിതി അനുസരിച്ച്, പലിശ നിരക്ക് വർഷത്തിൽ 10.5% മുതൽ ആരംഭിക്കാം. ഫ്രീലാൻസർമാർക്കും പാർട്ട് ടൈം വർക്കർമാർക്കും വ്യക്തിഗത വായ്പയ്ക്കുള്ള യോഗ്യതയ്ക്ക് ഓരോ ബാങ്കിനും ഫിൻടെക് കമ്പനിക്കും അവരുടേതായ മാനദണ്ഡങ്ങൾ ഉണ്ട്.

ഫ്രീലാൻസർമാർക്കും പാർട്ട് ടൈം ജോലി ചെയ്യുന്നവർക്കും വായ്പ നൽകുന്നതിന് ചില പൊതുവായ മാനദണ്ഡങ്ങൾ ബാങ്കുകളും മറ്റും മുന്നോട്ട് വെക്കാറുണ്ട്

*പ്രായപരിധി: അപേക്ഷകന്റെ പ്രായം 21 മുതൽ 60 വയസ്സ് വരെ ആയിരിക്കണം.

*മിനിമം വരുമാനം: മിക്ക ബാങ്കുകളും ഫ്രീലാൻസർമാർക്ക് മാസം 25,000 മുതൽ 30,000 രൂപ വരെ മിനിമം വരുമാനം ആവശ്യപ്പെടുന്നു.

*വരുമാന തെളിവ്: ഫ്രീലാൻസർമാർക്ക് ശമ്പള സ്ലിപ്പുകൾ ഇല്ലാത്തതിനാൽ, കഴിഞ്ഞ രണ്ടോ മൂന്നോ വർഷത്തെ ഇൻകം ടാക്സ് റിട്ടേണുകൾ വഴി ബാങ്കുകൾ അവരുടെ വരുമാന സ്ഥിരത പരിശോധിക്കുന്നു. കഴിഞ്ഞ 6 മുതൽ 12 മാസത്തെ ഡിജിറ്റൽ ഇൻവോയ്സുകളും ബാങ്ക് സ്റ്റേറ്റ്മെന്റുകളും ചില വായ്പദാതാക്കൾ വരുമാന തെളിവായി സ്വീകരിക്കുന്നു.

*ക്രെഡിറ്റ് സ്കോർ: 700-ന് മുകളിലുള്ള സിബിൽ സ്കോർ വായ്പ അംഗീകരിക്കപ്പെടാനുള്ള സാധ്യത വർദ്ധിപ്പിക്കുന്നു. ക്രെഡിറ്റ് സ്കോർ കുറവാണെങ്കിൽ, ഒരു ഗ്യാരന്ററോ അധിക വരുമാന തെളിവോ ആവശ്യമായി വന്നേക്കാം.

*പരിചയം: ചില വായ്പകൾക്ക് ഫ്രീലാൻസർക്ക് അവരുടെ മേഖലയിൽ കുറഞ്ഞത് രണ്ട് വർഷത്തെ പരിചയം ആവശ്യമാണ്.

*മുൻകാല കടങ്ങളും മറ്റും: അപേക്ഷകന്റെ മുൻകാല കടങ്ങളും വായ്പകളും വായ്പദാതാക്കൾ പരിശോധിക്കുന്നു. കട-വരുമാന അനുപാതം കുറവാണെങ്കിൽ വായ്പ ലഭിക്കാനുള്ള സാധ്യത കൂടുതലാണ്.

ഫ്രീലാൻസർമാർക്കും പാർട്ട് ടൈം വർക്കർമാർക്കും ലഭിക്കുന്ന പലിശ നിരക്ക് അനിയന്ത്രിതമായ വരുമാനം, ശമ്പള സ്ലിപ്പുകളുടെ അഭാവം, ജോലി അനിശ്ചിതത്വം എന്നിവ കാരണം ഉയർന്ന റിസ്ക് വായ്പ എടുക്കാനാണ് പലപ്പോഴും നിർബന്ധിതരാവുക. അവരുടെ ക്രെഡിറ്റ് യോഗ്യത വിലയിരുത്താൻ ബാങ്കുകൾ ബാങ്ക് സ്റ്റേറ്റ്മെന്റുകളും ഇൻകം ടാക്സ് റിട്ടേണുകളും പരിശോധിക്കുന്നു.

ശമ്പളം വാങ്ങുന്നവരെ അപേക്ഷിച്ച് ഫ്രീലാൻസർമാർക്കും പാർട്ട് ടൈം വർക്കർമാർക്കും ഉയർന്ന പലിശ നിരക്കിലാണ് വായ്പ ലഭിക്കുന്നത്. സാധാരണയായി വർഷത്തിൽ 12% മുതൽ 30% വരെ. കൂടാതെ, ബാങ്കുകൾ കൂടുതൽ വരുമാന തെളിവുകൾ ഇവരോട് ആവശ്യപ്പെടുന്നു, ഉദാഹരണത്തിന്, ഒന്നിലധികം വർഷത്തെ ഐ ടി ആർ, ബാങ്ക് സ്റ്റേറ്റ്മെന്റുകൾ, ക്ലയന്റ് ഇൻവോയ്സുകൾ എന്നിവ. അതോടൊപ്പം, ഫ്രീലാൻസർമാർക്ക് അംഗീകരിക്കപ്പെടുന്ന വായ്പ തുക സമാന വരുമാനമുള്ള ശമ്പളക്കാർക്ക് ലഭിക്കുന്നതിനേക്കാൾ കുറവായിരിക്കും.

ഇന്ത്യയിൽ ഫ്രീലാൻസിങിന്റെയും പാർട്ട് ടൈം വർക്കിന്റെയും വളർച്ച സാമ്പത്തിക സ്വാതന്ത്ര്യം കൊണ്ടുവന്നിട്ടുണ്ട്. എന്നാൽ, വരുമാന അസ്ഥിരത കാരണം വ്യക്തിഗത വായ്പകൾ ലഭിക്കുന്നത് ഒരു വെല്ലുവിളിയാണ്. സ്ഥിരമായ ബാങ്ക് ബാലൻസ്, പതിവ് ടാക്സ് ഫയലിങ്, നല്ല ക്രെഡിറ്റ് സ്കോർ എന്നിവ ഇവിടെ അംഗീകാര സാധ്യത വർദ്ധിപ്പിക്കും. പാർട്ട് ടൈം സമ്പദ്‌വ്യവസ്ഥ വളരുന്നതിനനുസരിച്ച്, വായ്പദാതാക്കൾ കൂടുതൽ വഴക്കമുള്ള ഓപ്ഷനുകളും ലളിതമായ രേഖകളും വാഗ്ദാനം ചെയ്യുന്നു.

ഫ്രീലാൻസ് ജോലിക്കാർക്ക് മികച്ച വായ്പാ ഓപ്ഷനുകൾ നൽകുന്ന ബാങ്കുകൾ

1. ഐ സി ഐ സി ഐ ബാങ്ക്

*പലിശ നിരക്ക്: 10.85% മുതൽ വാർഷികം
*വായ്പ തുക: ₹50 ലക്ഷം വരെ

പ്രത്യേകതകൾ:

*ഓൺലൈൻ അപേക്ഷയും 3 സെക്കൻഡിനുള്ളിൽ വായ്പാ തുക ക്രെഡിറ്റ് ചെയ്യലും

*ഡിജിറ്റൽ പ്ലാറ്റ്‌ഫോം വഴി വായ്പ ട്രാക്ക് ചെയ്യാം

യോഗ്യത: 6-12 മാസത്തെ ബാങ്ക് സ്റ്റേറ്റ്മെന്റ്, മിനിമം പ്രതിമാസ വരുമാനം ₹25,000

2. എച് ഡി എഫ് സി ബാങ്ക്

*പലിശ നിരക്ക്: 10.50% മുതൽ വാർഷികം
*വായ്പ തുക: ₹40 ലക്ഷം വരെ

പ്രത്യേകതകൾ:

*ഐ ടി ആർ, ബാങ്ക് സ്റ്റേറ്റ്മെന്റുകൾ അടിസ്ഥാനമാക്കി വായ്പ അനുവദിക്കുന്നു

*നിലവിലുള്ള ഉപഭോക്താക്കൾക്ക് പ്രീ-അംഗീകൃത വായ്പ ലഭ്യമാണ്

*വേഗത്തിലുള്ള പ്രോസസ്സിങ് സമയവും കുറഞ്ഞ രേഖകളും

യോഗ്യത: കുറഞ്ഞത് 2 വർഷത്തെ ഐ ടി ആർ, 700-ന് മുകളിലുള്ള ക്രെഡിറ്റ് സ്കോർ

3. ആക്സിസ് ബാങ്ക്

*പലിശ നിരക്ക്: 10.49% മുതൽ വാർഷികം
*വായ്പ തുക: ₹25 ലക്ഷം വരെ

പ്രത്യേകതകൾ:

*കുറഞ്ഞ രേഖകളോടെ എളുപ്പമുള്ള അംഗീകാര പ്രക്രിയ
*60 മാസം വരെ തിരിച്ചടവ് കാലാവധി
യോഗ്യത: 2 വർഷത്തെ ഐ ടി ആർ, ക്രെഡിറ്റ് സ്കോർ 750-ന് മുകളിൽ

4. കോട്ടക് മഹീന്ദ്ര ബാങ്ക്

*പലിശ നിരക്ക്: 10.99% മുതൽ വാർഷികം
*വായ്പ തുക: ₹35 ലക്ഷം വരെ

പ്രത്യേകതകൾ:

*അടിയന്തര ആവശ്യങ്ങൾക്കായുള്ള (മെഡിക്കൽ, യാത്ര മുതലായവ) വേഗതയുള്ള വായ്പ

*കുറഞ്ഞ പ്രോസസ്സിങ് ഫീസും വഴക്കമുള്ള തിരിച്ചടവ് ഓപ്ഷനുകളും

യോഗ്യത: മിനിമം ₹25,000 പ്രതിമാസ വരുമാനം, 1-2 വർഷത്തെ ജോലി പരിചയം

5. ഇൻഡസ്ലൻഡ് ബാങ്ക്

*പലിശ നിരക്ക്: 10.49% മുതൽ വാർഷികം
*വായ്പ തുക: ₹15 ലക്ഷം വരെ

പ്രത്യേകതകൾ:

*ഫ്രീലാൻസർമാർക്ക് വേഗത്തിലുള്ള ഓൺലൈൻ പ്രോസസ്സിങ്

*5 വർഷം വരെ തിരിച്ചടവ് കാലാവധി

യോഗ്യത: 12 മാസത്തെ ബാങ്ക് സ്റ്റേറ്റ്മെന്റ്, ക്രെഡിറ്റ് സ്കോർ 700-ന് മുകളിൽ

6. ഡി എസ് ബി ബാങ്ക്

*പലിശ നിരക്ക്: 10.99% മുതൽ വാർഷികം
*വായ്പ തുക: ₹15 ലക്ഷം വരെ

പ്രത്യേകതകൾ:

*സ്വയം തൊഴിൽ ചെയ്യുന്നവർക്ക് പ്രത്യേകം രൂപകൽപ്പന ചെയ്ത വായ്പകൾ

*പേപ്പർലെസ് അപേക്ഷാ പ്രക്രിയയും വേഗത്തിലുള്ള ഡിസ്ബേഴ്സ്മെന്റും

യോഗ്യത: കെ വൈ സി രേഖകൾ, 6 മാസത്തെ ബാങ്ക് സ്റ്റേറ്റ്മെന്റ്

7. എസ് ബി ഐ

*പലിശ നിരക്ക്: 11.45% മുതൽ വാർഷികം
*വായ്പ തുക: ₹35 ലക്ഷം വരെ

പ്രത്യേകതകൾ:

*പൊതുമേഖലാ ബാങ്കായതിനാൽ താഴ്ന്ന പലിശ നിരക്ക്
*എക്സ് പ്രെസ്സ് ക്രെഡിറ്റ് പോലുള്ള വായ്പ പദ്ധതികൾ ഫ്രീലാൻസർമാർക്ക് ഉപയോഗിക്കാം
യോഗ്യത: 2-3 വർഷത്തെ ഐ ടി ആർ, സ്ഥിരമായ വരുമാന തെളിവ്

വ്യക്തിഗത വായ്പ എടുക്കുമ്പോൾ സൂക്ഷിക്കേണ്ട പ്രധാന കാര്യങ്ങൾ

1. പലിശ നിരക്ക് താരതമ്യം ചെയ്യുക

വ്യക്തിഗത വായ്പകളുടെ പലിശ നിരക്ക് പല ബാങ്കുകൾക്കും എൻ ബി എഫ് സികൾക്കും വ്യത്യാസപ്പെടും. അതിനാൽ, ഏറ്റവും കുറഞ്ഞ പലിശ നിരക്കുള്ളത് തിരഞ്ഞെടുക്കുന്നത് ലാഭകരമാണ്.

2. ചുമത്തപ്പെടുന്ന അധിക ചാർജുകളും ഫീസുകളും മനസ്സിലാക്കുക

വായ്പാ തുകയ്ക്ക് പുറമേ വിവിധ ബാങ്കുകളും സാമ്പത്തിക സ്ഥാപനങ്ങളും ഈടാക്കുന്ന അദൃശ്യ ചാർജുകൾ ഏറെയുണ്ട്. അവ കൃത്യമായി മനസ്സിലാക്കുക

3. യോഗ്യതയും ആവശ്യമുള്ള രേഖകളും പരിശോധിക്കുക

വായ്പയ്ക്ക് അപേക്ഷിക്കുന്നതിന് മുമ്പ് നിങ്ങൾ യോഗ്യനാണോ എന്ന് ഉറപ്പാക്കുക.

4. തിരിച്ചടവ് ആസൂത്രണം ചെയ്യുക

വായ്പ തിരിച്ചടവ് നിങ്ങളുടെ വരുമാനത്തിനനുസൃതമായി സാധ്യമാണോ എന്ന് വിലയിരുത്തുക.

5. വായ്പാ കരാർ സൂക്ഷ്മമായി വായിക്കുക

വായ്പാ കരാർ ഒപ്പുവയ്ക്കുന്നതിന് മുമ്പ് എല്ലാ വ്യവസ്ഥകളും ശ്രദ്ധിക്കുക.

6. നിയമപരമായ സ്വീകാര്യത ഉറപ്പാക്കുക

എൻ ബി എഫ് സികളോ മറ്റോ വായ്പ അനുവദിച്ചാലും, ആർ ബി ഐയുടെ അംഗീകൃത സ്ഥാപനങ്ങൾ ആണോ എന്ന് ഉറപ്പാക്കുക.

7. മുൻകാല ക്രെഡിറ്റ് ഹിസ്റ്ററിയും ബാധ്യതകളും വിലയിരുത്തുക

നിങ്ങളുടെ പേരിൽ മറ്റേത് വായ്പകളും വായ്പാ കാർഡുകളുമുണ്ടോ? എന്ന് പരിശോധിക്കുക. കൂടുതൽ വായ്പകൾ എടുത്താൽ ക്രെഡിറ്റ് സ്കോർ കുറയാം

8. എമർജൻസി സാഹചര്യങ്ങൾ മുൻകൂട്ടി കണക്കാക്കുക

വായ്പ എടുത്താലുടൻ തിരിച്ചടവിന് ഒരു ബാക്കപ്പ് പ്ലാൻ ഒരുക്കുക. ജോലിയോ വരുമാനമോ നഷ്ടപ്പെട്ടാൽ 3-6 മാസത്തേക്ക് ഇ എം ഐ അടയ്ക്കാൻ പറ്റുന്ന സംരക്ഷണം ഉണ്ടാക്കുക.

9. പുനർവായ്പ ഓപ്ഷനുകൾ പരിശോധിക്കുക

വ്യക്തിഗത വായ്പ എടുത്ത ശേഷം പലിശ നിരക്ക് കുറയുകയോ മറ്റൊരു മികച്ച ഓഫർ ലഭിക്കുകയോ ചെയ്താൽ പുനർവായ്പ പരിഗണിക്കാവുന്നതാണ്.

10. പ്രബുദ്ധമായ സാമ്പത്തിക ആസൂത്രണം ചെയ്യുക

വായ്പ എടുക്കുമ്പോൾ ആവശ്യത്തിന് മാത്രം ഉപയോഗിക്കുക. ഓരോ വായ്പയും ഒരു നിക്ഷേപമായി കാണുക, അധിക ബാധ്യതയായി അല്ല. അപേക്ഷിക്കുമ്പോൾ പലിശ നിരക്കുകൾ, ഫീസ്, തിരിച്ചടവ് ഓപ്ഷനുകൾ എന്നിവ താരതമ്യം ചെയ്ത് ഏറ്റവും മികച്ചത് തിരഞ്ഞെടുക്കുക.

ലോൺ എടുക്കും മുൻപ് റിപ്പോ നിരക്കിലെ മാറ്റം പ്രാബല്യത്തിൽ വന്നോ എന്ന് നോക്കുക

റിസർവ് ബാങ്ക് ഓഫ് ഇന്ത്യ നിശ്ചയിക്കുന്ന റിപ്പോ നിരക്ക് നിങ്ങളുടെ വായ്പയുടെ പലിശ നിരക്ക് നിർണയിക്കുന്നതിൽ പ്രധാന പങ്ക് വഹിക്കുന്ന ഒന്നാണ്. റിപ്പോ നിരക്ക് ഉയർന്നാൽ, ബാങ്കുകൾക്കുള്ള വായ്പാ ചെലവ് കൂടുന്നതിനാൽ വ്യക്തിഗത, ഗൃഹ, ബിസിനസ് വായ്പകളുടെ പലിശ നിരക്ക് ഉയരും. തുടർന്ന് ഇ എം ഐ കൂടി സാമ്പത്തിക ബാധ്യത വർദ്ധിക്കും. മറിച്ച്, റിപ്പോ നിരക്ക് കുറയുമ്പോൾ, വായ്പാ പലിശ നിരക്ക് കുറഞ്ഞ് തിരിച്ചടവ് എളുപ്പമാകും.

2025-ൽ ആർ ബി ഐയുടെ തീരുമാനങ്ങൾ ദ്രവ്യലഭ്യത, പണപ്പെരുപ്പം, സാമ്പത്തിക വളർച്ച തുടങ്ങിയവയെ ആശ്രയിച്ചിരിക്കും. ഫ്ലോട്ടിങ് പലിശ നിരക്ക് കുറഞ്ഞാൽ ഗുണകരമാകുമ്പോൾ, ഫിക്സ്ഡ് ഇന്ട്രെസ്റ് നിരക്ക് സ്ഥിരത ഉറപ്പാക്കും. അതിനാൽ, വായ്പ എടുക്കുന്നതിന് മുമ്പ് പലിശ നിരക്ക് പ്രവണതകൾ വിലയിരുത്തുന്നതാണ് ഉചിതം. ആഴ്ചകൾക്ക് മുൻപ് ആർ ബി ഐ റിപ്പോ നിരക്ക് കുറച്ചു എന്ന റിപ്പോർട്ട് പുറത്തു വന്നിരുന്നു. അതുകൊണ്ടുതന്നെ നിങ്ങൾ ഇപ്പോഴും ലോൺ എടുക്കുമ്പോൾ അതിന്റെ പലിശ കുറയാൻ സാധ്യതകൾ ഉണ്ട്.