പലിശയില്ലാതെ ഇവിടെ പണം തരും, 2 ലക്ഷം വരെ ലാഭം കിട്ടും: ഈ സ്കീമിനെ കുറിച്ച് അറിയാം....

വായ്പ എടുക്കാനുള്ള പ്ലാനിലാണോ? പലിശയില്ലാതെ ഏതെങ്കിലും ബാങ്കിൽ നിന്നോ ബാങ്ക് ഇതര സ്ഥാപനങ്ങളിൽ നിന്നോ വായ്പ എടുക്കാൻ സാധിക്കുമോ? ഒരു രൂപ പോലും പലിശ നൽകാതെ നിങ്ങൾക്ക് വലിയൊരു തുക ഒറ്റത്തവണയായി കിട്ടും. ഇതിന് ബാങ്കിൽ പോവേണ്ട കാര്യമില്ല. കേരള സർക്കാരിന്റെ കീഴിൽ പ്രവർത്തിക്കുന്ന ധനകാര്യ സ്ഥാപനമായ കെ.എസ്.എഫ്.ഇയിൽ പലിശയില്ലാതെ പണം ലഭിക്കും. കെ.എസ്.എഫ്.ഇ ചിട്ടികളിലൂടെ.

സാധാരണ ഒരു ബാങ്ക് പോലെ സങ്കീർണമല്ല കെ.എസ്.എഫ്.ഇ എന്ന സ്ഥാപനം. അതിനാൽ തന്നെ കെ.എസ്.എഫ്.ഇ ചിട്ടികളിൽ തിരിച്ചടവ് തുക പലിശ രഹിതമായിരിക്കും. മാത്രമല്ല നിങ്ങളുടെ ചിട്ടിത്തുക മുഴുവനായും തിരിച്ചടക്കേണ്ടി വരില്ല. ഉദാഹരണത്തിന് 10 ലക്ഷത്തിന്റെ ചിട്ടിയിൽ ചേർന്നാൽ മൊത്തം തിരിച്ചടവ് തുക ചിലപ്പോൾ 8.50 ലക്ഷം മാത്രമായിരിക്കും. അതായത് 1.50 മുതൽ 2 ലക്ഷം വരെ നിങ്ങൾക്ക് കെ.എസ്.എഫ്.ഇ ചിട്ടിയിലൂടെ ലാഭം കിട്ടാൻ സാധ്യതയുണ്ട്.

കെ.എസ്.എഫ്.ഇ ചിട്ടികളിലൂടെ നിങ്ങൾക്ക് പണം ലഭിച്ചാൽ തിരിച്ചടവ് പോലും വളരെ കുറവായിരിക്കും. അതായത് പ്രതിമാസം 10,000 രൂപ തിരിച്ചടവ് വരുന്ന 10 ലക്ഷത്തിന്റെ ചിട്ടിയിൽ ചേർന്നാൽ ആദ്യ മാസം മാത്രമാണ് 10,000 എന്ന തുക അടക്കേണ്ടി വരുന്നത്.

പിന്നീ‍ട് കുറച്ച് മാസം വരെ 7500 മാത്രം അടച്ചാൽ മതിയാവും. ബാക്കിയുള്ള 2,500 രൂപ ഡിവിഡന്റായി കണക്കാക്കും. ഇത്തരത്തിൽ എല്ലാ മാസവും ഡിവിഡന്റ് ലഭിക്കും. എന്നാൽ ചിട്ടിയുടെ അവസാന കാലത്തേക്ക് അതായത് അവസാന 4,5 മാസങ്ങളിൽ ചിലപ്പോൾ 10,000 രൂപ അടക്കേണ്ടി വരും.

പലിശയില്ലാതെ എങ്ങനെ പണം ലഭിക്കും?

നിങ്ങൾ കെ.എസ്.എഫ്.ഇയിൽ 10 ലക്ഷത്തിന്റെ ചിട്ടി ഏകദേശം 7 ലക്ഷം രൂപക്ക് വിളിച്ചെടുത്താൽ ഇതിൽ നിങ്ങൾ പലിശ നൽകേണ്ട ആവശ്യമില്ല. മാത്രമല്ല ഇത് എല്ലാവർക്കും നല്ല ലാഭം നൽകും. അതായത്, ഒരാൾ ചിട്ടി വിളിച്ചാൽ മുഴുവൻ തുകയും ലഭിക്കില്ല. 10 ലക്ഷത്തിൽ 7 ലക്ഷം കിട്ടിയാൽ ബാക്കി 3 ലക്ഷം ചിട്ടിയിലെ മറ്റുള്ളവർക്ക് വീതിച്ചു നൽകും. അതാണ് ഡിവിഡന്റ്.

ജാമ്യം നൽകിക്കൊണ്ട് ചിട്ടി വിളിച്ചെടുക്കുന്ന തുക നിങ്ങളുടെ അക്കൗണ്ടിലെത്തും. ഡിവിഡന്റ് ലഭിക്കുന്നതിലൂടെ നല്ലൊരു തുക ലാഭിക്കാനും സാധിക്കും.

ഇന്നത്തെ കാലത്ത് വായ്പക്കായി ബാങ്കുകളിൽ കയറിയിറങ്ങിയാലും ഉയർന്ന പലിശ നൽകി ലോൺ എടുക്കേണ്ടി വരും. പേഴ്സണൽ ലോണുകൾ ആണെങ്കിൽ പലിശ അൽപം കൂടും. വായ്പയായി എടുക്കുന്ന തുകയുടെ ഇരട്ടി തുക ഇതിനകം തിരിച്ചടക്കേണ്ടിയും വരും. എന്നാൽ നിങ്ങൾക്ക് ലഭിക്കുന്ന തുക പോലും മുഴുവനായി തിരിച്ചടക്കേണ്ട എന്നത് കെ.എസ്.എഫ്.ഇയുടെ പ്രത്യേകതയാണ്. വലിയൊരു സാമ്പത്തിക നേട്ടം ആ​ഗ്രഹിക്കുന്നവർ പണത്തിന് ആവശ്യം വരുന്നതിന് ഒരു രണ്ട് വർഷം മുൻപെങ്കിലും കെ.എസ്.എഫ്.ഇ ചിട്ടിയിൽ ചേർന്നാൽ നഷ്ടം വരാതെ സമ്പാദിക്കാം.

നിങ്ങൾക്ക് ചിട്ടിയിലൂടെ ലഭിക്കുന്ന തുക വീണ്ടും വളർത്തണമെന്ന് താത്പര്യമുണ്ടെങ്കിൽ ആ തുക കെ.എസ്.എഫ്.ഇയുടെ സു​ഗമ സേവിം​ഗ്സ് സ്കീമിൽ നിക്ഷേപിച്ചാൽ പലിശ നിങ്ങൾക്ക് ലഭിക്കും എന്നതും ശ്രദ്ധേയമായ കാര്യമാണ്. കെ.എസ്.എഫ്.ഇ വെറുമൊരു ചിട്ടി സ്ഥാപനമല്ല. വായ്പയേക്കാൾ ​ഗുണകരമായ രീതിയിൽ സാമ്പത്തിക നേട്ടം ഉറപ്പാക്കാൻ കെ.എസ്.എഫ്.ഇയിലൂടെ സാധിക്കും. പലിശ രഹിതമായി പണം കിട്ടാൻ ഇതാണ് ഏറ്റവും മികച്ച മാർ​ഗം.