കൈനിറയെ കൂടുതൽ വരുമാനം, പലിശ നിരക്കുകൾ ഉയർത്തി യൂണിയൻ ബാങ്ക്; എസ്ബിഐയും മറ്റ് ബാങ്കുകളും പലിശ കൂട്ടി

ഇന്ത്യയിലെ ഏറ്റവും വലിയ ബാങ്കുകളിൽ ഒന്നാണ് യൂണിയൻ ബാങ്ക് ഓഫ് ഇന്ത്യ. വിവിധ കാലയളവിലുള്ള സ്ഥിര നിക്ഷേപ പദ്ധതികൾ ബാങ്ക് നിക്ഷേപകർക്കായി വാഗ്ദാനം ചെയ്യുന്നു. ഇപ്പോഴിതാ സ്ഥിര നിക്ഷേപകർക്ക് സന്തോഷം പകരുന്ന വാർത്തകളാണ് പുറത്ത് വരുന്നത്. 2 കോടി രൂപയിൽ താഴെയുള്ള സ്ഥിര നിക്ഷേപങ്ങളുടെ പലിശ നിരക്ക് 25 ബേസിസ് പോയിന്‍റ് വരെ യൂണിയൻ ബാങ്ക് ഓഫ് ഇന്ത്യ വർദ്ധിപ്പിച്ചു. ഇന്നുമുതൽ പുതിയ പലിശ നിരക്കുകൾ പ്രബല്യത്തിലാണ്.

ഏറ്റവും പുതിയ നിരക്കുകൾ

7 മുതൽ 45 ദിവസം വരെ കാലാവധിയുള്ള സ്ഥിര നിക്ഷേപങ്ങൾക്ക് 3 ശതമാനം പലിശയാണ് യൂണിയൻ ബാങ്ക് ഓഫ് ഇന്ത്യ നൽകുന്നത്. 46 ദിവസം മുതൽ 90 ദിവസം വരെ കാലാവധിയുള്ള സ്ഥിര നിക്ഷേപങ്ങൾക്ക് പുതിയ പലിശ നിരക്ക് 4.05 ശതമാനമാണ്. 91 ദിവസം മുതൽ 180 ദിവസം വരെ കാലാവധിയുള്ള നിക്ഷേപമാണെങ്കിൽ 4.30 പലിശ നേടാം. 181 മുതൽ 1 വർഷത്തിൽ താഴെ വരെയാണ് നിക്ഷേപ കാലാവധിയെങ്കിൽ 5.25 ശതമാനമാണ് പലിശ നിരക്ക്.

1 വർഷം മുതൽ 398 ദിവസം വരെ കാലാവധിയുള്ള സ്ഥിര നിക്ഷേപങ്ങളുടെ പലിശ നിരക്ക് 6.75 ശതമാനമായി യൂണിയൻ ബാങ്ക് ഓഫ് ഇന്ത്യ ഉയർത്തി. 399 ദിവസത്തെ കാലാവധിയുള്ള സ്ഥിര നിക്ഷേപമാണെങ്കിൽ 7 ശതമാനത്തിൽ നിന്നും 7.25 ശതമാനമായി ഉയർന്നിട്ടുണ്ട്. 400 ദിവസം മുതൽ 3 വർഷത്തിൽ താഴെ വരെ നിക്ഷേപ കാലാവധിയുള്ള സ്ഥിര നിക്ഷേപത്തിന്‍റെ പഴയ പലിശ നിരക്ക് 6.30 ശതമാനമായിരുന്നു. എന്നാൽ പുതുക്കിയ പലിശ നിരക്ക് 6.50 ശതമാനമാണ്. 3 മുതൽ 10 വർഷം വരെയുള്ള സ്ഥിര നിക്ഷേപത്തിന് 6.70 ശതമാനമാണ് പലിശ നിരക്ക്. മുൻപ് അത് 6.50 ശതമാനമായിരുന്നു.

0.50 ശതമാനം അധികം നേടാം

മുതിർന്ന പൗരന്മാർക്ക് രാജ്യത്തെ എല്ലാ ബാങ്കുകളും സ്ഥിര നിക്ഷേപത്തിന് സാധാണയേക്കാൾ ഉയർന്ന പലിശ വാഗ്ദാനം ചെയ്യുന്നുണ്ട്. 0.50 ശതമാനം അധികം പലിശയാണ് യൂണിയൻ ബാങ്ക് ഓഫ് ഇന്ത്യ മുതിർന്ന പൗരന്മാർക്ക് വാഗ്ദാനം ചെയ്യുന്നത്. 7 ദിവസം മുതൽ 10 വർഷം വരെയുള്ള സ്ഥിര നിക്ഷേപത്തിന് മുതിർന്ന പൗരന്മാർക്ക് 3.50 ശതമാനം മുതൽ 7.75 ശതമാനം വരെ പലിശ നിരക്കാണ് ബാങ്ക് വാഗ്ദാനം ചെയ്യുന്നത്.

സൂപ്പർ സീനിയർ സിറ്റിസൺസിന് സാധാരണ നിരക്കിനേക്കാൾ 0.75 ശതമാനം പലിശ നിരക്കാണ് യൂണിയൻ ബാങ്ക് ഓഫ് ഇന്ത്യ നൽകുന്നത്. സൂപ്പർ സീനിയർ സിറ്റിസൺസിന്‍റെ 7 ദിവസം മുതൽ 10 വർഷം വരെയുള്ള കാലാവധിയുള്ള സ്ഥിര നിക്ഷേപത്തിന് 3.75 മുതൽ 8 ശതമാനം വരെ പലിശ നിരക്ക് ലഭിക്കും.

സ്റ്റേറ്റ് ബാങ്ക് ഓഫ് ഇന്ത്യയുടെ നിരക്കുകൾ

ഏഴ് ദിവസം മുതൽ നാൽപ്പത്തിയഞ്ച് ദിവസം വരെ കാലാവധിയുള്ള നിക്ഷേപങ്ങൾക്ക് എസ്ബിഐ 50 ബേസിസ് പോയിന്റ് (ബിപിഎസ്) വർദ്ധിപ്പിച്ചു. അതോടെ പലിശ നിരക്കിൽ മാറ്റങ്ങളുണ്ടായി.7 ദിവസം മുതൽ 45 ദിവസം വരെ കാലാവധിയുള്ള നിക്ഷേപത്തിന്‍റെ പലിശ നിരക്ക് 3.50 ശതമാനമാണ്. 1 വർഷം മുതൽ 2 വർഷം വരെയുള്ള നിക്ഷേപത്തിന് 6.80 ശതമാനം പലിശ നേടാം. 3 വർഷം മുതൽ 5 വർഷം വരെയുള്ള നിക്ഷേപത്തിന് 6.75 ശതമാനം പലിശയും 5 വർഷം മുതൽ 10 വർഷം വരെയുള്ള നിക്ഷേപത്തിന് 6.50 ശതമാനം പലിശയും നേടാം.

500 ദിവസത്തെ സ്ഥിര നിക്ഷേപത്തിന് 7.50 ശതമാനമാണ് ഫെഡറൽ ബാങ്ക് നൽകുന്ന പുതിയ പലിശ. മുതിർന്ന പൗരന്മാർക്ക് 500 ദിവസത്തെ സ്ഥിര നിക്ഷേപത്തിന് 8.15 ശതമാനം പലിശ നേടാം. 21 മാസം മുതൽ മൂന്ന് വർഷത്തിൽ താഴെയുള്ള സ്ഥിര നിക്ഷേപത്തിന് 7.80 ശതമാനം പലിശ നേടാം.