ഇന്ത്യയിൽ ഈ വർഷം സ്വർണ വില ഉയ‍ർന്നത് 28%, 2021 സ്വ‍ർണത്തിന് നല്ല കാലമോ?

ഇന്ത്യയിൽ ഈ വർഷം സ്വർണം ഏകദേശം 28% ഉയർന്നു. 2021ലും സ്വർണം നിക്ഷേപകരുടെ ശ്രദ്ധയിൽ തുടരുമെന്നാണ് വിശകലന വിദഗ്ധരുടെ അഭിപ്രായം. ആഗോള വിപണികളിൽ, സ്വർണം ഈ വർഷം 23% ഉയർന്നു. ഇത് പണപ്പെരുപ്പത്തെ ഭയപ്പെടുത്തുന്ന മഹാമാരി ഉത്തേജക നടപടികളുടെ ഭാ​ഗമാണ്. വിലയേറിയ ലോഹങ്ങൾ പലപ്പോഴും പണപ്പെരുപ്പത്തിനെതിരായ ഒരു നിക്ഷേപ മാ‍ർ​ഗമായാണ് നിക്ഷേപക‍‍ർ കാണുന്നത്.

നേട്ടം

2019ലെ ഇരട്ട അക്ക നേട്ടത്തിനുശേഷം, തുടർച്ചയായ രണ്ടാം വർഷമാണ് സ്വ‌ർ‍ണം വീണ്ടും ഇരട്ട അക്ക നേട്ടം കൈവരിക്കുന്നത്. അടുത്ത വ‍‍ർഷവും സ്വർണം മികച്ച വളർച്ച കൈവരിക്കുമെന്ന് ഇൻവെസ്റ്റ്‌മെന്റ് കൺസൾട്ടിംഗ് സ്ഥാപനത്തിന്റെ സ്ഥാപകനും സിഇഒയുമായ നിഷ് ഭട്ട് പറയുന്നു.

2020ലെ സ്വർണ വില

ഈ വർഷത്തെ ആദ്യ രണ്ട് മാസങ്ങളിൽ സാമ്പത്തിക വളർച്ചയിൽ മാന്ദ്യമുണ്ടാകുമെന്ന ആശങ്കയുടെ പശ്ചാത്തലത്തിൽ സ്വർണ വില നേരിയ നേട്ടം കൈവരിച്ചു. മാർച്ച് പകുതി മുതൽ കൊവിഡ് 19 ആഗോള തലത്തിൽ ശ്രദ്ധയാക‍ർഷിച്ചപ്പോൾ സ്വർണ്ണ വിലയിൽ വലിയ മുന്നേറ്റം ഉണ്ടായി. ഓഗസ്റ്റിൽ സ്വർണ വില എംസിഎക്‌സിലെ എക്കാലത്തെയും ഉയർന്ന നിരക്കായ 56,200 രൂപയിലെത്തി.

നിക്ഷേപക‍ർ സ്വ‍ർണത്തിലേയ്ക്ക്

പകർച്ചവ്യാധി പൊട്ടിപ്പുറപ്പെട്ടതും കേസുകളുടെ എണ്ണത്തിലുണ്ടായ വർധനയും സാമ്പത്തിക അനിശ്ചിതത്വത്തിലേക്ക് നയിച്ചു. വളർച്ച വർധിപ്പിക്കുന്നതിനായി ആഗോള സെൻട്രൽ ബാങ്കുകൾ നിരവധി ഉത്തേജന പാക്കേജുകൾ പ്രഖ്യാപിച്ചു. ഇത് നിക്ഷേപകരെ സ്വർണത്തിലേക്ക് തിരിച്ചു.

2021ൽ സ്വർണ വില എങ്ങോട്ട്

നിലവിൽ, ഫ്യൂച്ചർ മാർക്കറ്റിൽ സ്വർണ വില 50,300 രൂപ വരെയാണുള്ളത്. 2021ലും നിക്ഷേപകർ സ്വർണത്തിൽ ശ്രദ്ധ കേന്ദ്രീകരിക്കുമെന്നാണ് വിദ​ഗ്ധരുടെ അഭിപ്രായം. ദുർബലമായ ഡോളറും സ്വർണ്ണ വില ഉയർത്തിയേക്കാം. വാക്സിനുകളുടെ ഫലപ്രാപ്തി, വികസ്വര രാജ്യങ്ങളിൽ പ്രതിരോധ കുത്തിവയ്പ്പ് പ്രക്രിയ ശരിയായി നടപ്പിലാക്കുക, കുറഞ്ഞ പലിശനിരക്ക്, ദ്രവ്യത സംബന്ധിച്ച ആഗോള സെൻട്രൽ ബാങ്കിന്റെ നിലപാട് എന്നിവ 2021 ൽ സ്വർണ്ണ വിലയെ നയിക്കുമെന്ന് ഭട്ട് കൂട്ടിച്ചേർത്തു.

സ്വർണ നിക്ഷേപം കുറയുമോ?

ആക്സിസ് സെക്യൂരിറ്റീസിന് സ്വർണ്ണത്തെക്കുറിച്ച് നിഷ്പക്ഷ നിലപാടാണ് ഉള്ളത്. മൊത്തത്തിൽ നിക്ഷേപകരുടെ വികാരം മെച്ചപ്പെട്ടു. ഇപ്പോൾ നിക്ഷേപകർ ഇക്വിറ്റി പോലുള്ള അപകടസാധ്യതയുള്ള നിക്ഷേപങ്ങളിലേയ്ക്കും തിരിയുന്നുണ്ട്. കോവിഡ് വാക്സിനിനെക്കുറിച്ചുള്ള ശുഭാപ്തിവിശ്വാസം കൂടുതൽ പേരെ ഓഹരി വിപണിയിലേയ്ക്ക് തിരിയാനും പ്രേരിപ്പിച്ചിട്ടുണ്ട്. ഈ സംഭവവികാസങ്ങളെല്ലാം സ്വർണ്ണ വിലകളെ സമ്മർദ്ദത്തിലാക്കുകയും ചെയ്തു. എന്നിരുന്നാലും, കുറഞ്ഞ പലിശനിരക്കും നയപരമായ നിലപാടുകളും സ്വർണ്ണത്തിൽ നിക്ഷേപം ആകർഷിക്കുന്നത് തുടരുമെന്ന് ആക്സിസ് സെക്യൂരിറ്റീസ് അടുത്തിടെയുള്ള ഒരു കുറിപ്പിൽ പറഞ്ഞു.