ഇപിഎഫ്ഒയിൽ അടിമുടി മാറ്റം! പിഎഫ് പണം ഇനി യുപിഐ വഴി പിൻവലിക്കാം: ഏപ്രിൽ മുതൽ പരിഷ്കരണം

എംപ്ലോയീസ് പ്രൊവിഡന്റ് ഫണ്ട് ഓർഗനൈസേഷൻ അഥവാ ഇപിഎഫ്ഒ തങ്ങളുടെ സേവനങ്ങൾ കൂടുതൽ കാര്യക്ഷമമാക്കുന്നതിന്റെ ഭാഗമായി യുപിഐ അടിസ്ഥാനമാക്കി പണം പിൻവലിക്കാനുള്ള സംവിധാനം നടപ്പിലാക്കുന്നു. ഇതോടെ, ഇപിഎഫ്ഒ അംഗങ്ങൾക്ക് തങ്ങളുടെ അക്കൗണ്ടിലുള്ള തുകയുടെ ഒരു ഭാഗം ഏപ്രിൽ മാസം മുതൽ യുപിഐ വഴി നേരിട്ട് ബാങ്ക് അക്കൗണ്ടുകളിലേക്ക് മാറ്റാൻ സാധിക്കും. നിലവിൽ പിഎഫ് തുക പിൻവലിക്കുന്നതിനായി നേരിടേണ്ടി വരുന്ന ദീർഘമായ കാത്തിരിപ്പും സങ്കീർണ്ണമായ പേപ്പർ വർക്കുകളും ഒഴിവാക്കി ഇടപാടുകൾ സുതാര്യവും വേഗത്തിലുള്ളതുമാക്കുകയാണ് ഈ പുതിയ നീക്കത്തിലൂടെ ലക്ഷ്യമിടുന്നത്.

ക്ലെയിം മിനിറ്റുകൾക്കുള്ളിൽ

ഇതുവരെ ക്ലെയിം അപേക്ഷകൾ സമർപ്പിച്ച് പണം അക്കൗണ്ടിലെത്താൻ ആഴ്ചകളോളം കാത്തിരിക്കേണ്ടി വന്നിരുന്നു. എന്നാൽ യുപിഐ സംവിധാനം വരുന്നതോടെ അടിയന്തര ആവശ്യങ്ങൾക്കായി ചെറിയ തുകകൾ കുറഞ്ഞ സമയത്തിനുള്ളിൽ പിൻവലിക്കാൻ സാധിക്കും. അംഗങ്ങൾ അവരുടെ യുപിഐ പിൻ ഉപയോഗിച്ച് ഇടപാടുകൾ സ്ഥിരീകരിക്കാം. ഇത് അവരുടെ ബാങ്ക് അക്കൗണ്ടുകളിലേക്ക് സുരക്ഷിതമായി എത്തും. അതിനു ശേഷം പണം ഓൺലൈൻ പേയ്‌മെന്റുകൾക്കായി ഉപയോഗിക്കുകയോ, ഡെബിറ്റ് കാർഡുകൾ വഴി എടിഎമ്മുകളിൽ നിന്ന് പിൻവലിക്കുകയോ ചെയ്യാം.

ഡിജിറ്റൽ ഇന്ത്യ പദ്ധതിയുടെ ഭാഗമായി പിഎഫ് സേവനങ്ങൾ പൂർണ്ണമായും ലളിതമാക്കാനാണ് കേന്ദ്ര സർക്കാർ ശ്രമിക്കുന്നത്. പ്രാഥമിക ഘട്ടത്തിൽ നിശ്ചിത പരിധി വരെയുള്ള തുകകൾ മാത്രമായിരിക്കും യുപിഐ വഴി പിൻവലിക്കാൻ അനുവദിക്കുക. ഈ സംവിധാനം നിലവിൽ വരുന്നതോടെ ലക്ഷക്കണക്കിന് സ്വകാര്യ മേഖലയിലെ ജീവനക്കാർക്ക് വലിയ ആശ്വാസമാകും. അംഗങ്ങളുടെ ആധാർ കാർഡും ബാങ്ക് അക്കൗണ്ടും യുപിഐ ഐഡിയുമായി ബന്ധിപ്പിച്ചിരിക്കണം. ക്ലെയിം സെറ്റിൽമെന്റ് പ്രക്രിയയിലെ കാലതാമസം കുറയ്ക്കുന്നതിനൊപ്പം അഴിമതിയും ഇടനിലക്കാരുടെ ഇടപെടലുകളും പൂർണ്ണമായും ഇല്ലാതാക്കാൻ ഈ പരിഷ്കാരത്തിലൂടെ സാധിക്കും.

പ്രതിവർഷം അഞ്ച് കോടിയിലധികം ക്ലെയിമുകളാണ് ഇപിഎഫ്ഒ കൈകാര്യം ചെയ്യുന്നത്. ഈ സേവനങ്ങളുടെ വേഗത വർദ്ധിപ്പിക്കുന്നതിനും സാങ്കേതിക തടസ്സങ്ങൾ ഒഴിവാക്കുന്നതിനുമാണ് യുപിഐ സംവിധാനം നിലവിൽ വരുന്നത്. രാജ്യത്തുടനീളമുള്ള ഏകദേശം 8 കോടി അംഗങ്ങൾക്ക് ഈ പരിഷ്കാരം നേരിട്ട് ഗുണകരമാകും. സോഫ്റ്റ്‌വെയർ തകരാറുകൾ പരിഹരിച്ചും ഏറ്റവും പുതിയ സാങ്കേതികവിദ്യ ഉൾപ്പെടുത്തിയുമാണ് ഈ സംവിധാനം ഒരുക്കുന്നത്. നിലവിലുള്ള 'ഓട്ടോ-സെറ്റിൽമെന്റ്' രീതിയെ കൂടുതൽ ശക്തിപ്പെടുത്തുന്ന ഒന്നായിരിക്കും യുപിഐ സംവിധാനം.

ലളിതമായ പിൻവലിക്കൽ നിയമങ്ങൾ

2025 ഒക്ടോബറിൽ ഇപിഎഫ്ഒയുടെ സെൻട്രൽ ബോർഡ് ഓഫ് ട്രസ്റ്റീസ് അംഗീകരിച്ച ഈ പരിഷ്കാരം, സങ്കീർണ്ണമായ 13 വ്യത്യസ്ത വ്യവസ്ഥകളെ ലളിതമായ ഒറ്റ ഘടനയിലേക്ക് മാറ്റിയിരിക്കുകയാണ്. ചികിത്സ, ഭവന നിർമ്മാണം, വിദ്യാഭ്യാസം തുടങ്ങിയ വിവിധ ആവശ്യങ്ങൾക്കായി പണം പിൻവലിക്കുന്നതിനുള്ള നടപടിക്രമങ്ങളാണ് ഇതോടെ ലളിതമാവുന്നത്.

പുതിയ പരിഷ്കരണം അനുസരിച്ച് അംഗങ്ങൾക്ക് തങ്ങളുടെ അക്കൗണ്ടിലുള്ള തുകയുടെ 100 ശതമാനം വരെ നിശ്ചിത ആവശ്യങ്ങൾക്കായി പിൻവലിക്കാൻ അനുവാദമുണ്ട്. എന്നാൽ, അക്കൗണ്ടിലെ ആകെ തുകയുടെ 25 ശതമാനം മിനിമം ബാലൻസായി നിലനിർത്തണം. ഇത് വിരമിക്കൽ കാലത്തേക്കുള്ള സമ്പാദ്യമായി കണക്കാക്കാം.