ഈടും വേണ്ട, സബ്സിഡിയും കിട്ടും; നിങ്ങളുടെ ബിസിനസിന് സർക്കാർ വായ്പ കിട്ടും

ഇന്ത്യയുടെ സമ്പദ്‌വ്യവസ്ഥയുടെ നട്ടെല്ലാണ് സൂക്ഷ്മ ചെറുകിട ഇടത്തരം സംരംഭങ്ങൾ അഥവ എം‌എസ്‌എം‌ഇ. രാജ്യത്തിന്റെ സാമ്പത്തിക വളർച്ചയിൽ അവ നിർണായക പങ്ക് വഹിക്കുന്നുണ്ട്. 50 കോടിയിൽ താഴെ യന്ത്ര-സാമഗ്രികളിലുള്ള നിക്ഷേപവും 250 കോടിയിൽ താഴെ വാർഷിക വിറ്റുവരവുമുള്ള വ്യക്തികൾ നടത്തുന്ന സ്ഥാപനങ്ങൾ, സ്റ്റാർട്ടപ്പ്, പങ്കാളിത്ത സ്ഥാപനം (പാർട്ണർഷിപ്), കമ്പനി, ട്രസ്റ്റ് അല്ലെങ്കിൽ സൊസൈറ്റി, സഹകരണ സംഘങ്ങൾ, സ്വാശ്രയ സംഘങ്ങൾ (എസ്എച്ച്ജി) എന്നിവ എംഎസ്എംഇ റജിസ്ട്രേഷന് അർഹമാണ്.

 

എം‌എസ്‌എം‌ഇകൾക്കുവേണ്ടി കേന്ദ്ര സർക്കാർ നിരവധി വായ്പാ പദ്ധതികൾ അവതരിപ്പിച്ചിട്ടുണ്ട്. മുദ്ര യോജന വഴിയുള്ള മൈക്രോഫിനാൻസ് മുതൽ സിജിടിഎംഎസ്ഇ വഴിയുള്ള വലിയ വായ്പകൾ വരെ ഇതിൽ ഉൾപ്പെടുന്നു, ഓരോന്നും നിർദ്ദിഷ്ട ബിസിനസ് ഘട്ടങ്ങൾക്കും ആവശ്യകതകൾക്കും വേണ്ടി രൂപകൽപ്പന ചെയ്‌തിരിക്കുന്നു. പുതിയ ബിസിനസ് സംരംഭങ്ങൾക്കായുള്ള ഈ എംഎസ്എംഇ വായ്പാ പദ്ധതികൾ നിങ്ങളുടെ സംരംഭക സ്വപ്നങ്ങൾക്ക് എങ്ങനെ മുതൽക്കൂട്ടാകുമെന്ന് പരിശോധിക്കാം.

 

1. പ്രധാനമന്ത്രി മുദ്ര യോജന

 

ചെറുകിട സംരഭങ്ങള്‍ക്ക് 10 ലക്ഷം വരെ വായ്പ നല്‍കുന്നതിനായി ഒന്നാം നരേന്ദ്ര മോദി സർക്കാർ 2015 ഏപ്രിൽ 8ന് അവതരിപ്പിച്ച പദ്ധതിയാണ് പ്രധാനമന്ത്രി മുദ്രാ യോജന. കോര്‍പറേറ്റ് ഇതര ചെറുകിട സംരഭങ്ങള്‍, മൈക്രോ എന്റര്‍പ്രൈസുകള്‍, ഉത്പാദനം, വ്യാപാരം, സേവനങ്ങള്‍ കൃഷിയുമായി ബന്ധപ്പെട്ട മേഖലകളിലെ വ്യക്തികള്‍ എന്നിവര്‍ക്കാണ് വായ്പ ലഭിക്കുക. മുദ്ര യോജന സ്‌കീം മൂന്ന് പ്ലാനുകളുമായാണ് വരുന്നത്: സ്റ്റാര്‍ട്ടപ്പുകള്‍ക്കുള്ള ശിശു പദ്ധതി (50,000 രൂപ വരെ വായ്പ) നന്നായി സ്ഥാപിതമായ സംരംഭങ്ങള്‍ക്കുള്ള കിഷോര്‍ പ്ലാന്‍ (50,000 രൂപയ്ക്കും 5 ലക്ഷം രൂപയ്ക്കും ഇടയിലുള്ള വായ്പ) ബിസിനസ് വിപുലീകരണത്തിനുള്ള തരുണ്‍ പ്ലാന്‍ (5 ലക്ഷം രൂപയ്ക്കും 10 ലക്ഷം രൂപയ്ക്കും ഇടയില്‍). എല്ലാ പൊതുമേഖലാ ബാങ്കുകള്‍, പ്രാദേശിക ഗ്രാമീണ ബാങ്കുകള്‍, സഹകരണ ബാങ്കുകള്‍, സ്വകാര്യമേഖലാ ബാങ്കുകള്‍, മൈക്രോ ഫിനാന്‍സ് സ്ഥാപനങ്ങള്‍, ബാങ്കിങ് ഇതര ധനകാര്യ കമ്പനികള്‍ (എന്‍.ബി.എഫ്.സി), വിദേശ ബാങ്കുകള്‍ തുടങ്ങിയവയിൽ നിന്ന് വായ്പ നേടാം. ഈട് ആവശ്യമില്ല.

 

2. മൈക്രോ, ചെറുകിട സംരംഭങ്ങൾക്കായുള്ള ക്രെഡിറ്റ് ഗ്യാരന്റി ഫണ്ട് ട്രസ്റ്റ് (സിജിടിഎംഎസ്ഇ)

 

ഈടുള്ള സെക്യൂരിറ്റി ആവശ്യമില്ലാത്ത ഒരു കോടി രൂപ വരെയുള്ള വായ്പ ലഭ്യമാക്കുന്ന പദ്ധതിയാണിത്. സൂക്ഷ്മ ചെറുകിട സംരംഭങ്ങൾക്കാണ് ഈട് രഹിത വായ്പ ലഭ്യമാക്കുന്നത്. സ്ത്രീകൾ നയിക്കുന്ന നിർമ്മാണ സംരംഭങ്ങൾക്ക് 2 കോടി രൂപ വരെയുള്ള വായ്പകൾ ലഭിക്കും.

 

3. പിഎംഇജിപി

 

2008 മുതൽ കേന്ദ്രസർക്കാർ നടപ്പാക്കി വന്നിരുന്ന ഒരു പ്രധാനപ്പെട്ട വായ്പാ പദ്ധതിയാണ് പ്രധാനമന്ത്രിയുടെ തൊഴിൽ സൃഷ്ടി പദ്ധതി അഥവാ പിഎംഇജിപി. പൊതുസംരംഭകർക്ക് നിർമാണ സേവന സ്ഥാപനങ്ങൾ ആരംഭിക്കുന്നതിന് പരിധിയില്ലാതെ വായ്പ നൽകുകയാണ് ലക്ഷ്യം. വായ്പയ്ക്ക് പരിധി ഇല്ലെങ്കിലും സബ്സിഡിക്കു പരിധിയുണ്ട്. നിർമാണ സ്ഥാപനങ്ങൾക്ക് 50 ലക്ഷം രൂപ വരെയും സേവന സ്ഥാപനങ്ങൾക്ക് 20 ലക്ഷം രൂപ വരെയും ഉള്ള പദ്ധതികൾക്കു മാത്രമേ സബ്സിഡി ലഭിക്കുകയുള്ളൂ. 5 കോടി വരെയുള്ള വായ്പകൾക്ക് തൽക്ഷണ അംഗീകാരം ലഭിക്കും. പലിശ നിരക്കുകൾ പ്രതിവർഷം 8.5% മുതൽ ആരംഭിക്കുന്നു, അന്തിമ നിരക്കുകൾ വ്യക്തിഗത ബാങ്ക് നയങ്ങളാണ് നിർണ്ണയിക്കുന്നത്. 

 

4. സ്റ്റാൻഡ്-അപ്പ് ഇന്ത്യ സ്കീം

 

രാജ്യത്ത് സാമൂഹികമായി പിന്നാക്കം നില്‍ക്കുന്ന പട്ടികജാതി/പട്ടികവര്‍ഗ സമൂഹങ്ങളെയും വനിതകളേയും സംരംഭ മേഖലയിലേക്ക് കൈപിടിച്ച് കൊണ്ടുവരിക എന്നതാണ് പദ്ധതിയുടെ ലക്ഷ്യം. 10 ലക്ഷം മുതല്‍ ഒരു കോടി രൂപ വരെ വായ്പ ലഭിക്കും. നിര്‍മാണം,സേവനം, വ്യാപാരം മേഖലകളില്‍ വായ്പ ഉപയോഗിക്കാം.തിരിച്ചടവ് കാലയളവ് പരമാവധി 7 വര്‍ഷം (18 മാസം വരെയുള്ള മൊറട്ടോറിയം കാലയളവ് ഉള്‍പ്പെടെ).

 

5. സിഡ്ബി എംഎസ്എംഇ ഫിനാൻസിങ്

 

3 കോടി മുതൽ 50 കോടി വരെ ആവശ്യമുള്ള സ്ഥാപിത ബിസിനസുകൾക്ക്, സാങ്കേതികവിദ്യ നവീകരണം, പ്രവർത്തന മൂലധനം, കയറ്റുമതി ധനസഹായം എന്നിവയ്ക്കായി സിഡ്ബി വായ്പ നൽകുന്നു. പലിശ നിരക്കുകൾ പ്രതിവർഷം 9.5% മുതൽ ആരംഭിക്കുന്നു.