വെറും 20 രൂപക്ക് ഇൻഷുറൻസ് പരിരക്ഷ നേടാം: ഈ സർക്കാർ പദ്ധതിയിൽ ആർക്കെല്ലാം അപേക്ഷിക്കാം?

സാമ്പത്തിക സുരക്ഷയ്ക്കാണ് ആളുകൾ ഇൻഷുറൻസ് സ്കീമിൽ ചേരുന്നത്. ഇന്ത്യയിൽ നിരവധി ഇൻഷുറൻസ് പ്ലാനുകളുണ്ട്, എന്നാൽ ഉയർന്ന പ്രീമിയം തുക സാധാരണക്കാർക്ക് താങ്ങാവുന്നതിലും വലുതായിരിക്കും. ചെറിയ പ്രീമിയം തുകയിൽ വലിയ കവറേജ് ആ​ഗ്രഹിക്കുന്നുണ്ടോ? എങ്കിൽ അത്തരം ചില പ്ലാനുകൾ ഇന്ത്യാ ​ഗവൺമെൻ്റ് തന്നെ വാ​ഗ്ദാനം ചെയ്യുന്നുണ്ട്. അതെ, വെറും 20 രൂപയ്ക്ക് പ്രതിവർഷം 2 ലക്ഷം രൂപയുടെ ഇൻഷുറൻസ് പരിരക്ഷ ഉറപ്പാക്കിയാലോ?

സർക്കാർ രണ്ട് ഇൻഷുറൻസ് പദ്ധതികൾ കുറഞ്ഞ പ്രീമിയം തുകയിൽ വാ​ഗ്ദാനം ചെയ്യുന്നു. പ്രധാനമന്ത്രി ജീവൻ ജ്യോതി ബീമാ യോജന (PMJJBY), പ്രധാനമന്ത്രി സുരക്ഷാ ബീമാ യോജന (PMSBY) എന്നിവയാണ് ഈ രണ്ട് സ്കീം. രണ്ട് സ്കീമിനെ കുറിച്ചും പരിശോധിക്കാം;

പ്രധാനമന്ത്രി ജീവൻ ജ്യോതി ബീമ യോജന (PMJJBY)

പ്രധാനമന്ത്രി ജീവൻ ജ്യോതി ബീമ യോജന പ്രതിവർഷം വെറും 436 രൂപ പ്രീമിയത്തിൽ നിങ്ങൾക്ക് 2 ലക്ഷം രൂപയുടെ ലൈഫ് ഇൻഷുറൻസ് പരിരക്ഷ വാഗ്ദാനം ചെയ്യുന്നു. 55 വയസ് വരെ വർഷം തോറും പുതുക്കാവുന്ന ഈ പദ്ധതി നിങ്ങളുടെ ബാങ്ക് അക്കൗണ്ടുമായി നേരിട്ട് ബന്ധിപ്പിച്ചിരിക്കുന്നു. 18നും 50 വയസിനുമിടയിൽ പ്രായമുള്ള ഏതൊരു ഇന്ത്യൻ പൗരനും പ്രധാനമന്ത്രി ജീവൻ ജ്യോതി ബീമാ യോജനയ്ക്ക് അപേക്ഷിക്കാം.

എല്ലാ വർഷവും വെറും 436 രൂപ അടച്ചാൽ മതി. അതായത് മാസം ഏകദേശം 36 രൂപ മാറ്റിവെച്ചാൽ നിങ്ങൾക്ക് കൂടുതൽ എളുപ്പത്തിൽ പ്രീമിയം അടക്കാം. ഇൻഷുറൻസ് ഉടമ മരണപ്പെട്ടാൽ 2 ലക്ഷം രൂപ വരെയുള്ള ലൈഫ് ഇൻഷുറൻസ് ഉറപ്പാക്കാം.

പ്രധാനമന്ത്രി സുരക്ഷാ ബീമാ യോജന (PMSBY)

പ്രധാനമന്ത്രി സുരക്ഷാ ബീമ യോജനയാണ് രണ്ടാമത്തെ സ്കീം. ഇവിടെ പ്രതിവർഷം 20 രൂപയ്ക്ക് 2 ലക്ഷം രൂപയുടെ അപകട ഇൻഷുറൻസ് പരിരക്ഷ നൽകുന്നു. ഈ സ്കീം പ്രകാരം അപകട മരണം അല്ലെങ്കിൽ പൂർണ്ണ വൈകല്യം എന്നിവക്ക് 2 ലക്ഷം രൂപ കവറേജ് ലഭിക്കും. എന്നാൽ ഭാഗിക വൈകല്യത്തിന് 1 ലക്ഷം രൂപ പരിരക്ഷ നൽകുന്നു. 18 മുതൽ 70 വയസ്സ് വരെ പ്രായമുള്ള ഏതൊരു ഇന്ത്യൻ പൗരനും പ്രധാനമന്ത്രി സുരക്ഷാ ബീമാ യോജനയ്ക്ക് അപേക്ഷിക്കാം.

പ്രധാനമന്ത്രി സുരക്ഷാ ബീമാ യോജന, പ്രധാനമന്ത്രി ജീവൻ ജ്യോതി ബീമ യോജന എന്നിവ രണ്ടും നിങ്ങളുടെ ബാങ്ക് അക്കൗണ്ടുമായി ബന്ധിപ്പിച്ചിരിക്കുന്നു. എല്ലാ മെയ് മാസത്തിലും പ്രീമിയം ഓട്ടോ-ഡെബിറ്റ് ചെയ്യപ്പെടുന്നു. ഉയർന്ന പ്രീമിയം തുകയോടെ നൽകുന്ന ഇൻഷുറൻസ് സ്കീമുകൾ നിലനിൽക്കുമ്പോൾ ഇത്രയും കുറഞ്ഞ നിരക്കിൽ ഇൻഷുറൻസ് പരിരക്ഷ ഉറപ്പാക്കുന്ന പ്ലാൻ സാധാരണക്കാർക്ക് ആശ്വാസകരമാണ്. മറ്റു വലിയ പ്ലാനുകളെ അപേക്ഷിച്ച് കുറഞ്ഞ കവറേജാണെങ്കിലും സുരക്ഷിതമാണ്.